ދިވެހިރައްޖޭގެ ގާނޫނު އަސާސީ އޮތްގޮތުންވެސް، އަދި ރާއްޖޭގެ އާންމު ރައްޔިތުންގެ އިހުސާސްތަކަށް ބަލާއިރުވެސް، ދިވެހި މުޖުތަމަޢުގައި ޚާއްސަ ސަމާލުކަމެއް ދޭންޖެހޭ ޚާއްސަ ކަންތައް ތަކެއް ހުރެއެވެ. މީގެތެރެއިންވެސް ގިނަ ކަންކަން ގުޅި ލާމެހިގެންދަނީ، ދިވެހިން ޒަމާނުއްސުރެ ގަބޫލުކުރާ ދީނީ އަގީދާއައި، އަދި އެ އަގީދާގެ މައްޗަށް ބިނާވެގެންދާ، ޒަމާނުއްސުރެ ދިވެހިން ބަލައިގެންފައިވާ ސަގާފަތާއި އާދަކާދަތަކުގެ މައްޗަށެވެ.

މިގޮތުން ބަލާއިރު، އަބަދުވެސް، ވަކީން ޚާއްސަކޮށް، މާތްވެގެންވާ އިސްލާމާދީނާއި، އެދީނުގެ އަގީދާއާއި ގުޅޭ އެންމެހާ ކަންކަމަކީ، އެކަންކަމާ ފުށުއަރާ ކަންކަން، ގަސްތުގައިނަމަވެސް، ނުވަތަ އިހުމާލުން ނަމަވެސް ހިގައިގެން ވާނޭކަމަށް ދިވެހިން އެއްވެސް އިރަކު ގަބޫލުނުކުރާ، އަދި ބަލައި ނުގަންނަ ކަންކަންވެސް މެއެވެ. އަދި މިއިން ކޮންމެ ހާލަތެއްގައިވެސް، ވެވޭ އިހުމާލު ގިނަފަހަރަށް ދީނީ އަގީދާއާއި ގުޅިގެން ދިއުމުން، އެކަން ގިނަ އާންމު ރައްޔިތުން ދިވެހި މުޖުތަމައުގައި ބަލައިގަންނަނީ ޝައްކުގެ ނަޒަރަކަކުން ކަންވެސް ފާހަގަ ކޮށްލަން ޖެހެއެވެ.

ސަބަބުތަކެއް ނެތިއެއް ނޫނެވެ.

ދިވެހު މުޖުތަމަޢުގެ ހާލަތު މިއަދު ކޮންމެ ބީދައަކުން އޮތް ކަމުގައިވި ނަމަވެސް، ދިވެހިރާއްޖެއަކީ، ދުނިޔޭގައި މިވަގުތު އޮތް ސައްތައިން ސައްތަ، މަދު މުސްލިމް މަދު ގައުމުތަކުގެ ތެރޭގައި ހިމެނޭ އެއްގައުމެވެ. އެހެންނަމަވެސް، މިއީ ފަހަރުގައި ބައެއް ފަރާތްތަކުން ދެކޮޅު ހަދަފާނޭ ކަމަކަށް ވެދާނެއެވެ. ސަބަބަކީ، ދިވެހި މުޖުތަމަޢުގައިވެސް މިއަދު މަދުންނަނަވެސް އަމިއްލައަށް ދީން ދޫކޮށް، ހެއްދެވިފަރާތެއް ނުވާކަމަށް ގަބޫލުކުރާ މީހުން ތިބުމެވެ. އެހެންނަމަވެސް، ގަބޫލުކުރަން ޖެހޭ ހަގީގަތަކީ، ދިވެހި ޖައްވުގައި، އަދިވެސް ބަންގީގެ އަޑު މެނުވީ ނުގުގުމާ ކަމާއި، އެހެން ދީންތަކަށް އަޅުކަން ކުރެވޭނޭ ފައްޅިތައް ދިވެހި ފަސްގަޑުގައި ނެތްކަމާއި، އަދި ދިވެހި ރާއްޖެއަކީ، ގައުމުގައި އޮންނަން ޖެހޭނީ އިސްލާމްދީންކަން، ސީދާ ގާނޫނު އަސާސީގައި ކަނޑައަޅާ ބަޔާންކޮށްފައިވާ ދުނިޔޭގެ މަދު ގައުމުތަކުގެ ތެރޭގައި ހިމެނޭ އެއްގައުމު ކަމެވެ.

