އަފްއާނިސްތާނުގެ ކާބުލްގައި ހުންނަ، އެމެރިކާގެ ކުރީގެ އެމްބަސީއަށް ވަންނަން ހުންނަ ދޮރާށީގައި، ތާލިބާން ޖަމާއަތުގެ ބޮޑު ދިދައެއްގެ ކުރަހައިފިއެވެ.
މިހާރު ސޯޝަލް މީޑިއާގައި ދައުރުވަމުންދާ ފޮޓޯތަކުން ފެންނަ ގޮތުގައި، ތާލިބާން ޖަމާ އާއަތުގެ ދިދައިގެ ބިޔަ ކުރެހުން ކުރަހާފައިވަނީ، އެމްބަސީއަށް ވަންނަން ހުންނަ އެންމެ ބޮޑު ގޭޓުގައެވެ.
އެމެރިކާގެ ތާރީޚުގައި އެގައުމުން ކޮށްފައިވާ އެންމެ ދިގުލައިގެންދިޔަ ހަގުރާމާގައި، އެމެރިކާގެ 2،500 މަރުވެ، އަފާނިސްތާނުގެ 240،000 މީހުން މަރުވެފައިވާއިރު، މި ހަގުރާމައަށް އެމެރިކާއުން 2 ޓްރިލިއަން ޑޮލަރުވަނީ ޚަރަދު ކޮށްފައެވެ.
2001ވަނަ އަހަރު އެމެރިކާއަށް ދިން ޓެރަރިސްޓު ހަމަލާއަށްފަހު، އެމެރިކާއިން އަފްއާނިސްތާނަށް އަރާ، އޭރު އެގައުމުގައި އޮތް ތާލިބާން ޖަމާއަތުގެ ވެރިކަން ބަދަލުކޮށް، ހުޅަގުގެ ގައުމުތަކުން ތާއީދުކުރާ ވެރިކަމެއް އެގައުމުގައި ގާއިމް ކުރިތާ 20 އަހަރު ފަހުން ތާލިބާން ޖަމާއަތް އަނެއްކާވެސް އަލުން އެގައުމުގެ ވެރިކަމަށް އައިއިރު، 1996 އިން 2001 އާއި ދެމެދު އެޖަމާއަތުން އެގައުމުގައި ކޮންޓްރޯލްކުރި ސަރަހައްދުތަކަަށް ވުރެ ބޮޑު ސަރަހައްދެއް ކޮންޓްރޯލްކޮށް، އަދި އެންމެފަހުން މިހާރު މުޅި އަފްއާނިސްތާން މިވަނީ ތާލިބާން ޖަމާއަތުގެ ބާރުގެދަށަށް އައިސްފައެވެ.
ފާއިތުވެދިޔަ އޮގަސްޓުމަހުގެ 31 ވަނަ ދުވަހު، އެމެރިކާއިންވަނީ، އަފްއާނިސްތާނުގައި ހުރި އެގައުމުގެ އެންބަސީ ބަންދުކޮށް، އެ އެމްބަސީގައި ކުރަމުންއައި ހުރިހާ މަސައްކަތްތަކެއް ޤަތަރަށް ބަދަލު ކޮށްފައެވެ.
