ތާލިބާން ޖަމާއަތުން އަފްއާނިސްތާނުގައި އެކުލަވާލާ ސަރުކާރުގެ ވެރިޔަކަށް ހުންނަވާނީ، އެ ޖަމާއަތުގެ އެއް ބާނީ، އަދި ސިޔާސީ އޮފީހުގެ އެންމެ އިސްވެރިއެއްގެ ގޮތުގައި ހުންނެވި މުއްލާ ބަރާދަރު ކަމުގައި، އެޖަމާއަތުން މިހާރު އެކުލަވާލަމުންދާ ސަރުކާރުގެ މައުލޫމާތު އެގިހުރި ފަރާތްތަކާ ހަވާލާދީ ބައެއް މީޑިއާތަކުން ރިޕޯޓު ކޮށްފިއެވެ.
އަދި މީޑިއާ ރިޕޯޓުތައް ބުނާ ގޮތުގައި، ތާލިބާން ސަރުކާރުގެ އެންމެ އިސް މަގާމްތައް ފުރާނޭ މީހުންގެ ތެރޭގައި، އެ ޖަމާއަތުގެ އެއް ބާނީ ކަމުގައިވާ މުއްލާ އުމަރުގެ ދަރިފުޅު މުއްލާ މުހައްމަދު ޔައުގޫބާއި، ޝެރު މުހައްމަދު އައްބާސް ސްޓަނެޒާއީވެސް ހިމެނިވަޑައި ގަންނަވައެވެ.
ބައެއް މީޑިއާތަކުން ރިޕޯޓު ކޮށްފައިވާ ގޮތުގައި، މީގެ ކުރިން، އަފްއާނިސްތާނުގެ އެކި ސިޔާސީ ފިކުރުތަކަށް ނިސްބަތްވާ ސަރުކާރެއް އެކުލަވާލާނެކަމަށް ތާލިބާން ޖަމާއަތުން ބުނެފައިވި ނަމަވެސް، މިހާރު އެޖަމާއަތުން އިސްކަން ދެމުންދަނީ، ހަމަ އެކަނި އެޖަމާއަތުގެ ވެރިކަމެއް އެކުލަވާލުމަށެވެ.
މިގޮތުން އުފައްދާ ސަރުކާރުގައި 25 ވުޒާރާއެއް ހިމެނޭއިރު، 12 ދީނީ ޢިލްމުވެރިންގެ މައްޗަށް އެކުލެވޭ މަޝްވަރާ މަޖިލީހެއް ތާލިބާން ޖަމާއަތުން އުފައްދާ ސަރުކާރުގައި އޮންނާނޭކަމަށްވެސް ބައެއް މީޑިއާތަކުން ވަނީ ރިޕޯޓު ކޮށްފައެވެ.
މުއްލާ ބަރާދަރުއަކީ، 1994 ވަނަ އަހަރު، މުއްލާ އުމަރުއާއެކު، ތާލިބާން ޖަމާއަތް އުފެއްދި އެއް ބާނީއެވެ.
މުއްލާ ބަރާދަރު ޕާކިސްތާނުގައި ދިރިއުޅުއްވަމުން ގެންދަވަނިކޮށް، 2010 ވަނަ އަހަރު އޭނާވަނީ ހައްޔަރުކުރެވިފައެވެ. އަދި އެއަށްފަހު ޖަލުގައި ބަންދުކުރެވި، އެހެންނަމަވެސް އޭނާ މިނިވަން ވެފައިވަނީ 2018ވަނަ އަހަރުއެވެ.
މުއްލާ ބަރާދަރުއަކީ، ތާލިބާން ޖަމާއަތުގެ ބާނީ މުއްލާ އުމަރު އަމިއްލަ ގޮތުން އޭނާގެ ނާއިބުކަން އޭރު ދެއްވި، މިހާރު ދުނިޔޭގައި ހުރިހާ އެ ޖަމާއަތުގެ އެންމެ އިސް ފަރާތެވެ.
