އެމްޑީޕީން ވެރިކަމަށް އައުމަށް ބޭނުންކުރާ އިންސާފަކީ ވެރިކަމަށް އައުމަށްފަހު ދޭ އަނިޔާއެއް ކަމުގައި އިދިކޮޅު ޕީޕީއެމްގެ ނާއިބް ރައީސް މުހައްމަދު ޣައްސާން މައުމޫން ވިދާޅުވެއްޖެއެވެ.

އިދިކޮޅު ކޯލިޝަނުން ރޭ ބޭއްވި ޖަލްސާގައި ވާހަކަ ދައްކަވަމުން ޣައްސާން ވިދާޅުވީ މިއަދު ބަލާލި ކޮންމެ ދިމާލަކުން ފެންނަނީ މާޔޫސްކަމާއި ނާއުންމީދުކަމަށެވެ. ވަޒީފާ އަދާކޮށްގެން ދުވަހުން ދުވަހަށް ލިބޭ އާމްދަނީ ކުޑަކުރުމުގެ ސަބަބުން ކުރަންޖެހޭ ޚަރަދު ނުކުރެވި ރައްޔިތުން ބިކަވާތަން ފެންނަކީ ނުހަނު ބޮޑު ދެރައެއްކަމަށެވެ.

ޣައްސާން ވިދާޅުވީ ރާއްޖެ މިހާލަތަށް ދިޔަ ސަބަބާއިމެދު ވިސްނާނަލްނެޖޭ ކަމަށެވެ. މިއަދު މިހާލަތަށް ދިޔައީ ވެރިކަމުގެ ދަހިވެތިކަމުގައި ޤައުމާއި ރައްޔިތުންނަށް ކޮންމެ ގޮތެއް ހަދައިގެންވެސް ބަޔަކު ކުރި މަސައްކަތުންކަމަށް ޤައްސާން ވިދާޅުވިއެވެ. އެމީހުން އެންމެ ބޮޑަށް ބޭނުން ކުރީ "އިންސާފު"ގެ ނަންބޯޑު ކަމަށާއި، ނަމަވެސް ފެނިގެންދިޔައީ އެއާއި ދިމާ އިދިކޮޅަށް މަސައްކަތް ކުރި މަންޒަރުކަމަށެވެ.

ފަނޑިޔާރުން ވަގަށްނަގައި، ކޯޓު ތަކުގައިތަޅު އުޅުވުން އެއީ އިންސާފުތޯ؟ ދިވެހި ޤައުމުގެ އޮތް އިސްލާމްދީނަށް ގޮންޖަހައި، ތަންތާގައި ބުދު ބެހެއްޓުން އެއީ އިންސާފުތޯ؟ ޔާމީން ރަޝީދާއި، ރިޟުވާންގެ މައްސަލަ އެންމެ ދުވަހަކުން ހައްލު ކުރާނޭ ބުނަ ދޮގުހަދައިގެން ވެރިކަމަށް އައިސް ތިން އަހަރާއި ކައިރިއަށް މިދަނީ، އަޅާނުލާ ތިބުން އެއީ އިންސާފުތޯ؟

– ޣައްސާން ވިދާޅުވިއެވެ.

ޤައްސާން ވިދާޅުވީ ޑޮލަރުން ފައިސާ ދޭނެކަމަށްބުނެ، ގޭކުރިމަތީގައި ފެކްޓްރީ އަޅާނެކަމަށް ބުނެ، ވާހަކަ ދެއްކި މީހުން މިއަދު ދިވެހިން ބިކަވާއިރުވެސް ތިއްބެވީ ބަލަންކަމަށެވެ. އަދި ދީނަށް ފުރައްސާރަކޮށް، ހަޖޫޖެހި މީހުން ދައުލަތުގެ މަތި ފަޑީގައި ބައިތިއްބުމަކީވެސް ދިވެހި ރައްޔިތުންނަށް އިންސާފު ހޯދައިދޭން އައިމީހުން ދިވެހި ރައްޔިތުންނަށް ކުރާ މަލާމަތެއްކަމަށެވެ.

ނިމިފައިވާ މައްސަލަތައް އަލުން ނަގައި، ފަނޑިޔާރުންނަށް ނުފޫޒު ފޯރުވައި، ވަކި ގޮތަކަށް ކަންތައްތަކެއް ހުށަހަޅައިގެން ރައީސް ޔާމީނަށް ހުކުމް ކުރުމަކީވެސް އިންސާފެއް ނޫންކަމަށާއި، މިކަންކަމަށް އިންސާފު ހޯދަން ދިވެހި ރައްޔިތުން ނިކުނާނެކަމަށް ޣައްސާން ވިދާޅުވިއެވެ.