ދިގު މުއްދަތެއް ވަންދެން އާލާސް ކަންފުޅުގައި އުޅުއްވުމަށްފަހު، އިންޑިއާގެ ބާރުގެ ދަށުގައި އޮންނަ ކަޝްމީރުގެ މިނިވަންކަމަށް ޖިހާދު ކުރަމުންއައި، މަޝްހޫރު ހަގުރާމަވެރި ލީޑަރު، ސައިދު އަލީ ޝާހު ގިނާލީ އުމުރުން 92 އަހަރުގެ ނިޔާވެއްޖެއެވެ.
ފާއިތުވި އަހަރުގެ ޖޫން މަހުން ފެށިގެން ސިޔާސީ ކަންކަމުން ދުރަށް ވަޑައިގެންފައިވާ ގިލާނީ ނިޔާވެފައިވަނީ، ކަޝްމީރުގެ މައި ސިޓީ ކަމުގައިވާ ސްރިނަގަރުގައި ހުންނަ އޭނާގެ އަމިއްލަ ގޭގައެވެ. ގިލާނީ އަކީ، ކަޝްމީރުގައި އިންޑިއާގެ ވެރިކަމާ ދެކޮޅު ހަދަމުން އަންނަ، އަދި ކަޝްމީރު އެކީ ޕާކިސްތާނުގެ ދަށަށް ގެންދިއުމަށް ތާޢީދު ކުރާ، އަދި ހަރުކަށި ސިޔާސަތުތަކަށް ތާއީދުކުރާ އިއްތިހާދެއް ކަމުގައިވާ އޯލް ޕާޓީސް ހަރިޔަތު ކޮންފަރެންސް (APHC) ގެ އިސް ލީޑަރެވެ.
އަދި އޭނާވަނީ، ފާއިތުވެދިޔަ ދިގު މުއްދަތުގައި، އިންޑިއާގެ ބާރުގެ ދަށުގައި އޮންނަ ކަޝްމީރުގެ މިނިވަންކަމާ ގުޅޭގޮތުން އިންޑިއާގެ ސަރުކާރާއެކީ އެއްވެސް މަޝްވަރާއަކަށް ދިއުމަށް ދެކޮޅު ހައްދަވާފައެވެ.
އިންޑިއާގެ ގާނޫނު އަސާސީން، އިންޑިއާ ސަރަހައްދުގައި އޮންނަ ކަޝްމީރަށް ލިބިދީފައި އޮންނަ ޒާތީ މިނިވަންކަން ހިމާޔަތް ކުރާ 370ވަނަ މާއްދާ، އެގައުމުގައި މިހާރު އޮތް ހިންދޫންގެ ހައްދު ފަހަނައަޅާފައިވާ މޯޑީގެ ސަރުކާރުން، 2019ވަނަ އަހަރުގެ އޮގްސްޓް މަހުގެ 5 ވަނަ ދުވަހުން ފެށިގެން އުވާލިފަހުން، ގިލާނީ، އާލާސްކަންފުޅާ އުޅުވަން ޖެހިވަޑައިގެންފައި ވާތީ ގިލާނީ އުޅުއްވަފައިވަނީ، ބޭރަށް ވަޑައިނުގެން އަމިއްލަފުޅު ގޭގައެވެ.
އެހެންނަމަވެސް، އޭނާގެ އާއިލާއިން މައުލޫމާތު ދީފައިވާ ގޮތުގައި، ގިނާނީ އާލާސްކަންފުޅާ އުޅުއްވާތާ އެތައް ދުވަހެއް ފާއިތުވެގެން ދިޔަ ނަމަވެސް، އިންޑިއާ ސަރުކާރާ ދެކޮޅަށް ކުރިޔަށްދާ މުޒާހިރާތަކުގައި އޭނާ އިސްކޮށް ހަރަކާތްތެރިވާތީ، ފާއިތުވި 12 އަހަރު އޭނާ ހުންނެވީ ގޭގައި ބަންދު ކޮށްފައި ކަމުގައެވެ.
ގިލާނީ ނިޔާވުމުގެ ޚަބަރު އާންމު ވުމާއެކު، އިންޑިއާސިފައިންގެ ފައުޖުތައްވަނީ، ރަޔަޓު ގިޔަރުގައި އޭނާގެ ގޭގެ ވަށައިގެން ފޯރިމަރަން ފަށާފައެވެ. އަދި ސްރީނަގަރު އެތައް ސަރަހައްދެގައި މަގު ހުރަސްތައް ބަހައްޓާ، އަދި ސިޓީ އެތައް ހިސާބަކުންވަނީ އިންޓަރނެޓްގެ ޚިދުމަތް ކަނޑާލާފައެވެ.
އަދި އެސަރަހައްދުގެ ފުލުހުންގެ ފަރާތުން ބައެއް މީޑިއާތަކަށް މައުލޫމާތު ދީފައިވާ ގޮތުގައި، ގިލާނީގެ ޖަނާޒާގައި ބައިވެރިވުމުގެ ފުރުސަތު ދިނުމަށް ހަމަޖެހިފައިވަނީ އާއިލާގެ މެމްބަރުންނަށާއި އަދި ބައެއް އަވައްޓެރިންނަށް އެކަންޏެވެ.
Rest in peace, Syed Ali Shah Geelani.
You will remain an enduring icon of resistance to tyranny. pic.twitter.com/hhUjdPyHw3— Mirza Waheed (@MirzaWaheed) September 1, 2021
ގިލާނީ ނިޔާުވުމާ ގުޅިގެން އެތައްބަޔަކު ދަނީ ހިތާމަ ފާޅުކޮށް އޭނާގެ އައިލާއަށް ތައުޒިޔާ އަރިސްކުރަމުންނެވެ. މިގޮތުން ޕާކިސްތާނުގެ ބޮޑުވަޒީރު އިމްރާން ޚާންވަނީ ގިލާނީއަށް އިހުތިރާމް އަދާކޮށް، އަދި އޭނާ ނިޔާވުމުގެ ހިތާމައިގައި ޕާކިސްތާނުގައި އެއްދުވަސް ވަންދެން ހިތާމަ ފާޅުކުރުމަށް ނިންމާފައެވެ.
