އައްޑޫ އަތޮޅުން އިއްޔެ ހަވީރާ ހަމައަށް އިތުރު 9 މީހަކު ކޮވިޑަށް ޕޮޒިޓިވް ވެފައިވާކަން، އައްޑޫ އިކުއެޓޯރިއަލް ހޮސްޕިޓަލުން ހާމަ ކޮށްފިއެވެ.
އެހޮސްޕިޓަލުން ހާމަ ކޮށްގައިވާ މައުލުމާތު ތަކަށް ބަލާއިރު، އަލަށް ޕޮޒިޓިވްވި 9 މީހުންނާއެކު، މިޙާރު އެސިޓީގައި ކޯވިޑް19އަށް ޕޮޒިޓިވް ވެފައިވާ މީހުންގެ އަދަދު ވަނީ ޖުމްލަ 1075 އަށް އަރާފައެވެ.
އައްޑޫގައި އަލަށް ޕޮޒިޓިވް ވެފައިވާ 9 މީހުންގެ ތެރެއިން 2 ކޭސްއެއް ފެނިފައިވަނީ ހިތަދޫއިންނެވެ. މީގެ އިތުރުން މަރަދޫއިން 2 ކޭސް، ފޭދޫއިން 3 ކޭސް، މަރަދޫ ފޭދޫއިން 1 ކޭސް އަދި މީދޫއިންވެސް ވަނީ 1 ކޭސް ފެނިފައެވެ.
މިގޮތުން އިކުއެޓޯރިއަލް ހޮސްޕިޓަލުން އާންމު ކޮށްފައިވާ މައުލުމާތުތަކަށް ބަލާއިރު، އިއްޔެ ޕޮޒިޓިވްވި މީހުންގެ ތެރޭގައި ހިމެނެނީ 7 ޑައިރެކްޓް ކޮންޓޭކްޓާއި، އަދި ފުލޫ ކުލިނިކުން ޒިޔާރަތް ކުރި ދެމީހެކެވެ.
އައްޑޫއިން 1075 ކޮވިޑް ކޭސް ފެނިފައިވާއިރު އޭގެ ތެރެއިން 767 މީހުން ވަނީ ރަނގަޅުވެފައެވެ. މިބަލީގައި އައްޑޫ އިން ތިން މީހަކު ވަނީ މަރުވެފައެވެ.
އެކްޓިވް ކެސްތަކަށް ބަލާއިރު އެކްޓިވް ކޭސްތަކުގެ އަދަދު އުޅެނީ 305 ގައެވެ. އެގޮތުން އެންމެ ގިނަ އެކްޓިވް ކޭސް މިހާރު އުޅެނީ މަރަދޫގައެވެ. މަރަދޫގައި އެކްޓިވް ކޭސް އުޅެނީ 138 ކޭސްއެވެ.
މީގެ އިތުރުން މަރަދޫފޭދޫގައި 10 ކޭސް، ފޭދޫގައި އެކްޓިވް 28 ކޭސް، ހިތަދޫގައި 86، މީދޫގައި 32 ކޭސް، ހުޅުދޫގައި 10 އަދި ގަމުގައި 1 ކޭސް އުޅޭ ކަމަށް ހޮސްޕިޓަލުން ބުނެއެވެ.
އައްޑޫ ސިޓީގައި ކޮމިއުނިޓީ ސްޕްރެޑެއް އޮތުމާއި ގުޅިގެން، މިހާރު ހުރިހާ ރައްތަކެއްގައިވެސް ސްކޫލްތައް ވަނީ ބަންދު ކޮށްފައެވެ. އެހެންނަމަވެސް، ސްކޫލްތައް ބަންދުކޮށްފައި ހުންނަތާ ގިނަ ދުވަސްތަކެއް ވަމުންދާތީ، އެކަމުގެ ކަންބޮޑުވުން އެސީގައި ބެލެނެވެރިން ދަނީ ފާޅުކުރަމުންވެ.
