މިހާރު ވެރިކަން ކުރަމުންދާ ކޯލިޝަން ދެމިއޮތީ ޖޭއެސްސީ މިހާރު އޮތް ގޮތަށް އޮތުމުން ކަމަށާއި، ޖޭއެސްސީގެ ކޮންޕޮޒިޝަން ބަދަލުކުރުމަށް މިސަރުކާރުން ވެފައިވާ ވައުދު ނުފުއްދަވާނެކަމަށް ހެންވޭރު ދެކުނު ދާއިރާގެ ކުރީގެ އެމްޑީޕީގެ މެމްބަރު އަޙްމަދު އަބްދުލްކަރީމް (ރުކުމާ) ވިދާޅުވެއްޖެއެވެ.
އިދިކޮޅު ކޯލިޝަނުން މިރޭ ބޭއްވި ޖަލްސާގައި ވާހަކަ ދައްކަވަމުން ރުކުމާ ވިދާޅުވީ ރައީސް ޔާމީންގެ ޝަރީއަތަކީ މިސަރުކާރުން މުޅިން ނުބައި ނިޔަތެއްގައި ފެށި ޝަރީއަތެއް ކަމަށެވެ. ޝަރީއަތަކީ ސީދާ ސިޔާސީ ބޭނުމަށްޓަކައި ސިޔާސީ ނުފޫޒުން ބާރުވެފައިވާ ޖުޑީޝަލް ސާވިސް ކޮމިޝަންގެ ނުފޫޒު އޮވެގެން ކުރިއަށްދާނ ޝަރީއަތެއްކަމަށެވެ.
ޖުޑިޝަލް ސާވިސް ކޮމިޝަންގެ ކޮންޕްޒިޝަން ބަދަލު ކުރުމަށް މިސަރުކާރުން ބުނަމުން ދިޔަނަމަވެސް އެކަން ކުރަން މިސަރުކާރުން ބޭނުން ނުވާނެކަމަށް އޭނާ ވިދާޅުވިއެވެ. މިސަރުކާރު ހިފަހައްޓަމުންދަނީ ޖޭއެސްސީން ކަމަށާއި، ކޯޓުތަކަށް އޮތް ނުފޫޒު ނެތިދާނެކަމުގެ ބިރަކީ މިސަރުކާރަށް މިހާރު އޮތް އެންމެ ބޮޑު ބިރުކަމަށް ރުކުމާ ވިދާޅުވިއެވެ. އޭނާ ވިދާޅުވީ ރައްޔިތުން ގަބޫލުކުރާ އަދުލުވެރި އިންސާފްވެރި ޝަރީއަތެއް ހިންގޭނީ އަދުލުވެރި ޝަރީއަތެއް ބޭއްވިގެން ކަމަށެވެ. ނަމަވެސް އެކަން ކުރުމަށް ސިޔާސީ ނުފޫޒު އޮތް ޖޭއެސްސީން އިންތިހާއަށް ކުރިމަތި ކުރަމުންދާކަމަށެވެ.
އޭނާ ވިދާޅުވީ ރައީސް ޔާމީންގެ އިސްތިއުނާފުގެ ޝަރީއަތް ސްޕްރީމް ކޯޓުން އިންސާފުވެރިކަމާއިއެކު ބަލައިފި ކަމުގައިވާނަމަ، ރައީސް ޔާމީން މިނިވަން ވާނެކަމީ ޤާނޫނު ދަންނަ ކޮންމެ ބޭފުޅަކުވެސް ޤަބޫލުކުރާ ހަގީގަތެއްކަމަށެވެ. މިޖަރީމާގެ މޭސްތިރިންނަކީ ކޮބައިކަން ދިވެހި ހުރިހާ ރައްޔިތުންނަށާއި، ކޯޓުތަކަށްވެސް މިހާރު ސާފުވާއިރު، އަދުލުވެރި ހުކުމެއް ސްޕްރީމް ކޯޓުން ރައީސް ޔާމީނަށް އިއްވަވާނެކަމަށް ގަބޫލު ކުރައްވާ ކަމަށް ރުކުމާ ވިދާޅުވިއެވެ.
ޖުޑީޝަލް ސާރވިސް ކޮމިޝަން އެކުލެވިގެންވާގޮތް ބަދަލުކޮށް އެ ކޮމިޝަންގެ މެންބަރުންގެ ދައުރު ފަސް އަހަރަށް ކަނޑައެޅުމަށް މަހިބަދޫ ދާއިރާގެ މެންބަރު އަޙްމަދު ޠާރިޤް (ޓޮމް) ޤާނޫނު އަސާސީއަށް ވަނީ އިސްލާހެއްވެސް ހުށަހަޅުއްވާފައެވެ.
ސަރުކާރަށް ތިން އަހަރުވެގެންދާއިރުވެސް ޖޭއެސްސީގެ ކޮމްޕޮޒިޝަން ބަދަލުކޮށްފައި ނުވާތީ އަމާޒުވާ ފާޑުކިޔުންތަކަށް ރައްދު ދެއްވައި، ރައީސް އޮފީހުގެ ތަރުޖަމާން މުޙައްމަދު މަބްރޫކް ޢަޒީޒް ވިދާޅުވެފައިވަނީ، ޖުޑިޝަލް ސާވިސް ކޮމިޝަން (ޖޭއެސްސީ) މިހާރު އެތުރިފައި އޮތް ގޮތަށް ހެޔޮ ބަދަލުތަކެއް ގެނައުމަކީ ރައީސް އިބްރާހީމް މުހައްމަދު ސޯލިހްގެ ރިޔާސީ ވައުދުފުޅެއް ކަމަށާއި، މި ސަރުކާރުގެ މަގުސަދަކީ، އެކަށީގެންވާ ރަގަޅު ދިރަސާތަކެއް ކުރުމަށްފަހު އޭގެ މައްޗަށް އެ ކޮމިޝަންގެ ކޮމްޕޮޒިޝަން ބަދަލުކުރުން ކަމަށެވެ.
ޖޭއެސްސީގެ ރައީސްއަކީ ތުޅާދޫ ދާއިރާގެ މެންބަރު ހިސާން ހުސައިނެވެ. އަދި މަޖިލީހުގެ ރައީސްގެ ހައިސިއްޔަތުން އެމްޑީޕީގެ ރައީސް މުހައްމަދު ނަޝީދު ވެސް މި ކޮމިޝަންގައި އިންނަވައެވެ. އޭގެ އިތުރުން، ދައުލަތުގެ ބަންޑާރަ ނައިބު އިބްރާޙީމް ރިފްއަތު އިތުރުން، ރައީސް ސޯލިހްގެ ފަރާތުން ކޮމިޝަނަށް އައްޔަން ކޮށްފައިވާ މެންބަރެއްގެ ގޮތުގައި މަސްތޫރު ހުސްނީ ވެސް އެ ކޮމިޝަންގައި އިންނަވައެވެ. ނަޖީއާއެއްގެ ގޮތުން، މި ކޮމިޝަންގައި މިހާރު މެޖޯރިޓީ ބެފުޅުންގެ ގޮތުގައި ތިއްބެވީ، ސަރުކާރުގެ ވިސްނުމަށް ތާއީދު ކުރައްވާ، އަދި ވަކި ސިޔާސީ ފިކުރަކަށް ނިސްބަތްވާ ފަރާތްތައްކަން ފާހަގަ ކޮށްލެވެއެވެ.
