ރައްޔިތުންގެ މަޖިލީހުގެ ނިލަންދޫ ދާއިރާގެ މެމްބަރު އަބްދުލް މުހުސިން ހަމީދު އާއި، ނޮޅިވަރަމް ދާއިރާގެ މެމްބަރު މުހައްމަދު ނަޝީދު (މޮސްޓަރ) އެމްއެންޕީއަށް ސޮއި ނުކުރަން ނިންމައިފިއެވެ.
މިދެބޭފުޅުން އެމްއެންޕީއަށް ސޮއި ނުކުރަން ނިންމާފައި މިވަނީ މާދަމާ އެޕާޓީ އުފެއްދުމަށް އިލެކްޝަންސް ކޮމިޝަނަށް ފޯމް ހުށަހެޅުމަށް ތައްޔާރު ވެފައި ވަނިކޮށެވެ. އެމްއެންޕީ އުފެއްދުމަށްޓަކައި 5،000 މީހުންނަށް ވުރެ ގިނަ މީހުންގެ ސޮޔާއިއެކު މާދަމާ އިލެކްޝަނަށް ފޯމުތައް ހަވާލު ކުރުމަށް ވަނީ ހަމަޖެހިފައެވެ.
ޚަބަރު އޮންލައިނަށް މައުލޫމާތު ދެއްވަމުން ޖޭފޯ ވިދާޅުވީ މިވަގުތަށް އެމްއެންޕީއާއ ގުޅުން މަޑުޖައްސާލާފައިވާކަމަށެވެ. އަދި ސިޔާސީ ގޮތުން އެމްއެންޕީ ކުރާ މަސައްކަތަށް ހުރަސް އަޅައި ނުވަތަ އެކަމަށް ދަތިވާފަދަ ކަމެއްވެސް ނުކުރައްވާނެކަމަށެވެ. އަދި މެމްބަރު ނަޝީދުވެސް މިވަގުތަށް ހުންނެވީ ސޮއި ނުކޮށް މަޑު ކޮށްލާ ގޮތަށް ކަމަށެވެ.
އެމްއެންޕީ އުފެއްދުމުގެ ހުއްދަ އިލެކްޝަންސް ކޮމިޝަނުން މަޖިލީހުގެ ވިލިމާލެ ދާއިރާގެ މެންބަރު އަދި ނާޒިމްގެ ދެބެންގެދެދަރި ކޮއްކޮ އަހްމަދު އުޝާމަށް ދީފައިވަނީ މިދިޔަ ޖުލައި 15 ވަނަ ދުވަހުއެވެ.
އެމްއެންޕީ އުފެއްދުމުގައި ނާޒިމާއި އުޝާމުގެ އިތުރުން މަޖިލީހުގެ ތިމަރަފުށި ދާއިރާގެ މެންބަރު އަބްދުﷲ ރިޔާޒުއާއި، ނިލަންދޫ ދާއިރާގެ މެންބަރު އަބްދުލްމުހުސިން އަބްދުލްހަމީދު އަދި ނޮޅިވަރަމް ދާއިރާގެ މެންބަރު މުހައްމަދު ނަޝީދު (މޮސްޓާ) ވެސް ދަނީ ބައިވެރިވެފައިވެއެވެ. އަދި ޕާޓީ ފޯމުތައް ހަމަ ކުރުމުގައިވެސް މީގެ ކުރިން ޖޭފޯއާއި، ނަޝީދު ބައިވެރިވެފައިވެއެވެ. ނަމަވެސް އެދެބޭފުޅުން ވަނީ މަސައްކަތްތައް މަޑު ޖައްސާލައި އެމްއެންޕީއަށް ސޮއި ކުރުން މަޑު ޖައްސާލާފައެވެ.
އެމްއެންޕީން ވަނީ 2023 ވަނަ އަހަރު ބާއްވާ ރިޔާސީ އިންތިހާބުގައި އެ ޕާޓީން ކެންޑިޑޭޓަކު ނެރުމަށް ނިންމާފަ އެވެ. ކެންޑިޑޭޓަކު ކަނޑައެޅުމަށް ބާއްވާ ޕްރައިމަރީގައި ވާދަކުރައްވާނެ ކަމަށް ނާޒިމް ވަނީ އިއުލާންކުރައްވާފައެވެ. އެމްއެންޕީއަށް މެންބަރުން އިތުރުކުރުމަށްޓަކައި އެ ޕާޓީގެ ޓީމުތައް މިހާރު ގެންދަނީ އަތޮޅު ތެރޭގައި ވެސް ހަރަކާތްތެރިވަމުންނެވެ.
