ތުއްތު ދަރިއަކު ބޮޑުވަމުން އަންނަ އިރު މައިން ބަފައިންނަށް ވަރަށް ގިނަ މަރުހަލާތައް ކަޑައްތުކުރަން ޖެހެއެވެ. އެގޮތުން ދަތްފަޅާ އުމުރަކީވެސް ދަރިފުޅަށްވެސް ގިނަ މައްސަލަތަކަކާ ކުރިމަތިލާން ޖެހޭ ދުވަސްތަކެކެވެ.
އާއްމުކޮށް އުމުރުން 4 މަހާއި 7 މަހާ ދޭތެރޭ ދަތްފަޅާއިރު ކުއްޖާ ހުންއައުން، ރޭގަނޑަށް ދިމާވާ އުނދަގޫތަކުގެ ސަބަބުން ރަގަނޅަށް ނުނިދި ރުއިން ފަދަ ކަންކަން ކުއްޖާގެ ކިބައިން ފެނެއެވެ. މި މައްސަލަތައް ދިމާވަނީ ކުއްޖާއަށް ނޭގި ނަމަވެސް ހަށިގަނޑު ވޭނެއް ތަހައްމަލު ކުރާތީއެވެ. މިކަންކަމަށް ލުއެއް ހޯދައިދެވޭނީ ހަމައެކަނި މައިންބަފައިންނަށެވެ.
ކުއްޖާގެ ވޭނަށް ލުޔެއް ހޯދައިދޭން ބޭނުންނަމަ ދަތްފަޅާ ދުވަސްކޮޅު ތިރީގައި އެވާ ކަންކަން ކޮއްލުން ވަރަށް މުހިންމެވެ.
- ޓީތިންގް ޓޯއީސް
ދަތް ފަޅާ ދުވަސްވަރު އާއްމުކޮށް ދަރިފުޅުގެ އަތަށް، އަގައަށް ލުމަށް ޓީތިން ޓޯއީސް ދެވެއެވެ. އެހެން ނަމަވެސް މިދުވަސްވަރު ދަރިފުޅަށް ދޭ އެފަދަ ޓޯއީސް ކޮންމެވެސް ވަރަކަށް ފިނިކޮށްލާފައި ދިނުމުން ތަދު ކުޑަވާނެއެވެ.
- ހިރުގަނޑު މަސާޖުކުރުން
ދަރިފުޅުގެ ހިރުގަނޑު މަސާޖުކުރުންވެސް ވަރަށް މުހިއްމެވެ. ކޮންމެ ދުވަހަކުވެސް އިގިލި ރަނގަޅަށްދޮވެ ސާފުކުރުމަށްފަހު ދަރިފުޅުގެ ހިރުގަނޑުގައި ދެތިން ސިކުންތު ވަންދެން އިގިލި ހާކާލާށެވެ.
- ފިނި ފޮތިކޮޅެއް ޖެއްސުން
ދަތްފަޅާ އުމުރުގައި ރޭގަނޑަށް ހޭލާ މާބޮޑަށް ރޮއެ ހަދާނަމަ އަބަދުވެސް ސާފު ފޮތިކޮޅެއް ފަދަ އެއްޗެއް ފުރިޖުގައި ބާއްވާށެެވެ. އަދި ރޯނަމަ އެ ފިނި ފޮތިކޮޅު ހިރުގަނޑުގައި ޖައްސާށެވެ.
މިފަދަ ބައެއް ކުދިކުދި ކަންކަމުގެ ސަބަބުން ކުއްޖާގެ ތަދާއި ވޭން ކުޑަކުރެވި އުނދަގޫ ތަކުން ސަލާމަތްކުރެވިދާނެއެވެ. އެހެން ނަމަވެސް މާބޮޑަށް ރޮއެ ހުންގަދަވާނަމަ ޑޮކްޓަރަކަށް ދެއްކުން ވަރަށް މުހިންމެވެ.
