ސިވިލްސާވިސް މުވައްޒިފުންނަށް ހައްގުވާ މުސާރަ ހޯދުމަށް، ސިވިލްސާވިސް މުވައްޒިފުން ކުރިއަށްގެންދާ އިހުތިޖާޖުގެ ތެރެއިން މާދަމާ އެއްވެސް މުވައްޒަފަކު މަސައްކަތް ނުކުރުމަށް ނިންމައިފިއެވެ.

ސިވިލްސާވަންޓުންގެ މުސާރަ ބޮޑު ކުރުމަކީ މިސަރުކާރުގެ ވައުދެކެވެ. ނަމަވެސް އެކަން ކުރެވިފައި ނުވާތީ ސިވިލްސާވަންޓުންވަނީ މިއަދު ކަޅު ހެދުމުގައި މަސައްކަތަށް ނިކުތުމަށްފަހު މުސާރައަށް ހައްލެއް ނާންނަނަމަ މާދަމާ ވަޒީފާއަށް ނުނިކުމެ މަޑު ކުރުމަށް ނިންމާފައެވެ. މިއަދު ވެލާނާގެއަށް ދިޔަ ގިނަ މުވައްޒިފުން ތިބީ ކަޅު ހެދުމުގައެވެ. މިނޫންވެސް ސަރުކާރުގެ އެކި އިދާރާތަކަށް ވަޒީފާއަށް ދިޔަ ގިނަ މީހުން ތިބީ ކަޅު ހެދުމުގައެވެ.

މި އިހްތިޖާޖުގައި އިސްކޮށް އުޅޭ ފަރާތަކުން ވިދާޅުވީ، މިއަދުގެ ކަޅު ހެދުމުގައި ހިންގި ހަރަކާތުގައި ހުރިހާ ސިވިލް ސާރވަންޓުން ބައިވެރިވިކަމަށެވެ. އަދި މާދަމާއަކީ އެއްވެސް މުވައްޒަފަކު މަސައްކަތް ނުކުރުމަށް ނިންމާފައިވާ ދުވަހެއްކަމަށާއި، މުވައްޒަފުންގެ ޝަކުވާއަށް އެއްވެސް ޙައްލެއް ނާންނަނަމަ އިތުރު ހަރަކާތްތައް ކުރިއަށް ގެންދާނެކަމަށްވެސް އެފަރާތުން ވިދާޅުވިއެވެ.

ސިވިލް ސާވެންޓުން ސަރުކާރަށް ކުރާ ޑިމާންޑުތަކުގެ ތެރޭގައި، ދަށް ފަންތީގެ މުވައްޒަފުންގެ މުސާރަ ބޮޑުކުރުމާއި، ސެޓްފިކެޓް ހުށަހެޅުމުން ވަޒީފާގެ ކުރިއެރުން ލިބޭގޮތް ހެދުމާއި، މިނިމަމް ވޭޖު އަވަސްކޮށްދިނުމާއި، ސްކޫލުތަކުގެ އިދާރީ މުވައްޒަފުންނަށް އިތުރު އެލަވަންސެއް ހަމަޖައްސައިދިނުމުގެ އިތުރުން ސިޔާސީ މަގާމުތަކުގައި ތިއްބަވާ ބޭފުޅުންނަށް ލިބޭ ގޮތަށް ސިވިލް ސާވެންޓުންނަށްވެސް ލިވިން އެލަވަންސް ލިބޭނެ ގޮތެއް ހެދުމަށް ޑިމާޑްތަކުގެ ތެރޭގައި ހިމެނެއެވެ.

ސިވިލް ސަރވިސްގައި މަސައްކަތްކުރާ 22378 މުވައްޒަފުންނަކީ އަސާސީ މުސާރައިގެ ގޮތުގައި 6400 ރުފިޔާއަށްވުރެ ދަށް މުސާރައެއް ލިބޭ މީހުން ކަމަށް ފިނޭންސް މިނިސްޓަރ އިބްރާހިމް އަމީރުވަނީ ވިދާޅުވެފައެވެ. މިނިސްޓްރީ އޮފް އިކޮނޮމިކް ޑިވެލޮޕްމަންޓްއިން ފޮނުވާފައިވާ މިނިމަމް ވޭޖް ރިޕޯޓާ ގުޅޭގޮތުން ލަފާ ހޯދުމަށް ރައްޔިތުންގެ މަޖިލީހުގެ އިޤްތިޞާދީ ކޮމިޓީން މިދިޔަ އަހަރު މިނިސްޓަރ އޮފް ފިނޭންސްއާއެކު ބޭއްވި ބައްދަލުވުމުގައި މިނިސްޓަރ އަމީރު ވިދާޅުވީ މިނިމަމް ވޭޖެއް ކަނޑައެޅުމުން ސަރުކާރު މުވައްޒަފުންގެ މުސާރައާއި ޕެންޝަނަށް ކުރާ ހޭދަ 3.7 ބިލިއަން ރުފިޔާއަށް އިތުރުވެގެންދާކަމަށެވެ.

ސިވިލް ސަރވިސްގައި މަސައްކަތްކުރާ 44838 މުވައްޒަފުންގެ ތެރެއިން އަސާސީ މުސާރައިގެ ގޮތުގައި 6400 ރުފިޔާއަށް ވުރެ ބޮޑު މުސާރައެއް ލިބެނީ 478 މީހުންނަށްކަމަށެވެ. އެއީ ޕަބްލިކް ސަރވިސްގެ ލެވަލް 7 އަށްވުރެ މަތީގެ ވަޒީފާތަކެވެ. ސިވިލް ސާވެންޓުންގެ ގޮތުގައި މި ވަގުތު 26،668 މުވައްޒަފުން އެބަތިއްބެވެ. އޭގެ ތެރޭގައި ގިނައީ އަންހެނުންނެވެ. އެއީ 16،593 އެވެ.

ސިވިލްސާވަންޓުން ހައްގުވާ މުސާރަ ހޯދުމަށް އިހުތިޖާޖަށް ނިކުތުމަށް ތައްޔާރު ވެފައިވާއިރު، ޕައިލެޓުންގެ މުސާރަ އަދި ޑޮކްޓަރުންނާއި ނަރުހުންނަށް ވަޒީފާގެ ކުރިއެރުން ނުލިބި ލަސްވަމުންދާތީ ރައީސް އިބްރާހިމް މުހައްމަދު ސޯލިހުއާ ބައްދަލުކުރައްވާފައިވެއެވެ. އެ މައްސަލަތަކަށް ހައްލު ހޯއްދަވައިދެއްވާނެ ކަމުގެ ރައީސް ވަނީ ދެއްވައިފައެވެ.