އޭޝިއަން އެކަޑަމީ އޮފް އެއިރޯނޯޓިކްސް (އޭއޭއޭ) ގެ ދަށުން އައްޑޫ ސިޓީގައި ހިންގާ ފްލައިން ސުކޫލް ހުރިހާ ވަސީލަތަކާއެކު ގަނެފައިވާ، ރާއްޖޭގެ އަމިއްލަ ކޮލެޖެއްކަމަށްވާ އެވިޑް ކޮލެޖުން އެއްބަސްވުން ބާޠިލްކޮށްފިއެވެ. އެ އެއްބަސްވުން ބާޔިލްކުރިކަން ހާމަކުރެއްވީ އެވިޑް ކޮލެޖުގެ ޗެއާމަން އަބްދުﷲ މުސްތާގު ރަޝާދުއެވެ.
މިކަމާއި ގުޅޭގޮތުން މުސްތާޤް ވިދާޅުވީ، މިއަދުން ފެށިގެން އައްޑޫ ފްލައިން ސްކޫލް ނުވަތަ އޭއޭއޭގެ އެއްވެސް ކަމެއްގައި އެވިޑް ކޮލެޖުގެ އެއްވެސް ދައުރެއް ނޯންނާނެކަމަށާއި، އްބަސްވުން އުވާލަން މެދުވެރިވީ ފްލައިން ސްކޫލްގެ މައްސަލައާއި ގުޅުންހުރި ބައެއް މުއައްސަސާތަކުން ލިބެން ޖެހޭ އެއްބާރުލުން ނުލިބުމުގެ ސަބަބުންކަމަށެވެ.
އަލުގަނޑުމެން އެތަން ހިންގުމަށް ޕްލޭންތަކެއް ހަދައި މުއައްސަސާތަކާއި ހިއްސާކުރިން. ނަމަވެސް އެ ޕްލޭނާ އެއްގޮތަށް ކަންތައްތައް ކުރިއަށް ގެންދެވޭނެ އެއްވެސް މަގެއް ނުފެނުން.
– އެވިޑް ކޮލެޖުގެ ޗެއާމަން އަބްދުﷲ މުސްތާގު ރަޝާދު
އައްޑޫ ފްލައިން ސްކޫލް، އެވިޑް ކޮލެޖުންގަނެ ހިންގުމާއި ހަވާލުވެއްޖެ
އޭނަ ވިދާލުވީ އޭއޭއޭއާއެކު އޮތް އެއްބަސްވުން ބާޠިލްކުރިނަމަވެސް، މުސްތަޤްބަލުގައި އެކޮލެޖުން ފްލައިން ސްކޫލެއް ތަޢާރަފްކުރެވިދާނެކަމަށްވެސް މުސްތާޤް ވިދާޅުވިއެވެ.
ރާއްޖޭގައި މަތީ ތަޢުލީމްގެ ކޯސްތައް ހިންގަމުން އަންނަ އެވިޓް ކޮލެޖުން އައްޑޫ ފްލައިން ސްކޫލް ގަނެ އެތަން ހިންގުމާއި ހަވާލުވެފައިވަނީ އެތަނުގައި ގިނަ މައްސަލަތަކެއް ފެންމަތިވެފައިވަނިކޮށް މިދިޔަ ޖޫން މަހުގެ 24ގައެވެ.
އައްޑޫ ޕްލައިން ސްކޫލްގެ ގިނަ މައްސަލަތަކެއް މީގެ ކުރިން ފެންމަތިވެފައިވެއެވެ. އެގޮތުން ފްލައިން ސްކޫލްގައި ކިޔަވަމުން ދާ ކުދިން، އެކުދިންގެ ކިޔެވުން ނުނިމި ދިގުލައިގެން ދާ މައްސަލާގައި މީގެކުރިން 86 ދަރިވަރަކު ވަނީ ސަރުކާރުގެ ކަމާ ބެހޭ ފަރާތްތަކަށް ޕެޓިޝަނެއްވެސް ހުށަހަޅާފައެވެ. އެހެންނަމަވެސް މި ޕެޓިޝަން ހުށަހެޅުމާއި ގުޅިގެން މީގެތެރެއިން ބައެއް ދަރިވަރުން، އެކި ސަބަބުތައް މެދުވެރިކުރުވާ މި ފްލައިން ސްކޫލުން ވަނީ ވަކި ކޮށްފައެވެ.
ފްލައިން ސްކޫލުގެ މައްސަލަ ހައްލުނުވެ ދިގުލައިގެން ދިއުމުގައި އޮތީ ކޮންބައެއްގެ އިހުމާލެއްތޯ ބެލުމަށް މިނިވަން އޮޑިޓެއް ހެދުމަށްވެސް ނިންމާފައިވާ ކަމަށްވެސް ކުރިން ރައީސް ވަނީ ވިދާޅުވެފައެވެ. އެހެންނަމަވެސް މި އޯޑިޓްގެ މަސައްކަތް ގޮސްފައިވާ ހިސާބެއް އަދި ސަރުކާރުން ހާމަކޮށްފައެއް ނުވެއެވެ. އައްޑު ފްލައިން ސްކޫލުގެ މައްސަލަ ހައްލު ނުވެ އެތަނުގެ ވެރިންގެ ލައިސަންސްވެސް ބާޠިލްކޮށްފައިވެއެވެ. އަދި އިތުރު ފްލައިން ސްކޫލެއް ހިންގުމަށް ހުޅުވާލާފައިވެއެވެ. އެގޮތުން ރާއްޖޭގައި ފްލައިން ސްކޫލް ހިންގުމަށް 13 ފަރާތަކުން ޝައުގުވެރިކަން ފާޅުކޮށްފައިވާކަމަށް އައިލެންޑް އޭވިއޭޝަނުން ބުނެފައިވެއެވެ.
