އަންނަ އަހަރުން ފެށިގެން އަމަލުކުރަން ފަށާ އެއްހަމަ ޕޭ ފްރޭމްވަރކްގެ ސަބަބުން ސިވިލް ސަރވިސްގެ މުވައްޒަފުންގެ މެދުގައި މުސާރައާ މެދު ހުރި ގިނަ ކަންބޮޑުވުންތަކަށް ހައްލުތަކެއް ލިބިގެންދާނެކަމަށް ސަރުކާރުން ބުނެފިއެވެ.
ރައީސް އޮފީހުން ބުނީ، ދައުލަތުގެ ހުރިހާ ފަންނުތަކެއް ހިމެނޭގޮތަށް ނޭޝަނަލް ޕޭ ކޮމިޝަނުން އެކުލަވާލުމުގެ މަސައްކަތް ކުރިއަށްދާކަމަށެވެ. އަދި އެ މަސައްކަތް މިހާރު ނިމުމާއި ގާތްވެފައިވާކަމަށްވެސް ރައީސް އޮފީހުން ބުންޏެވެ. އެގޮތުން މިއަހަރުގެ ތެރޭގައި އެއްކޮށް އެ މަސައްކަތް ނިމޭނެކަމަށްވެސް ރައީސް އޮފިހުން ބުންޏެވެ. މިއާއެކު ދައުލަތުގެ އިދާރާތަކުގެ މެދުގައި ހުރި މުސާރައިގެ ފަރަގުތައް ނައްތާލެވި، އެއްހަމަ މިންގަނޑަކުން މުސާރައާއި އިނާޔަތްތައް ކަނޑައެޅިގެންދާނެކަމަށްވެސް ރައީސް އޮފީހުން ބުންޏެވެ.
ރައީސް އޮފީހުން ބުނީ އައު މިޕޭ ފްރޭމްވަރކާއެކު ކަނޑައަޅާ މުސާރައާއި ޢިނާޔަތްތަކަކީ މަގާމުގެ މަސްއޫލިއްޔަތު އަދާކުރުމަށް ބޭނުންވާނެ ޢިލްމީ ގާބިލުކަމާއި ފަންނުވެރިކަމާއި، މަގާމުގެ މަސްއޫލިއްޔަތާއި ޒިންމާތަކުގެ ބުރަކަމާއި، ކުރިމަތިވެދާނެ އެކި ވައްތަރުގެ ހިރާސްތަކާއި، މަސައްކަތުގެ މާހައުލުގައި ކުރިމަތިލާންޖެހޭނެ ޖިސްމާނީ ބުރަތަކަށް ރިޢާޔަތްކޮށްގެން ކަނޑައެޅޭނެ މުސާރައާއި ޢިނާޔަތްތަކެއް ކަމުގައިވާނެކަމަށެވެ. އަދި ސަރުކާރުގެ އަމާޒަކީ އަންނަ އަހަރުން ފެށިގެން މި އައު ޕޭ ފްރޭމްވަރކަށް މުވައްޒަފުން ބަދަލުކުރުމުގެ މަސައްކަތް ފެށުންކަމަށާއި، މި އައު ޕޭ ފްރޭމްވަރކްގެ ސަބަބުން ސިވިލް ސަރވިސްގެ މުވައްޒަފުންގެ މެދުގައި މުސާރައާމެދު ހުރި ގިނަ ކަންބޮޑުވުންތަކަށް ހައްލުތަކެއް ލިބިގެންދާނެކަމަށް ރައީސް އޮފީހުން ބުންޏެވެ.
ސަރުކާރުން މިހެން ހާމަކޮށްފައިވާއިރު، ސިވިލްސާވަންޓުންގެ މުސާރަ ބޮޑު ކުރުމަކީ މިސަރުކާރުގެ ވައުދެކެވެ. ނަމަވެސް އެކަން ކުރެވިފައި ނުވާތީ ސިވިލްސާވަންޓުންވަނީ މިއަދު ކަޅު ހެދުމުގައި މަސައްކަތަށް ނިކުތުމަށްފަހު މުސާރައަށް ހައްލެއް ނާންނަނަމަ މާދަމާ ވަޒީފާއަށް ނުނިކުމެ މަޑު ކުރުމަށް ނިންމާފައެވެ. މިއަދު ވެލާނާގެއަށް ދިޔަ ގިނަ މުވައްޒިފުން ތިބީ ކަޅު ހެދުމުގައެވެ. މިނޫންވެސް ސަރުކާރުގެ އެކި އިދާރާތަކަށް ވަޒީފާއަށް ދިޔަ ގިނަ މީހުން ތިބީ ކަޅު ހެދުމުގައެވެ.
ސިވިލްސާވިސްގެ ތެރެއިން މިކަމަށް އިސްނަގައިގެން މަސައްކަތް ކުރާ މީހަކު ބުނެފައިވަނީ މިކަމުގައި ހުރިހާ ސިވިލްސާވަންޓުންވެސް ބައިވެރިވާކަމަށެވެ. އަދި މިއީ މުވައްޒިފުންނަށް ހައްގުވާ މިންވަރު ހޯދުމަށް ކުރެވޭ ސުލްހަވެރި އިހުތިޖާޖެއް ކަމަށާއި، އަންނަ އާދީއްތަ ދުވަހު ސިވިލްސާވިސް ހުރިހާ މުވައްޒިފުންވެސް ސަރުކާރަށް މެސެޖެއް ދިނުމަށް މަސައްކަތަށް ނިކުންނާނީ ކަޅު ހެދުމެއްގައި ކަމަށެވެ.
ސިވިލް ސާވެންޓުން ސަރުކާރަށް ކުރާ ޑިމާންޑުތަކުގެ ތެރޭގައި، ދަށް ފަންތީގެ މުވައްޒަފުންގެ މުސާރަ ބޮޑުކުރުމާއި، ސެޓްފިކެޓް ހުށަހެޅުމުން ވަޒީފާގެ ކުރިއެރުން ލިބޭގޮތް ހެދުމާއި، މިނިމަމް ވޭޖު އަވަސްކޮށްދިނުމާއި، ސްކޫލުތަކުގެ އިދާރީ މުވައްޒަފުންނަށް އިތުރު އެލަވަންސެއް ހަމަޖައްސައިދިނުމުގެ އިތުރުން ސިޔާސީ މަގާމުތަކުގައި ތިއްބަވާ ބޭފުޅުންނަށް ލިބޭ ގޮތަށް ސިވިލް ސާވެންޓުންނަށްވެސް ލިވިން އެލަވަންސް ލިބޭނެ ގޮތެއް ހެދުމަށް ޑިމާޑްތަކުގެ ތެރޭގައި ހިމެނެއެވެ.
