ކިންގް ސަލްމާން މިސްކިތް ހުޅުވުމުގެ ދަޢުވަތު ސައުދީ އަރަބިއްޔާގެ ވަލީއަހްދު މުހައްމަދު ބިން ސަލްމާނަށް ދިވެހި ސަރުކާރުން ދެއްވައިފިއެވެ.
ސައުދީ އަރަބިއްޔާގެ ރަސްގެފާން ސަލްމާން ބިން އަބްދުލްއަޒީޒުގެ ހިލޭ އެހީގައި ރާއްޖޭގައި އިމާރާތް ކޮށްފައިވާ ސަލާމް މިސްކިތް ނުހުޅުވި ގިނަ ދުވަސްތަކެއް ވާތީ ގިނަ ބަޔަކު ދަނީ ކަންބޮޑުވުން ފާޅު ކުރަމުންނެވެ. ސަރުކާރުން ވިދާޅުވަމުންދަނީ މިސްކިތް ހުޅުވުން ލަސްވަނީ، ސައުދީން މިސްކިތް ހުޅުވުމަށް ވަޑައި ގަންނަވާ ވަފްދު ވަޑައި ނުގަންނަވާތީކަމަށެވެ.
ސައުދީ އަރަބިއްޔާ އަށް ދިވެހިރާއްޖެ އިން ކަނޑައަޅުއްވާފައި ހުންނަވާ ސަފީރު މުހައްމަދު ޚަލީލް ސައުދީ އަރަބިއްޔާގެ "އަލް އަރަބިއްޔާ" އަށް ދެއްވި އިންޓަވިއުއެއްގައި ވިދާޅުވީ ސަލްމާން މިސްކިތް ހުޅުވަން ވަލީއަހްދު މުހައްމަދު ވަޑައިގަންނަވާނެ ކަމަށް ދިވެހިރާއްޖެ އިން އުއްމީދު ކުރައްވާ ކަމަށެވެ. ނަމަވެސް ވަލީއަހްދު މުހައްމަދު ސަލްމާން މިސްކިތް ހުޅުވަން ވަޑައިގަންނަވާނެ ކަމެއް ނުވަތަ ނޫންކަމެއް އަދި މިހާތަނަށް ކަށަވަރު ކޮށްދީފައެއް ނުވެއެވެ.
ކިންގް ސަލްމާން މިސްކިތް ފަރުމާކޮށްފައިވާ ގޮތަށް ބަލާއިރު، މި މިސްކިތުގައި ނަމާދުކުރުމަށް ޚާއްސަ ސަރަޙައްދުތަކުގެ އިތުރުން، އިސްލާމީ މަރުކަޒަކުން ލިބޭނެ ގިނަ ޚިދުމަތްތަކެއް ވަނީ ޤާއިމުކޮށްފައެވެ. އެގޮތުން މިސްކިތުގެ އެންމެ ތިރި ވުޞޫއުކުރުމަށް ޚާއްސަކޮށްފައިވާއިރު، ފުރަތަމަ ފަންގިފިލާއާއި ދެވަނަ ފަންގިފިލާ ޚާއްސަކޮށްފައިވަނީ ނަމާދުކުރުމަށެވެ. މި ދެ ފަންގިފިލާގައި ގާތްގަނޑަކަށް 4000 މީހުންނަށް އެއްފަހަރާ ނަމާދުކުރެވޭނެއެވެ.
މިސްކިތުގެ 3 ވަނަ ފަންގިފިލާގައި 4 ކްލާސްރޫމަކާއި، 5 ސެމިނަރ ރޫމެއްގެ އިތުރުން އިސްލާމިކް ލައިބްރަރީއަކާއި އިދާރީ މަސައްކަތްތަކަށް ޚާއްސަ ތަނެއްވަނީ ހަދާފައެވެ. 4ވަނަ ފަންގިފިލާ ޚާއްސަކޮށްފައިވަނީ އެކިއެކި ސެމިނަރތަކާއި ކޮންފަރެންސްތައް ބޭއްވުމަށް ޚާއްސަ އޮޑިޓޯރިއަމަކަށެވެ. މިއީ 350 މީހުންގެ ޖާގައިގެ އޮޑިޓޯރިއަމެކެވެ. މީގެ އިތުރުން މިސްކިތުގެ 5ވަނަ ބުރި ތަރައްޤީކޮށްފައިވަނީ ދީނީ ދަރުސް ދިނުމަށާއި، ނަމާދުކުރުމަށްވެސް ބޭނުންކުރެވޭނެހެން މަލްޓި-ޕަރޕަސް ހޯލެއްގެ ގޮތުގައެވެ.
މިސްކިތް ޒީނަތްތެރިކުރުމުގެގޮތުން ޗާންދަލިޔާތަކާއި ޢަރަބި ކަލިގްރަފީއާއި، ކިރީތި ޤުރުޢާނުގެ އާޔަތްތަކާއި، އިސްލާމީ ސަޤާފަތާއި ގުޅުންހުރި ތަފާތު ލިޔުންތައް ބޭނުންކޮށްފައިވެއެވެ.
