ކުރީގެ މަޝްހޫރު އެކްޓަރު ފީރޯޒް ޚާންގެ ދަރިފުޅު ފަރްދީން ޚާން އެބުރި ބޮލީވުޑަށް އައުމަށް ތައްޔާރުވެއްޖެއެވެ.
ރިޕޯޓްތައް ބުނާގޮތުގައި އޭނާ މިހާރު ފިލްމަކަށް ވަނީ ސޮއި ކޮށްފައެވެ.
ގިނަ ދުވަސްތަކެއް ފިލްމީ ދާއިރާއާ ދުރުގައި ހުރުމަށްފަހު ފަރުދީން އެނބުރި އަންނަނީ ޑައިރެކްޓަރ ސަންޖޭ ގުޕްތާ ޕްރޮޑިއުސްކުރާ ފިލްމް "ވިސްފޮޓް" އިންނެވެ. މިއީ ވެނެޒުއޭލަން ފިލްމެއް ކަމަށްވާ "ރޮކް ޕޭޕާ ސިޒާސް"ގެ ހިންދީ ރިމޭކެކެވެ.
ބޮލީވުޑް ހަންގާމާއިން ބުނާގޮތުގައި މި ފިލްމުން ފަރްދީނާއެކު ރިތޭޝް ދޭޝްމުކު ފެނިގެންދާނެއެވެ. މި ފިލްމް ބިނާވެފައިވަނީ ޓެކްސީ ޑްރައިވަރެއްގެ ގޮތުގައި މަސައްކަތްކުރާ ކުރީގެ ޑްރަގް ޑީލަރަކު، ޕައިލެޓެއްގެ ދަރިފުޅު ކިޑްނެޕްކުރުމުން ދިމާވާ ހާދިސާތަކެއްގެ މައްޗަށެވެ.
View this post on Instagram
މިމަހު ފަހުކޮޅު ޝޫޓިންގ ފެށުމަށް ތާވަލަ ކޮށްފައިވާ މި ފިލްމް ގެ ދެ ތަރިން ވަނީ 2007 ގެ "ހެއި ބޭބީ" އިން ފެނިގެން ގޮސްފައެވެ.
މީގެ 11 އަހަރު ކުރިން ނެރުނު ފިލްމް "ދުލްހާ މިލްގަޔާ" އަށްފަހު ފިލްމީ ދުނިޔެ އާއި ގުޅުން ކަނޑާލައިގެން ފަރްދީން އުޅެމުން ދިޔައީ ވަރަށް ސިއްރުންނެވެ. ޕަަޕަރާޒީންނަށް ވެސް އޭނާ ގެއްލި، ފެނުނު އިރު ވަނީ ވަރަށް ބޮޑު ބަދަލެއް އައިސްފައެވެ. އޭނާ ހުރީ ވަރަށް ބޮޑަށް ފަލަވެ ސިފަ ގެއްލޭ ވަރުވެފައެވެ.
ނަމަވެސް އަނެއްކާވެސް ފަރުދީން ވަނީ ކުރިން ފިލްމް ތަކުން ފެނުނުގޮތަށް ހަށިގަނޑު ބަދަލު ކޮށްލައި، ވަރަށް ބޮޑަށް ހިއްކާލައި، ހަށިގަނޑަށް ބޮޑެތި ބަދަލުތަކެއް ގެނެސް ފައިއެވެ.
ފަރްދީން އެންމެ ފަހުން ފެނިގެން ގޮސްފައިވަނީ 2010 ވަނަ އަހަރު ފިލްމް "ދުލްހާ މިލްގަޔާ" އިން ސުޝްމިތާ ސެންއާއެކުގައެވެ.
