ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އަދި އެމަނިކުފާނުގެ ސަރުކާރުން ޝަރީޢަތަށް ނުފޫޒު ފޯރުވުމުގެ އެއްވެސް ޢަމަލެއް ހިންގަވާފައި ނުވާނެކަމުގެ ފުރިހަމަ ޔަޤީންކަން އަރުވާކަމަށް ވެރިކަން ކުރާ މައި ޕާޓީ، އެމްޑީޕީން ބުނެފިއެވެ.
4 ސެޕްޓެމްބަރ 2021 ދުވަހު، ކުރީގެ ބައެއް ފަނޑިޔާރުންނާއި އަދި ބައެއް ޤާނޫނީ ވަކީލުން ބޭއްވި ޕްރެސް ކޮންފަރެންސެއްގައި ދައްކާފައިހުރި ވާހަކަތަކަކީ ނުހަނު ކަންބޮޑުވާ ވާހަކަތަކެއްކަމުގައި އެމްޑީޕީން ވަނީ ބުނެފައެވެ. ކުރީގެ ރައީސް، ރައީސް ޢަބްދުﷲ ޔާމީން ޢަބްދުލްޤައްޔޫމުގެ ޝަރީޢަތުގެ ކަންކަން ހިނގައި ދިޔަގޮތް ކަމަށް ބުނެ ދައްކާފައިވާ ވާހަކަތަކަކީ އެއްވެސް އަސާސެއްގެ މައްޗަށް ދައްކާފައިވާ ވާހަކަތަކެއް ނޫންކަން ސާފުވާކަމަށާއި، އެ ޕްރެސް ކޮންފަރެންސްގައި ދެއްކި ވާހަކަތައް ރައްދުވި އެއިރުގެ އެހެން ފަނޑިޔާރުން ވަނީ އެވާހަކަތައް މީޑިޔާގައި ދޮގުކޮށްފައިކަމަށެވެ. އަދި އެ ވާހަކަތައް ރައްދުވި މިހާރު ފަނޑިޔާރުކަމުގެ މަޤާމުގައި ތިއްބެވި ފަނޑިޔާރުންވެސް ވަނީ އެވާހަކަތައް ދޮގުކުރައްވާފައިވާކަމަށެވެ.
އެ ޕްރެސް ކޮންފަރެންސްގައި ވާހަކަދެއްކެވި ބައެއް ފަނޑިޔާރުންނަކީ އެބޭފުޅުންގެ ސުލޫކީ މައްސަލަތައް ޖުޑީޝަލް ސަރވިސް ކޮމިޝަނަށް ސާބިތުވެ ފަނޑިޔާރުކަމުން ވަކިކުރުމަށް އެކޮމިޝަނުން ނިންމައި ރައްޔިތުންގެ މަޖިލީހަށް އެ ފަނޑިޔާރުން ވަކިކުރުމުގެ މައްސަލަ ފޮނުވުމުން މަޤާމުން އިސްތިއުފާ ދެއްވާފައި ތިއްބެވި ބޭފުޅުންކަމަށް އެމްޑީޕީން ބުނެފައިވެއެވެ. އަދި ޕްރެސް ކޮންފަރެންސްގެ ހަމައެކަނި މަޤްޞަދަކީ ރައީސް ޢަބްދުﷲ ޔާމީން ޢަބްދުލް ޤައްޔޫމުގެ ޝަރީޢަތަކީ އިތުބާރު ހިފޭ ގޮތަށް ހިންގާފައިވާ ޝަރީޢަތެއް ނޫންކަން ރައްޔިތުންނަށް ދެއްކުމަށް މަސައްކަތްކުރުމެވެ. އަދި މަތީ މަރުހަލާގެ ކޯޓުތަކަށް ކަމުގެ ޙަޤީޤަތް އޮޅުވާލައި އެކޯޓުތަކަށް ނުފޫޒު ފޯރުވުމަށް މަސައްކަތްކުރުންކަމަށް ވަނީ ބުނެފައެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އަދި އެމަނިކުފާނުގެ ސަރުކާރުން ޝަރީޢަތަށް ނުފޫޒު ފޯރުވުމުގެ އެއްވެސް ޢަމަލެއް ހިންގަވާފައި ނުވާނެކަމުގެ ފުރިހަމަ ޔަޤީންކަން އަރުވަން. ސަރުކާރުގެ އިސް ފަރާތަކާއި ފަނޑިޔާރުންތަކަކާ ދެމެދު ދެކެވިފައިހުރި ވާހަކަތަކެއް ކަމަށް ބުނެ ސޯޝަލް މީޑިޔާގައި ދައުރުވަމުންދާ އޯޑިޔޯތަކެއްގެ މައްސަލައިގައި ހިމެނޭ ކަމަށް ޝައްކު ކުރެވޭ ފަނޑިޔާރުންގެ މައްސަލައިގެ ތަޙްޤީޤު އަންނަނީ ޖުޑީޝަލް ސަރވިސް ކޮމިޝަނުން ކުރަމުން. އަދި އެ މައްސަލައިގައި ހިމެނޭ ހުރިހާ ފަރާތެއްގެ ފޮރެންސިކް ތަޙްޤީޤު ހިންގުމަށް މޯލްޑިވްސް ޕޮލިސް ސަރވިސް އަށް ޖުޑީޝަލް ސަރވިސް ކޮމިޝަނުން ހުށަހަޅާފައިވާކަންވެސް ފާހަގަކުރަން.
– އެމްޑީޕީ ބަޔާނުގައިވެއެވެ.
އެމްޑީޕީން ބުނެފައިވަނީ ޝަރީޢަތަށާއި ފަނޑިޔާރުންނަށް ނުފޫޒު ފޯރުވުމަށް އެއްވެސް ފަރާތަކުން ހިންގާ ދަށުދަރަޖައިގެ އެ ޢަމަލުތަކަކީ ސީރިއަސް މައްސަލަތަކެއްގެ ގޮތުގައި އަބަދުމެ ދެކޭނޭ މައްސަލަތަކެއްކަމަށާއި، އަދި އެފަދަ ޢަމަލުތަކަކީ އެމްޑީޕީން ޓޮލަރޭޓް ކުރާނޭ ޢަމަލުތަކެއް ނޫނެން ކަމަށް ވަނީ ބުނެފައެވެ.
