ވެރިކަން ކުރާ އެމްޑީޕީގެ އޮފީހަކީ ކަނބަލުންނަށް ރައްކާތެރި މާހައުލަކަށް ހެދުމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ގޮވާލައްވައިފިއެވެ.

ޝިޔާމް މިގޮތަށް ވިދާޅުވީ މިއަދު މެންދުރު އެޕާޓީގެ އިދާރީ ކަންކަން ބެލހެއްޓުމުގައި އެންމެ އިސްކޮށް ހަރަކާތްތެރިވާ ގަލޮޅު ދެކުނު ދާއިރާގެ މެމްބަރު މީކާއިލް ނަސީމުގެ މަންމަ މަރިޔަމް ޒުބައިރު (މަންދީ)ގެ ބޯ ޗޭނު ގަނޑަކުން ޖަހައި ފަޅާލައި މާރާ މާރީ ހިންގުމާއި ގުޅިގެންނެވެ. ޝިޔާމް ވިދާޅުވީ އެމްޑީޕީއަކީ ޑިމޮކްރަސީ ފައްކާވެފައިވާ ޕާޓީއެއްކަމަށް ހީކުރެވުނު ނަމަވެސް އެކަން މިހާރު ފެންނަނީ އެހެން ގޮތަކަށް ކަމުގައެވެ.

މަންދީއަކީ ސިޔަސީ ގޮތުން ހަރަކާތްތެރި ހިތްވަރު ގަދަ ކަނބަލަކަށްވާއިރު، މިފަދަ އަމަލުތަކަކީ ބަލައި ގަނެވޭނެ އަމަލުތަކެއް ނޫންކަމަށް ޝިޔާމް ވިދާޅުވިއެވެ. އޭނާ ވަނީ މިހަމަލާ ހަރުކަށި އިބާރާތުން ކުށްވެރި ކުރައްވާފައެވެ.

އަޅުގަނޑު ހީކުރީ އެމްޑީޕީ އޮތީ ޑިމޮކްރަސީއަށް ދޮންވެ ފައްކާ ވެފައިކަމަށް. މަންދީ ޒުބައިރަކީ ސިޔާސީ ގޮތުން ހަރަކާތްތެރި ހިތްވަރުގަދަ ކަނބަލެއް. މި ފިނޑި އަމަލު ހަރުކަށި އިބާރާތުން ކުއްވެރިކުރަން. އެމްޑީޕީ އޮފީހަކީ ކަނބަލުންނަށް ރައްކާތެރި މާހައުލަކަށް ހައްދަވަން ގޮވާލަން.

– ޝިޔާމް ވިދާޅުވިއެވެ.

ފުލުހުންގެ މީޑިއާ އޮފިޝަލް ވަނީ މިއަދު މެންދުރުގެ ވަގުތެއްގައި އެ އޮފީސް ތެރޭގައި މާރާމާރީއެއް ހިންގައިގެން ފުލުހުންނަށް ރިޕޯޓްކޮށްފައިވާ ކަމަށް ވިދާޅުވެފައެވެ. ފުލުހުންގެ މީޑިއާ އޮފިޝަލް ވިދާޅުވީ، އެ އޮފީސް ތެރޭގައި މާރާމާރީއެއް ހިންގި ކަމުގެ މައުލޫމާތު މިއަދު މެންދުރު 12:30 ހާއިރު ފުލުހުންނަށް ލިބިފައިވާ ކަމަށެވެ.

މަންދީއަކީ އެމްޑީޕީގެ އިދާރީ ކަންކަން ފެށުނީސުރެއް ބެލެހެއްޓުމުގައި އެންމެ އިސްކޮށް ހަރަކާތްތެރިވާ އެއްބޭފުޅާއެވެ. އެމްޑީޕީ އޮފީސް ތެރޭގައި މާރާމާރީ ހިންގާފައިވާއިރު، އެޕާޓީން ތައްޔާރުވަމުންދަނީ މިމަހުގެ 25 ވަނަ ދުވަހު ޤައުމީ މަޖިލީހުގެ އިންތިޚާބު ބޭއްވުމަށެވެ. މި އިންތިޚާބުގައި ރައީސް ޞާލިހުއާއި، ރައީސް ނަޝީދުގެ ވާދަވެރިކަން ބޮޑުވެ ދެބޭފުޅުނަށް ތާއީދު ކުރައްވާ ބޭފުޅުން ގެންދަވަނީ ވަރަށް ވަރުގަދައަށް ކެމްޕެއިން ކުރައްވަމުންނެވެ.