ލާއިންސާނީ އަނިޔާއަކީ މިހާރު އޮތް ވެރިކަން ކުރާ ކޯލިޝަންގެ ބައިވެރިންނަށް މާ މުހިންމު އެއްޗަކަށް ނުވެދާނެކަމަށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެއްޖެއެވެ.
ވައްކަމުގެ ތުހުމަތުގައި ލ. ކަލައިދޫން ހައްޔަރުކުރި މީހަކަށް ފުލުހުން އަނިޔާކުރި ކަމަށް ފުލުހުންގެ ތަހުގީގުން ސާބިތުވެފައިވާ ކަމަށާއި ނަމަވެސް އެކަށީގެންވާ ފިޔަވަޅު އަޅާފައިވާ ކަމަށް ނުފެންނާތީ ޖިނާއީ ތަހުގީގެއް ކޮށް ދައުވާކުރަން އެދުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ [241] ކޮމިޓީން ނިންމައި ތަޅުމަށް ފޮނުވި ރިޕޯޓަށް ބަހުސް ކުރަމުން ހަސަން ވިދާޅުވީ ލާއިންސާނީ އަނިޔާއަކީ އެމްޑީޕީއަށް ވަރަށް ބޮޑު އެއްޗެއް ކަމަށެވެ.
ރަށްރަށުގައި އަޅާ ބަނދަރާއި، ތަރައްޤީގެ އެހެން ކަންކަމަށްވުރެ އެމްޑީޕީއަށް ލާއިންސާނީ އަނިޔާއަކީ މާ މުހިމު އެއްޗެއްކަމަށާއި، އެކަންކަން ނުބެލި ގެނެވޭނެ ތަރައްޤީއެއް ނެތްކަމަށްވެސް ހަސަން ވިދާޅުވިއެވެ.
ފަހަރުގައި ވެދާނެ އަޅުގަނޑުމެން ކޯލިޝަން ބައެއް ޕާޓްނަރުންނަށް މިއީ ވަރަށް އާދައިގެކަމަކަށް. ވަރަށް އާދައިގެ ކަމަކަށް ވެދާނެ. އެއީ އެ ސަޤާފަތުގެ ތެރޭގައި ތިއްބެވި ބޭފުޅުން މިސަރުކާރުގެ ތެރޭގައިވެސް އެބަތިއްބެވި. އެބޭފުޅުންނަށް މިއީ މާބޮޑު ކަމަކަށް ނުވެދާނެ. އެބޭފުޅުންނަށް މުހިންމު ވެދާނެ ކޮންމެވެސް ރަށެއްގެ ބަނދަރު. ނުވަތަ ނަރުދަމާއެއް. އެހެން ނަމަވެސް އެމްޑީޕީއަށް މާ މުހިންމު އަޅުގަނޑު ދެކޭ ގޮތުގައި ލާއިންސާނީ އަނިޔާ ދިނުމާއި، ލާއިންސާނީ އަދަބު ދިނުމާއި، މިކަހަލަ ނާތަހުޒީބު ކަންކަން ހުއްޓުވުން މާ މުހިންމު އެމްޑީޕީއަށް.
– ހަސަން ވިދާޅުވިއެވެ.
ހަސަން ވަނީ ރާއްޖޭގައި ކުރެވޭއެކި އެކި ލާއިންސާނީ އަނިޔާ ހުއްޓުވުމަށް އަޅަންޖެހޭ ފިޔަވަޅުތައް އަޅަންޖެހޭކަމަށެވެ. އެކަން ކުރެވޭނީ މަޖިލީހުން ދޭ ރެކޮމަންޑޭޝަނަތަކަށްވެސް އިހުތިރާމްކޮށްގެންކަމަށް އޭނާ ވިދާޅުވިއެވެ.
ސެޕްޓެމްބަރު 6، 2020 ގައި ލ. ކަލައިދޫ މޫނިމާގެއިން ވައްކަން ކުރި ކަމުގެ ތުހުމަތުގައި އެ ރަށު ސުވީޓްހާޓްގޭ އަހުމަދު ސިރާޖު ހައްޔަރު ކުރުމަށް ފަހު ފުލުހުންގެ ބެލުމުގެ ދަށުގައި ބަހައްޓައިގެން އޭނާއަށް އެކި ވަރުގެ އަނިޔާކުރި މައްސަލައެއް އޭނާގެ ފަރާތުން ވަނީ ފުލުހަށާއި ރައްޔިތުންގެ މަޖިލީހަށް ވެސް ހުށަހަޅައިފަ އެވެ.
އަނިޔާކުރި ފުލުހުންގެ މައްޗަށް ޖިނާއީ ތަހުގީގެއް ހިންގައި އެ ފަރާތްތަކަށް ދައުވާ ކުރުމަށް ޕްރޮސެކިއުޓާ ޖެނަރަލް އޮފީހަށް ފޮނުވުމަށް ސަލާމަތީ ހިދުމަތްތަކާ ބެހޭ ކޮމިޓީން ވަނީ އެ މުއައްސަސާގައި އެދިފަ އެވެ. އަދި ބަންދުގައި ތިބޭ މީހުންނަށް އަސާސީ ހައްގުތައް ކަށަވަރުކޮށްދިނުމާއި އެ ފަރާތްތަކާ މެދު އަމަލުކުރަމުންދާ ގޮތް ކައިރިން ބެލޭނެ ފަދަ އިންތިޒާމްތައް ހަމަޖައްސާފައި ބެހެއްޓުމަށް ވެސް ސަލާމަތީ ހިދުމަތްތަކާ ބެހޭ ކޮމިޓީން ވަނީ ލަފާ ދީފަ އެވެ
