ކުށެއްގެ މައްސަލާގައި ތުހުމަތުކުރެވޭ ފަރާތްތަކާއެކު އިއުތިރާފްގެ އެއްބަސްވުން އެކުލަވާލުމާއި ބެހޭގޮތުން ބިލެއް ޑްރާފްޓްކޮށް ބަންޑާރަ ނާއިބުގެ އޮފީހަށް މިހަފްތާގެ ބުރާސްފަތީގައޮ ފޮނުއްވަން ތައްޔާރުވެފައިވާކަމަށް ޕްރޮސެކިއުޓަރ ޖެނެރަލް ޙުސައިން ޝަމީމް ވިދާޅުވެއްޖެއެވެ.

ރައްޔިތުންގެ މަޖިލީހުގެ ޖުޑީޝަރީ ކޮމިޓީގައި ވާހަކަފުލު ދައްކަވަމުން ޝަމީމް ވިދާޅުވީ، ޖިނާޢީ އިޖުރާޢަތުގެ ޤާނޫނުގައި ބަޔާންކުރާގޮތުގައި ކުށެއްގައި ތުހުމަތުކުރެވޭ މީހަކާއެކު އިއުތިރާފްގެ އެއްބަސްވުން އެކުލަވާލެވޭނެ ގޮތްތަކެއް އޮންނަކަމަށެވެ. އެގޮތުން އިއުތިރާފްގެ އެއްބަސްވުން އެކުލަވާލެވޭނީ ހަމައެކަނި ތަހުގީގީ މަރުހަލާގައި އެކަނިކަން ފާހަގަކުރައްވަމުން ޕީޖީ ޝަމީމް ވިދާޅުވީ، ޝަރީޢަތަށް މައްސަލަ ގެންދިއުމަށްފަހު އިއުތިރާފްގެ އެއްބަސްވުން އެކުލަވާލުމަށް މިހާރުގެ ޤާނޫނު އޮންނަގޮތުން ޖާގަނުދޭކަމަށެވެ. ނަމަވެސް އިއުތިރާފްގެ އެއްބަސްވުން އެކުލަވާލުމާއި ގުޅޭގޮތުން ޚާއްޞަ ޤާނޫނެއް ހެދުމަށް ބިލެއް ޑްރާފްޓްކުރަމުންދާކަމަށާއި، މިހަފްތާގެ ބުރާސްފަތި ދުވަހު އެ ބިލު ބަންޑާރަ ނާއިބުގެ އޮފީހަށް ފޮނުއްވާނެކަމަށްވެސް ޕީޖީ ޝަމީމް ވިދާޅުވިއެވެ.

ޝަރީއަތަށް މައްސަލަ ދިއުމަށްފަހު ނުވަތަ ތަހުގީގް މަރުހަލާ ނިމުމަށްފަހު އިއުތިރާފްގެ ދެން އެއްބަސްވުން ނުވަތަ ނަސޭހަތުގެ އެއްބަސްވުން ޤާނޫނު މިހާރު އޮތްގޮތުން ޖާގައެއް ނުދޭ. އެއަށް ހައްލެއް ގެނެވިއްޖެނަމަ ކުރިުގެ ހުރި މައްސަލަތައް ކޯޓަށް ނުގޮސްހައްލުކުރެވޭނެ. އެހެންވިއްޔާ ކޯޓަށް ދާނީ ވަރަށް ބޮޑެތި މައްސަލަތަކުގައި. ކޯޓަށް ޝަރީއަތްކުރަން ފަސޭހަވެގެންދާނެ.

– ޕީޖީ ޙުސައިން ޝަމީމް

ޕީޖީ ވިދާޅުވީ އެ ޤާނޫނާއެކު މައްސަލަ ނިންމެވުން އިތުރަށް އަވަސްވެގެންދާނެކަމަށާއި، ޝަރީއަތްތައް ކުރިއަށްގެންދިއުމަށް ކޯޓުތަކަށްވެސް ފަސޭހަވެގެންދާނެކަމަށެވެ.

އަޅުގަނޑުމެން މިލިޔަނީ ޝަރީއަތުގައި މައްސަލަ އޮތަސް ނަސޭހަތުގެ އެއްބަސްވުން ހަދާފަ ވަކި ދުވަހެއްވަންދެން ކުށެއް ނުކޮށް ނުކުމެވޭނެ ގޮތަކަށް މި ނިޒާމް މި ބައްޓަންކުރަނީ. ޖަލަށް ނުގޮސް ފަރުވާ ނިމިގެންނަމަވެސް ނިކުމެވޭނެގޮތަށް މި ނިޒާމް ބައްޓަންވަނީ. އަޅުގަނޑު އެދެނީ ހުށައެޅުމުން ވިހާވެސް އަވަހަށް އެ ބިލު ފާސްކޮށްދެއްވުން.

– ޕީޖީ ޙުސައިން ޝަމީމް

އިއުތިރާފްގެ އެއްބަސްވުމާއި ގުޅޭގޮތުން ޤާނޫނަށް ބަދަލުތަކެއް ގެނައުމަށް މަސައްކަތްކުރައްވަކަމަށް ޕީޖީ ވިދާޅުވެފައިވާއިރު، ބޮޑެތި މައްސަލަތަކުގައި މީގެކުރިންވެސް އިއުތިރާފްގެ އެއްބަސްވުން އެކުލަާފައިވެއެވެ. މިގޮތުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލަން މެއިމަހުގެ 6 ވަނަ ދުވަހު ދިން ޓެރަރިސްޓް ހަމަލާގައި އަމަލީ ގޮތުން ބައިވެރިވި އަހުމަދު އަދުހަމް ރަޝީދާއެކު އިއުތިރާފް އެއްބަސްވުމެއް ހަދާފައިވާ ކަމަށް ޕީޖީ ކުރިން ވިދާޅުވެފައިވެއެވެ. އަދި ކުރީގެ ނައިބު ރައީސް އަޙްމަދު އަދީބާއެކުވެސް ޕީޖީން އިއުތިރާފްގެ އެއްބަސްވުން އެކުލަވާލާފައިވެއެވެ.