ކުށް ޖެހިދާނެ، އެހެންނަމަށް ކީރިތި ގުރުއާންގެ އާޔަތްތަކުން ތަކުރާރުކޮށް ލިޔެވުމަކީ ވެގެންވާނެ ކަމެއް ނޫން!

އިންސާނުން ކުރާ ކަންކަމާއި، އަދި ލިޔާ އެއްޗިއްސަކީ އެއްވެސް އިރަކު ފުރިހަމަ ކަންކަމެއް ނޫނެނެވެ. މިގޮތުން އިންސާނުންނަށް ކުށް ކިޔުމާއި، ކުށް ކުރެވުމާއި އަދި ލިޔާ ލިޔުންތަކުގައި ކުށް ހުރުމަކީ، ތަބީޢީ ކަމެއް ކަމުގައި ގަބޫލުކުރަން ޖެހެއެވެ.

އެހެންނަމަވެސް، ބައެއް ކަންކަމަކީ، އެކަންކަން ކޮށް ނިންމާއިރު، ނުވަތަ އަތުން ދޫކޮށްލާއިރު، ތަކުތާރުކޮށް ހޯދާ ބަލާ، ކުރެވޭ ކަމުގައި ނުވަތަ ލިޔެވޭ ލިޔުމެއްގައި ކުށެއް އެކުލެވިގެން ނުވާކަނަށް ޔަގީން ކުރަންޖެހޭ ކަންކަމެވެ. މިގޮތުން އެންމެ ބޮޑަށް ފާހަގަ ކޮށްލަޖެހެނީ، ﷲ ތައާލާގެ ކަލާމްފުޅުން އާޔަތްތައް ނަަކަލް ކޮށްގެން، ކިޔުމާއި އަދި ލިޔުމުގައިވެސް ދޭން ޖެހޭ ސަމާލުކަމާއި، އެކަމަށް ބަހައްޓަންޖެހޭ ޚާއްސަ ފަރުވާތެރިކަމެވެ.

މިގޮތުން ދާދިފަހުން ގިނަބައެއްގެ ފާޑުކިއުން އަމާޒުވެ، އަދި އަނެއްބަޔަކު ޝައްކުގެ ނަޒަރަކުން ދުށް އެއްކަމަކީ، ރާއްޖޭގެ ސްކޫލުތަކުގައި ކިޔަވައިދޭ އިސްލާމް ފޮތްތަކުގައި ކީރިތި ޤުރުއާނުގެ އާޔަތްތައް ނުބައިކޮށް ލިޔެފައިވާ މައްސަލައެެވެ. މިމައްސަލާގެ ދީނީ އިލްމުވެރިންނާ އަދި އެނޫން އެތައް ބަޔަކުވެސް ވަނީ އެޑިއުކޭޝަން މިނިސްޓްރީއަށް ބޮޑެތި ފާޑިކިޔުންތަކެއް އަމާޒު ކޮށްފައެވެ.

ފޮތްތަކުގައި ޤުރުއާނުގެ އާޔަތްތައް ނުބައިކޮށް، ލިޔެފައި ހުރިކަން ކަމާއިބެހޭ ފަރާތްތަކުގެ ސަމާލުކަމަށް އެންމެ ފުރަތަމަ ގެނެސްދެއްވީ ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދުއެވެ. ގްރޭޑްތަކުގެ އިސްލާމް ފޮތްތަކުގެ ތެރެއިން ގްރޭޑް1، 2، 10 އަދި ގްރޭޑް 12 ގެ އިސްލާމް ފޮތުގައި ލިޔެފައިވާ ޤުރުއާނުގެ ބައެއް އާޔަތްތައް ހުރީ ނުބައިކޮށް ލިޔެފައެވެ.

