ރިހިވެލި ރިޒޯޓަށް އަރައި ހަމަނުޖެހުން ނުހިންގާ ކަމަށާއި، ގާނޫނާ ހިލާފަށް އެ ރަށުގައި ތިބީ ސޭވް ދަ ޑްރީމްގެ އިސް ފަރާތްތައް ކަމަށް އެ ރަށުގެ ލީޒް ހޯލްޑަރު މަހަލް ޓުއާސްއިން މިއަދު ބުނެފިއެވެ.
ރިހިވެލި ބީޗް ރިސޯޓުގެ ސަބްލީޒް އެގްރީމަންޓް ބާޠިލުކުރުމާއި ގުޅޭ ގޮތުން ދެންމެ މަހަލް ޓުއާސްއިން ނެރުނު ބަޔާނުގައި ބުނެފައިވަނީ 14 ސެޕްޓެމްބަރ 2020 ވަނަ ތާރީޚުގައި މިކުންފުނިން ރިހިވެލި ބީޗް ރިސޯޓުގެ ސަބްލީޒް އެގްރީމެންޓް ބާޠިލުކުރީ ރަނގަޅަށް ކަމަށް މިއަދު (31 އޯގަސްޓް 2021) ސިވިލް ކޯޓުން ވަނީ ކަނޑައަޅާފައި ކަމަށެވެ.
ރިހިވެލި ބީޗް ރިސޯޓު ސަބްލީޒް ކުރުމުގެ ގޮތުން "ސޭވް ދަ ޑްރީމް މޯލްޑިވްސް ޕްރައިވެޓް ލިމިޓެޑް" އާއެކު 8 މެއި 2018 ވަނަ ތާރީޚުގައި ކުންފުނިންވި އެއްބަސްވުން ބާޠިލުކުރި މައިގަނޑު އެއްސަބަބަކީ އެ އެއްބަސްވުމުގެ ދަށުން ދައްކަންޖެހޭ ހެޑްލީޒްރެންޓްއި ސަބްލީޒް ރެންޓު ނުދެއްކުން ކަމަށާއި، އެގޮތުން މިއަދާއި ހަމައަށް ހެޑްލީޒް ރެންޓުގެ ގޮތުގައި 323,188.79 ޔޫއެސް ޑޮލަރު (ތިންލައްކަ ތޭވީސްހާސް އެއްސަތޭކަ އަށްޑިހަ އަށް ޔޫއެސް ޑޮލަރު ހަތްދިހަނުވާ ސެންޓް) އަދި ސަބްލީޒް ރެންޓުގެ ގޮތުގައި 1,000,000.00 ޔޫއެސް ޑޮލަރު (އެއްމިލިޔަން ޔޫއެސް ޑޮލަރު) ވަނީ ނުދައްކާ ކަމަށެވެ.
ރަށުގެ ހެޑްލީޒް ރެންޓުނުދެއްކުމުން މީރާއިން ތަކުރާރުކޮށް ނޯޓިސްދެމުން ގޮސް މިހާރުވަނީ "ރެޑް ނޯޓިސް ފޮނުވާފަ. ރެންޓު ނުދެއްކުމުގެ އިތުރުން ސަބްލީޒް އެގްރީމެންޓް ބާޠިލުކުރި ސަބަބުތަކުގެ ތެރޭގައި އެރަށް ވީރާނާވެ، އިމާރާތްތަކާއި ޖެޓީފަދަ ތަންތަން ވެއްޓޭހިސާބަށްގޮސް، ނަރުދަމާއާއި އަލިފާންނިވާ ނިޒާމާއި އިންޝޯރެންސާއި ނުލައި ރަށް ހިންގުމާއި އަދި އެތަކެއް މަސްދުވަސް ވަންދެން ތަނުގެ މުވައްޒަފުންނަށް މުސާރަނުދިނުމާއި ރަށުގެ ތިމާވެށްޓަށް ނޭދެވޭ
އަސަރުކުރާ ފަދަ ގިނަގުނަ ކަންތައްތައް ކުރުންވެސް ހިމެނޭ.
– ބަޔާނުގައި ވެއެވެ.
ކުންފުނީގެ އަމާޒަކީ ވީހާވެސް އަވަހަށް ސަރުކާރުން ޤަބޫލުކުރާ މިންގަނޑަށް ރިހިވެލި ބީޗް ރިސޯޓުގެ ޢުމްރާނީޙާލަތު ބަދަލުކޮށް، ދައުލަތަށް ދައްކަންޖެހޭ ޓެސްކްއާއި ފީތައްދައްކާ އެރަށް އަވަހަށް ފަތުރުވެރިންނަށް ހުޅުވާލުންކަމަށް އެކުންފުނިން ބުނެފައެވެ.
