އެމެރިކާގައި ދިރިއުޅެމުންދިޔަ ސައުދީ އަރަބިއާގެ ބައެއް ރައްޔިތުންނާއި، 9/11 ގައި އެމެރިކާގެ ވާރލްޑް ޓްރޭޑް ސެންޓަރަށް ހަމަލާ ދިނުމުގައި މަތިންދާ ބޯޓު ހައިޖެކް ކުރުމުގައި ބައިވެރިވި ދެ މީހަކާ އޮތް ގުޅުންތަކާ ބެހޭ ލިޔެކިޔުންތަކެއް އެފްބީއައި އިން އާންމު ކޮށްފިއެވެ.

މި ހަމަލާގައި މަރުވި މީހުންގެ އާއިލާތަކުން، މި ލިޔުންތައް އާންމުކުރުމަށް ގޮވާލަމުންދާތާ އެތައް ދުވަސްތަކެއް ވަނީ ފާއިތުވެގެން ގޮސްފައެވެ. މި އާއިލާތަކުން ތުހުމަތު ކުރަމުންދަނީ، މި ހަމަލާގެ މައުލޫމާތު ސައުދީ އޮފިޝަލުންނަށް ކުރިން ލިބިފައިވި ނަމަވެސް، ހަމަލާ ހުއްޓުވުމަށް ސައުދީ އަރަބިއާއިން އެއްވެސް މަސައްކަތެއް ކޮށްފައި ނުވާކަމުގެ ތުހުމަތެވެ.

އެހެންނަމަވެސް، އެފްބީއައިން އާންމު ކޮށްފައިވާ ދެ ލިޔެކިޔުމުންވެސް، މި ހަމަލާގައި ސައުދީ ސަރުކާރުން ބައިވެރިވެފައިވާ ކަމުގެ އެއްވެސް ހެއްކެއް ފެންނާކަށް ނެތެވެ.

މީގެ 20 އަަހަރު ކުރިން، 9/11 ގައި އެމެރިކާއަށް ޖާނުން ފިދާވެގެން ދިން މިހަމަލާގައި، މަތިންދާ ބޯޓުތައް ހައިޖެކްކުރި 19 މީހުންގެ ތެރެއިން 15 މީހުންނަކީ ސައުދީ އަރަބިއާގެ ރައްޔިތުންނެވެ.

މި ލިޔެކިޔުންތައް އެފްބީއައި އިން އާންމު ކުރުމުގެ ކުރިން ވޮޝިންގޓަންގައި ހުންނަ ސައުދީ އެމްބަސީންވަނީ މިކަމަށް މަރުހަބާ ކިޔާފައެވެ. އަދި، އެމްބަސީންވަނީ، ސައުދީ ސަރުކާރާ، ބޯޓުތައް ހައިޖެކް ކުރި މީހުންނާ އެއްވެސް ގުޅުމެއް ނޯންނާނެ ކަމަށްބުނެ، މިގޮތުން ކުރެވޭ ތުހުމަތުތަކަކީ، "ދޮގު އަދި ފިތުނަ އުފެއްދުމަށް" ދައްކާ ވާހަކަތަކެއް ކަމަށް ބުނެފައެވެ.

9/11ގެ ޓެރަރިސްޓް ހަމަލާއާއި ގުޅުންހުރި ލިޔުންތައް އެފްބީއައި އިން އާންމު ކުރަން ފަށާފައި މިވަނީ، އެމެރިކާގެ ތާރީޚުގައި، އެގައުމަށް ދެވުނު، 3،000 މީހުން މަރުވެދިޔަ، އެންމެ ނުރައްކާތެރި ޓެރަރިސްޓް ހަމަލާއަށް 20 އަހަރު ފުރުނު މުނާސަބަތާ ދިމާކޮށެވެ. އަދި އާންމު ކުރެވުނު މި ލިޔެކިޔުންތަކަކީ، މިގޮތުން އާންމު ކުރެވުނު ފުރަތަމަ ލިޔެކިޔުންތަކަށް ވާއިރު، މުސްތަގުބަލުގައި، މީގެ އިތުރު ލިޔެކިޔުންތައްވެސް އާންމު ކުރެވިގެން ދާނެއެވެ.

