ކ.ރަސްފަރި ފަރަށް އާގު ބޯޓު ފުންކޮށްފިއެެވެ.
އެމްއެންޑީއެފްއިން ބުނެފައިވަނީ މި ބޯޑު ފުންކޮށްފައިވަނީ އެމްއެންޑީއެފް ކޯސްޓް ގާޑައި ކަމާއި ގުޅުންހުރި އިދާރާތަކުން ގުޅިގެން ކުރި މަސައްކަތުން މިއަދު 14:8 ހާއިރުކަމަށެވެ.
ކ.ރަސްފަރި ފަރަށް މިބޯޓު އަރާފައިވަނީ އިންޑިއާއިން ފުރައިގެން ސައުތު އެފްރިކާއަށް، 19 ފިލިޕީންސް މީހުންނާއެކު ދަތުރުކުރަމުންދަނިކޮށެވެ. މިމަހުގެ 19 ވަނަ ދުވަހު ކ.ރަސްފަރި ފަރަށް އެރި އާގު ބޯޓުގެ ކެޕްޓަން އިހުމާލުވެފައިވާކަމަށް ކަމާއި ބެހޭ ފަރާތްތަކުން ވަނީ ބުނެފައެވެ.
ބޯޓު ފަރަށް އެރުމާއި ގުޅިގެން ބޭއްވި ނޫސްވެރިންގެ ބައްދަލުމުގައިމައުލޫމާތު ދެއްވަމުން ކަމާއިބެހޭ ފަރާތްތަކުން ވިދާޅުވީ 19 ވަނަ ދުވަހު މިބޯޓު ފަރަށް އަރާފައިވަނީ ބޯޓުގެ އިންޖީނެއްގެ ހޫނުމިން މާބޮޑަށް މަތިވެގެން، އިންޖީނު ނިއްވާލުމުގެ ސަބަބުން ބޯޓު ބީހިގެންކަމަށެވެ. އެންވަޔަރަމަންޓް މިނިސްޓްރީން ވިދާޅުވީ ރަސްފަރި ފަރު ސަލާމަތްކުރުމަށް ބޯޓުގެ ކެޕްޓަންގެ އެކަށީގެންވާ މަސައްކަތެއް ނުކުރާކަމަށެވެ. އަދި މިހާދިސާ ހިނގުމުން އަންގަންޖެހޭ ފަރާތްތަކަށް ކެޕްޓަން އަންގާފައިނުވާކަމަށްވެސް ކަމާއިބެހޭ ފަރާތްތަކުން ބުނެއެވެ.
އެމްއެންޑީއެފްއިން ވިދާޅުވީ މިބޯޓު ފަރަށް އެރުމުން އެކަމުގެ ރިޕޯޓް ލިބިފައިވަނީ ބޯޓުން ނޫންކަމަށާއި، އާއްމު ފަރާތަކުންކަމަށެވެ. އެންވަޔަރަމަންޓުން ވިދާޅުވީ މިކަމުގައި އިހުމާލުވެފައިވާ ފަރާތްތަކަށް ފިޔަވަޅު އަޅާނެކަމަށާއި، އަދި ތިމާވެއްޓަށް ލިބުނު ގެއްލުމުގެ ބަދަލު ނުލިބެނީސް ބޯޓަށް ނުފުރޭނެކަމަށްވެސް ކަމާއިބެހޭ ފަރާތްތަކުން ބުނެއެވެ.
ކޮމެންޓު ފޮނުވާ