ފޮތްތަކުގައި ކީރިތި ޤުރުއާންގެ އާޔަތްތައް ނުބައިކޮށް ލިޔެވިފައި ހުރިހުރުން ސިޔާސީ ފަރާތްތަކުގެ އިތުރުން، ދީނީ އިލްމުވެރިންވެސް ފާހަގަ ކުރީ ވެގެން ނުވާނެ ކަމެއްގެ ގޮތުގައެވެ. މިގޮތުން މިކަންބޮޑުވުންތައް ފާޅުކޮށް، ދީނީ އިލްމުވެރިއެއްކަމުގައިވާ، ޝައިޚު މަންސޫރު ވިދާޅުވީ ޤުރުއާން އަދި އިސްލާމް، ފޮތްތަކުގައި އާޔަތްތައް އޮޅޭގޮތައް ލިޔެ ޗާޕްކޮށްފައިވުން، މިއީ އިންތިހާއަށް ފަރުވާކުޑަކޮށްލުމެއް ކަމަށެވެ. އަދި މިއީ ދީނުގެ ހައިބަތާއި ގަދަރުކުޑަކޮށްލުން ކަމަށާއި، މިކަމުގައި އިހުމާލުވި މީހުން ހޯދާ ފިޔަވަޅުއަޅަންޖެހޭކަމަށެވެ. އަދި ވީހާ އަވަހަކަށް ފޮތްތައް އިސްލާހު ކޮށްދެއްވުމަށް އޭނާ ގޮވާލެއްވިއެވެ.

އަދި ހަމަ އެއާއެކު މިކަމުގެ ކަންބޮޑުވުން ފާޅުކޮށް ރައްޔިތުންގެ މަޖިލިހުގެ ކުރީގެ މެމްބަރު އަދި ދީނީ ޢިލްމުވެރިއެއްކަމުގައިވާ، އަނާރާ ނަޢީމްވެސް ވަނީ މިކަމުގަ އިހުމާލްވި ފަރާތްތަކާމެދު ފިޔަވަޅު އެޅުއްވުމަށްވެސް ގޮވާލައްވާފައެވެ. އަނާރާ ނައީމް ވިދާޅުވީ ޤުރުއާންލިޔެ ޗާޕުކުރާއިރު އެކަމާ ޙަވާލުވެތިބޭ ފަރާތްތަކުން، ކުށެއް ނެތްކަން ޔަޤީންކުރަންޖެހޭކަމަށެވެ.

މިއީ ދެން ހާދަ ދެރަކަމެކޭ. ޤުރުއާންލިޔެ ޗާޕުކުރާއިރު އެކަމާ ޙަވާލުވެތިބޭ ފަރާތްތަކުން، ކުށެއް ނެތްކަން ޔަޤީންކުރަންޖެހޭ.

– އަނާރާ ވިދާޅުވިއެވެ.

ހަމަ އެފަދައިން މިކަމުގެ ކަންބޮޑުވުން ފާޅުކޮށް، ފްރޮފެސަރ އުގައިލް ވަނީ މުޅިން ތަފާތު މޭރުމަކުން މިމައްސަލާގައި ޝުއޫރު ފާޅު ކުރައްވާފައެވެ. އުގައިލް ވިދާޅުވެފައިވަނީ، ރާއްޖޭގައި ތައުލީމް ހާސިލް ކުރަމުންދާ ދިވެހި ދަރިވަރުންގެ އިސްލާމީ އަޤީދާ ފާސިގު ކުރަމުންދާ ކަމުގެ ސާފު ހެކި ފެންނަމުންދާކަމުގައެވެ.

މިއީ ދިވެހި ފަސްގަނޑަށް އުފަން ދިވެހި ދަރިއެއްގެ ހައިސިއްޔަތުން ރައްދުކުރާ ޝުޢޫރެކެވެ. ތަޢުލީމު ދިނުމުގެ ނަމުގައި ދިވެހި ކުދި ދަރީންގެ އިސްލާމީ އަޤީދާ ފާސިދުކުރަމުން ދާކަމުގެ ސާފު ހެކިތައް ފެންނަމުން އެބަ ދެއެވެ. އެއްވެސް ހާލެއްގައި އެ ކަމަށް ތަންދެވިގެނެއް އެ ކަމަށް ތަންދެވިގެނެއް ނުވާނެއެވެ. އޭގެ ސަބަބުން ޖީލުތައް ހަލާކުވާނެއެވެ. ރާއްޖޭގައި އިތުރު ހަމަނުޖެހުންތައް އުފެދޭނެއެވެ. ނަތީޖާއަކަށް ވާނީ، ދިވެހި ގައުމު ޖަހައިގަތުމަށް ފާރަލާ ބަޔަކަށް އެ ކަމުގެ ދޮރުތައް އޭގެ ތަންމިނަށް ހުޅުވުމެވެ. ރައްކާވެތިއްޔާ ދަތުރެވެ.

