އެއްވެސް ހުރަހެއްނެތި ރައީސުލްޖުމްހޫރިއްޔާގެ އޮފީހަށް އިދިކޮޅު މެމްބަރުންނަށް މިހާރު ދެވޭކަމީ ވަރަށް ބޮޑު ހެވެއް ކަމުގައި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ރައީސް ޔާމީނަށް ހުކުމް ކުރި 3 ފަނޑިޔާރެއްގެ އޯޑިއޯ ލީކްވުމާއި ގުޅިގެން ރައީސް ޞާލިހު އިސްތިއުފާ ދެއްވުމަށް ދެންނެވުމަށް އިދިކޮޅު މެމްބަރުންވަނީ މިއަދު ރައީސް އޮފީހަށް ވަޑައިގެންފައެވެ. އިދިކޮޅު މެމްބަރުން ރައީސް އޮފީހަށް ދިއުމާއި ގުޅިގެން ރައީސް ޔާމީންގެ ވެރިކަމުގައި މިހާރުގެ ރައީސް ޞާލިހާއި މަޖިލީހުގެ އޭރުގެ އިދިކޮޅު މެމްބަރުން ރައީސް އޮފީހަށް ވަޑައިގަރުމަށް ހުރަސް އެޅުއްވި ފޮޓޯއަކާއިއެކު ކުރެއްވި ޓްވީޓުގައި ވައްޑެއް ވިދާޅުވީ އެއްވެސް ހުރަހެއްނެތި މިއަދު އިދިކޮޅު މެމްބަރުންނަށް ރައީސް އޮފީހަށް ދެވޭކަމީ އޮތް ވަރަށް ބޮޑު ހެވެއް ކަމަށެވެ.
ހުރަސް ކުރިމަތިނުވެ އިދިކޮޅު ބޭފުޅުންނަށް ރައީސް އޮފީހާ ހަމައަށްވެސް މިހާރު ވަދެވޭ ކަމީ ވަރަށް ބޮޑު ހެވެއް.
– ވައްޑެ ވިދާޅުވިއެވެ.
ރައީސް އޮފީސް ކައިރިއަށް ވަޑައިގެން ރައީސް އާއި ބައްދަލުކުރުމަށް މެމްބަރުން އެދިވަޑައިގަތުމުން ވިއްސަކަށް މިނެޓަށްފަހު މިހާރު ވަނީ އެތެރެއަށް ވައްދާފަ އެވެ. ނިކުމެވަޑައިގެން ރައީސް ދެއްވާ ޖަވާބުވެސް ހިއްސާކުރައްވާނެ ކަމަށް ޝިޔާމް ވިދާޅުވިއެވެ.
ލީކުވި އެ އޯޑިއޯގައި ވާހަކަދައްކަވާފައި ވަނީ ކްރިމިނަލް ކޯޓުގެ ގާޒީ ހުސެއިން ފާއިޒް ރަޝާދު އެވެ. އެ އޯޑިއޯގައި ފާއިޒް ވިދާޅުވެފައި ވަނީ ރައީސް ޔާމީނަށް ފަސް އަހަރުގެ ޖަލު ހުކުމެއް އިއްވީ ބަޔަކު ރަހީނު ކުރުމުން ކަމަށެވެ. އަދި ރަހީނު ކުރީ އޭނާ ނޫން ކަމަށާއި އަންހެނުން ކަމަށް ނުސީދާ ގޮތަކަށް ވިދާޅުވެފައިވެއެވެ.
މިކަމާ ގުޅިގެން މެމްބަރުން ވަނީ ރައްޔިތުންގެ މަޖިލީހުގައި ވެސް މިކަމާ ގުޅިގެން އިއުތިޖާޖުކޮށްފަ އެވެ. އެހެންވެ، ޖަލްސާ ކުރިއަށް ނުގެންދެވެގެން ވަނީ މެދުކަނޑާލާފައެވެ.
