އައްޑޫ ސިޓީ ހިތަދޫގައި ތޫނު އެއްޗަކުން ހަމަލާދީ ޒުވާނަކު ޒަޙަމްކޮށްލައިފިއެވެ.
ފުލުހުން ބުނީ އައްޑޫ ސިޓީ ހިތަދޫ ފްލެޓް ސަރަޙައްދުގައި ތޫނު އެއްޗަކުން ހަމަލާދީ މީހަކު ޒަޙަމްކޮށްލާފައިވާކަމުގެ މައުލޫމާތު ލިބިފައިވަނީ މިއަދު 12:08 ހާއިރުކަމަށެވެ. އަދި މި މާރާމާރީގައި ޒަހަމްވެފައިވަނީ 29 އަހަރުގެ ފިރިހެނެއްކަމަށް ފުލުހުން ބުންޏެވެ. ފުލުހުން ބުނީ ޒަހަމްވި މީހާއަށް ހޮސްޕިޓަލުގައި ފަރުވާދެމުންދާކަމަށެވެ.
މިމައްސަލައިގައި މިހާތަނަށް މީހަކު ހައްޔަރުކޮށްފައި ނުވިނަމަވެސް، އެމައްސަލަ ތަހުޤީޤްކުރަމުންދާކަމަށް ފުލުހުން ބުންޏެވެ.
އައްޑޫ ސިޓީގައި މާރާމާރީއެއް ހިނގައި މީހަކު ޒަޚަމްކޮށްލާފައިވާއިރު، އިއްޔެ ވަނީ ކުޑަ ކުއްޖަކަށް ފުލުހަކު ޖިންސީ ގޯނާކުރި މައްސަލާގައި މުޒާހަރާކޮށްފައެވެ. އަދި މުޒާހަރާގެ ބައިވެރިންނާއި ދެކޮޅަށް ފުލުހުން ބާރުގެ ބޭނުންކޮށްފައިވާކަމަށް މުޒާހަރާގެ ބައިވެރިން ބުންޏެވެ.