– އުގައިލް ވިދާޅުވިއެވެ.

އާދައިގެ ކަމެއްގެ ގޮތުގައި ބަލައި ނުގަނެ ފިޔަވަޅު އަޅުއްވަންޖެހޭ!

ބައެއް ގްރޭޑްތަކުގައި އިސްލާމް ފޮތާއި ޤުރުޢާން ފޮތްތަކުގައި ޤުރުއާނުގެ އާޔަތްތައް ނުބައިކޮށް ޕްރިންޓްވެފައިވާ ކަން އެޑިއުކޭޝަން މިނިސްޓްރީގެ ސަމާލުކަމަށް އައުމާއެކު، އެޑިއުކޭޝަން މިނިސްޓްރީން ވަނީ ބައެއް ފިޔަވަޅުތައް އަޅުއްވާފައެވެ. މީގެތެރޭގައި، މިފޮތްތައް ބޭނުން ނުކޮށް، އިސްލާހު ކުރުމުގެ މަސައްކަތް ވަގުތުން ފައްޓަވާފައިވެއެވެ. އަދި ހަމަ އެއާއެކު، ނޭޝަނަލް އިންސްޓިޓިއުޓު އޮފް އެޑިއުކޭޝަންގެ ބޭފުޅުން ނުހިމެނޭ މިނިވަން ފަންނީ ޓީމަކުން އިސްލާމް ފޮތާއި ޤުރުއާން މާއްދާގެ ހުރިހާ ފޮތްތަކެއް ރިވިއު ކުރުމުގެ މަސައްކަތް ފަށާފައިވާ ކަންވެސް އެއިންސްޓިޓިއުޓުން ހާމަކޮށްފައި ވެއެވެ.

އަދި މީގެއިތުރުން، ބައެއް ގްރޭޑްތަކުގައި އިސްލާމް ފޮތާއި ޤުރުޢާން ފޮތްތަކުގައި ޤުރުއާނުގެ އާޔަތްތައް ނުބައިކޮށް ޕްރިންޓްވެފައިވާ މައްސަލައިގައި އިޙުމާލުވި ފަރާތްތައް ހޯދައި، ފިޔަވަޅު އަޅުއްވާނޭކަމަށްވެސް މިނިސްޓަރ އޮފް އެޑިއުކޭޝަން ޑރ،އައިޝަތު އަލީ ވަނީ ވިދާޅުވެފައެވެ.

އެހެންނަމަވެސް މިނިސްޓްރީން ބުނެފައިވަނީ، މިފޮތްތަކަކީ ޕްރިންޓު ކުރުމުގެ ކުރިން އެޑިއުކޭޝަން މިނިސްޓްރީއާއި އެންއައިއީ އާއި މިނިސްޓްރީ އޮފް އިސްލާމިކް އެފެއާޒުން ބަލާ ޗެކްކޮށްފައިވާ ފޮތްތަކެއް ކަމަށާއި،  އެހެންކަމުން މިމައްސަލަ ދިމާވި ސަބަބު ދެނެގަތުމުގެ މަސައްކަތްވެސް ކުރަމުން އަންނަ ކަމަށެވެ.

