ހޮނިހިރު ދުވަހު ބާއްވާ އެމްޑީޕީގެ އެތެރޭގެ އިންތިޚާބާދި ދިމާކޮށް، ސަރުކާރުގެ އިސްވެރިންނާއި، ކުންފުނިތަކުގެ ވެރިން ވަޒީފާގެ ބިރު ދައްކަމުންދާކަމަށް ސަރުކާރު ކޯލިޝަންގައި ހިމެނޭ މައި ޕާޓީގެ އެމްޑީޕީގެ ރައީސް ނަޝީދުގެ ފެކްޝަނަށް ނިސްބަތްވާ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
މިއީ ވައްޑެ މިތުހުމަތު ކުރެއްވި ދެވަނަ ފަހަރެވެ. ވައްޑެ ވަނީ މީގެ ކުރިންވެސް ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީއަށް ނިސްބަތްވާ ވަޒީރު ޑރ.ހުސެއިންވެސް އެމްޑީޕީގެ އިންތިޚާބަށް ނުފޫޒު ފޯރުވަމުންދާކަމަށް ބުނެފައެވެ. ވައްޑެ މިއަދު ވިދާޅުވީ މިއިންތިޚާބާއި ދިމާކޮށް ސަރުކާރުގެ އިސްބޭފުޅުން ވަކިވަކި މެމްބަރުންނަށް ވަޒީފާގެ ބިރު ދައްކައި ހަދަމުންދާކަމަށެވެ.
އެމްޑީޕީން ވެރިކަމަށް އައީ އިންތިޚާބު ތަކާއި ދިމާކޮށް، ވަޒީފާގެ ބިރު ދެއްކުން ހުއްޓުވައި، މިނިވަންކަމާއިއެކު ވޯޓު ދިނުމުގެ ހައްގު ހޯދަން ކަމަށެވެ. ނަމަވެސް އެކަން މިސަރުކާރުން ވަނީ އަލުން އިޔާދަ ކުރައްވަން ފައްޓަވާފައިވާކަމަށް ވައްޑެ ވަނީ ތުހުމަތު ކުރައްވާފައެވެ.
މިވެރިކަން ގެނައުމަށް ވީ އެންމެބޮޑު އަނެއް ވަޢުދަކީ ވަޒީފާގެ ބިރުދެއްކުން ހުއްޓުވުން. އެމްޑީޕީގެ އެތެރޭގެ އިންތިޚާބާ ދިމާކޮށް، ސަރުކާރުގެ އިސް ބައެއް ބޭފުޅުންނާ ކުންފުނިތަކުގެ ވެރިން ވަރަށް ހުތުރުކޮށް މިބިރު އަލުން އެބަފަތުރާ. 25 ގައި ނަގާ ވޯޓުގައި އެމްޑީޕީ ސާފުކުރަން ވޯޓުދެއްވާ.
– އިންތި ވިދާޅުވިއެވެ.
އެމްޑީޕީގެ އެތެރޭގެ އިންތިޚާބު ހޮނިހިރު ދުވަހު ބާއްވާއިރު، މިއިންތިޚާބުގައި ރައީސް ނަޝީދާއި، ރައީސް ޞާލިހަށް ތާއީދު ކުރާ މެމްބަރުންގެ ވާދަވެރިކަން ބޮޑުވެ، ޕާޓީގެ ބާރުވެރިކަން ހޯދުމަށް ދެބޭފުޅުންވެސް ގެންދަވަނީ މަސައްކަތް ކުރައްވަމުންނެވެ. ރައީސް ނަޝީދު ވިދާޅުވެފައިވަނީ މިއިންތިޚާބުން ބަލި ނުވާނެކަމަށެވެ. ނަމަވެސް ރައީސް ޞާލިހަށް ތާއީދު ކުރައްވާ ބޭފުޅުން ވިދާޅުވަމުންދަނީ މި އިންތިޚާބު ބޮޑު ތަފާތަކުން ކާމިޔާބު ކުރާނެކަމަށެވެ.
މިއިންތިޚާބަކީ އެމްޑީޕީގެ ކުރިއަށް އޮތް ރިޔާސީ ޓިކެޓާއިވެސް ގުޅިފައިވާ އިންތިޚާބެކެވެ. ޤައުމީ މަޖިލިސްގެ ކޮންޓްރޯލް ލިބޭ ބޭފުޅަކަށް ރިޔާސީ ޓިކެޓް ލިބުމުގެ ފުރުސަތު ބޮޑުވާނެއެވެ.