އެފްބީއައިން އާންމު ކޮށްފައިވާ 16 ސަފްހާގެ މި ލިޔުންތައް ވަނީ ވަރަށް ބޮޑަށް އެޑިޓްކޮށް، ބައެއް މައުލުމާތު ނުފެންނަ ގޮތް ހަދާފައެވެ.

މި ލިޔެކިޔުންތައް ބުނާ ގޮތުން، ބޯޓުތައް ހައިޖެކް ކުރި މީހުން އެމެރިކާއަށް އެތެރެ ވެފައިވަނީ، 2،000 ވަނަ އަހަރު ކިޔަވާ ކުދިންގެ ގޮތުގައެވެ. އެފްބީއައިގެ މެމޯގައި ވާގޮތުން، މި މީހުންނަށް، ހުރިހާ ގޮތަކުންވެސް ވަރަށް ބޮޑު އެހީތެރިކަމެއް އުމަރު އަލް ބަޔޮމީ ނަމަކަށް ކިޔާ މީހެއްގެ ފަރާތުން ލިބިފައި ވެއެވެ. އަދި ހެކިބަސް ދީފައިވާ މީހުން ތަހުގީގަށް މައުލޫމާތު ދީފައިވާ ގޮތުގައި، އޭނާއަކީވެސް އޭރު ކިޔަވާ ކުއްޖެއްގެ ގޮތުގައި އެމެރިކާގައި އުޅެމުންދިޔަ މީހެއް ނަމަވެސް، އޭނާއަކީ އޭރު، ލޮސް އެންޖެލްސްގައި ހުރި ސައުދީ ކޮންސިއުލޭޓަށް އާންމުކޮށް ގޮސްއުޅުނު މީހެކެވެ.

އެފްބީއައިއަށް މައުލޫމާތު ދިންފަރާތްތަކުން ތަހުގީގަށް ކިޔައިދީފައިވާ ގޮތުގައި، ބަޔޮމީއަކީ، ސައުދީ ކޮންސިއުލޭޓުގައި "ވަރަށް ޚާއްސަ ހައިސިއްޔަތެއް" އޮންނަ މީހެކެވެ.

އެފްބީއައިގެ މެމޯގައި ވާގޮތުން، ދެ ހައިޖެކަރުން ކަމުގައިވާ ހަމްޒި އާއި މިދާއަށް ބަޔޮމީގެ ފަރާތުން ފޯރު ކޮށްދީފައިވާ އެހީތެރިކަމުގެ ތެރޭގައި، ތަރުޖަމާ ކޮށްދިނުމާއި، ދަތުރު ފަތުރު ކުރުމާއި، ތަންތަނުގައި ތިބުމުގެ އިތުރުން ފައިސާގެ އެހީތެރިކަންވެސް ހިމެނެއެވެ.

މީގެ އިތުރުންވެސް، މި މެމޯތަކުގައި ވާގޮތުން، ބޯޓުތައް ހައިޖެކް ކުރި ދެމީހަކާއި، ލޮސް އެންޖެލްސްގައި ހުންނަ ކިންގ ފަހުދު މިސްކިތުގެ ކޮންޒަވޭޓިވް އިމާމެއް ކަމުގައިވާ ފަހަދު އަލް ތުމައިރީއާއި ގުޅުންތަކެއް އޮތެވެ. އަދި މި އިމާމަކީ ހައްދު ފަހަނަ އަޅާފައިވާ ވިސްނުން ގެންގުޅޭ އިމާމެއްކަމަށްވެސް މި މެމޯތަކުގައި ބުނެފައި ވެއެވެ.

އޭޕީ ނިއުސް އޭޖެންސީން ފަހުން ބުނެގައިވާ ގޮތުގައި، 9/11ގެ ޓެރަރިސްޓް ހަމަލާގެ ހަފްތާތަކެއް ފަހުން، ބަޔޮމީއާއި އަލް ތުމައިރީވެސް ވަނީ އެމެރިކާ ދޫކޮށް ގޮސްފައެވެ.