މިމައްސަލާގައި އިހުމާލްވި ފަރާތްތައް ހޯދާ އަޅުއްވަންޖެހޭ ފިޔަވަޅުތައް އަޅުއްވާނޭކަމަށް އެޑިއުކޭޝަން މިނިސްރ ވިދާޅުވެފައިވާއިރު، މިގޮތުން ފޮތްތަކުގައި މައްސަލަ ހުރުމަކީ އަަބަދުވެސް ދިމާވާ ކަމެއްކަމަށްވެސް އެޑިއުކޭޝަން މިނިސްޓަރވަނީ ވިދާޅުވެފައެވެ. އަދި މިނިސްޓަރވަނީ މިކަން ސިޔާސީ ކަމަކަށް ހަދައި، ހަގީގަތް އޮޅޭގޮތަށް ވާހަކަ ދެއްކުމަކީ ބަލައިގަނެވޭނެ ކަމެއްނޫންކަމަށާއި، ތައުލީމީ ކަންކަމަށް ބެލެނިވެރިންގެ އިތުބާރު ގެއްލޭފަދަ ކަންކަން ކުރުމުން އެފަދަ ކަންކަމުގެ ނޭދެވޭ އަސަރު އަންނަން އޮތް ޖީލުތަކަށް ދެމިގެންދާނެ ކަމަށް ވިދާޅުވެފައެވެ. މިގޮތުން ތައުލީމަކީ ސިޔާސީ ކަންކަމެއް ނޫންކަމަށްވެސް މިނިސްޓަރ ޑރ. އައިޝަތު އަލީ ވިދާޅުވެފައި ވެއެވެ.

އެހެންނަމަވެސް ގަބޫލުކުރަން ޖެހޭ އެންމެ މުހިންމު އެއް ހަގީގަތަކީ، އެޑިއުކޭޝަން މިނިސްރީން ތައްޔާރު ކުރި ބައެއް ފޮތްތަކުގައި ހުރީ އާދައިގެ ކުށްތަކެއް ނޫންކެމެވެ. އަދި ކުށްހުރީ އެންމެ ފޮތެއްގައިވެސް ނޫންކަމެވެ. އަދި އަމުދުން ކުށް ޖެހިފައިވަނީ، ފޮތްތައް ބަލަ ދިރާސާކޮށް، ޕްރޫފް ރީޑްވެސް ކޮށްފައިވާ ބައެއްގެ އަތްމަތިން ކައްސާލައިގެން ގޮސްގެންވާނޭ ކަންކަމުގައިވެސް ނޫންކަމެވެ.

މިގޮތުން، ކުށް ލިޔެވިފައިވަނީ، ކޮންމެ ސަބަބަކާ ހުރެ ނަމަވެސް، ފޮތްތަކުގައި ކީރި ޤުރުއާންގެ އެތަކެއް އާޔަތްތަކެއްގައި ކުށް ހުރުމުން، މި ފޮތްތައް ތައްޔާރު ކުރުމުގައި ބޮޑެތި އިހުމާލްތަކެއް ހުރިކަމަށް ގަބޫލު ކުރަންޖެހެއެވެ. އަދި މި ކުށްތަކަކީ، ގުރުއާންގެ އާޔްތަތައް ނަކަލް ކުރުމުގައި ޖެހިފައި ހުރި ކުށްތަކަކަކަށް ވާތީ، މިކަން ބަލައިގަންނަންވެސް ގިނަބަޔަކަށް ދަތިވާނެ ކަންވެސް ގަބޫލުރަން ޖެހެއެވެ.

އެހެންކަމުން، ދިވެހިރާއްޖޭގައި ފޮތްތައް ލިޔެ، "ޕްރޫފް ރީޑް"ކޮށް އަދި ޗާޕުކުރުމުގެ މަރުހަލާގައި އިންތިހާއަށް ދޯދިޔާކަން ހުރިކަން މިއަދު މިއީ އެއްވެސް އޮޅުމެއް ނެތް ގޮތުގައި އެގި ކަށަވަރުވާ ހަގީގަތެކެވެ. މިއީ، އިތުރުވަގުތު ނަގާ ނުލާ، ޔަގީންކަން އޮތް ފުރިހަމަ ނިޒާމެއްގެ ތެރެއިން ހިގާ މަރުހަލާތަކެއްކަން ޔަގީންކޮށް، އަދި އެމަރުހަލާއަށް އާންމުންގެ އިތުބާރު ހޯދުމަށްޓަކާއި، މިގޮތުން އެކަށައަޅާ އުސޫލުތައް އާންމުކުރުމާއެކު، ތައުލީމީ ނިޒާމުގެ ތެރޭގައި ހައްލު ކުރަން ޖެހިފައިއޮތް ބޮޑު މައްސަލައެއް ކަމީވެސް ކަށަވަރުވެ ޔަގީންވާ ކަމެކެވެ.