އެމްޑީޕީއަކީ ވަޢުދުވެ ވަޢުދު ފުައްދަން ނޭގޭ ޕާޓީއެއްކަމަށް ވިދާޅުވެ މިސަރުކާރުގެ ކުރީގެ ޓެކެނޮލޮޖީ މިނިސްޓަރ މުޙައްމަދު މަލީހް ޖަމާލް ފާޑުވިދާޅުވެއްޖެއެވެ.

މަލީހް މިފަދައިން ފާޑުވިދާޅުވީ، މިސަރުކާރުން ވެރިކަމަށް އައުމަށް ރައްޔިތުންނަށް ވެފައިވާ ހުރިހާ ވަޢުދެއް، ފަސް އަހަރުގެ ދައުރުގެ ތެރޭގައި ފުއްދުމަކީ ކުރެވޭނެ ކަމެއްނޫންކަމަށް ގަބޫލު ކުރައްވާ ކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވުމާއި ގުޅިގެންނެކަމަށް.

އާޒިމްގެ އެވާހަކަފުޅަށް އިޝާރާތްކުރައްވާ މަލީހް ވިދާޅުވީ، އެމްޑީޕީއާއި ޕީޕީއެމްގެ ތަފާތުވާނެކަމަށާއި، އެމްޑީޕީއަކީ ވަޢުދުވެ ވަޢުދު ފުައްދަން ނޭނގޭ ޕާޓީއެއްކަމަށެވެ. ޕީޕީއެމް ވަޢުދުވެ ވަޢުދު ފުއްދާނެކަމަށާއި، އެމްޑީޕީއަށް ވައުދު ނުފުއްދެނީ އަޚްލާގު ދަށްވީމަކަމަށްވެސް މަލީޙް ވިދާޅުވިއެވެ، އާޒިމާއި ސަރުކާރު އިތުރު ބަހަނާ ނުދައްކަވާ އިސްތިއުފާ ދެއްވާ ރައްޔިތުންނާއި ޤައުމު ހަވާލު ކުރެއްވުމަށްވެސް މަލީހު ގޮވާލެއްވިއެވެ.

އެމްޑީޕީއާއި ޕީޕީއެމްގެ ތަފާތު. އެމްޑީޕީއަކީ ވަޢުދުވެ ވަޢުދު ފުައްދަން ނޭގޭ ޕާޓީއެއް. ޕީޕީއެމް ވަޢުދުވެ ވަޢުދު ފުއްދާނެ. އެމްޑީޕީއަށް ވައުދު ނުފުއްދެނީ އަޚްލާގު ދަށްވީމަ. އާޒިމާއި ސަރުކާރު އިތުރު ބަހަނާ ނުދައްކަވާ އިސްތިއުފާ ދެއްވާ ރައްޔިތުންނާއި ޤައުމު ހަވާލު ކުރައްވާ. pic.twitter.com/nFDqpv2XWe

— Mohamed Maleeh Jamal (@maleehjamal) August 28, 2021

ސަރުކާރުން ރައްޔިތުންނަށް ވެފައިވާ ވައުދުތައް ފުއްދުމަށް ކުރައްވަމުން މަސައްކަތްތަކާއި ގުޅޭގޮތުން ދައުލަތުގެ މީޑިއާގައި ވާހަކަ ދައްކަވަމުން އާޒިމް ވިދާޅުވީ ސަރުކަރުން ވެރިކަމާއި ހަވާލުވުމުގެ ކުރިން ރައްޔިތުންނަށް ވެފައިވާ ގިނަ ވައުދުތައް ފުއްދުމަށް ވަރަށް ގިނަ މަސައްކަތްތަކެއް ކުރަމުންދާކަމަށެވެ. ނަމަވެސް އެކަންކަމަށް ކުރިމަތިވި އެންމެ ބޮޑު ހުރަހަކީ ކޯވިޑް-19 ކަމަށެވެ. ކޯވިޑްގެ ތެރޭގައިވެސް ސަރުކާރުން އުންމީދުވެސް ނުކުރާހާ ރަނގަޅަށް ކަންކަން ކޮށްދެއްވާފައިވާކަމަށް އާޒިމް ވިދާޅުވިއެވެ.

އާޒިމް ވިދާޅުވީ ސަރުކާރުން ވެފައިވާ ވައުދުތައް 5 އަހަރުގެ ދައުރުގެ ތެރޭގައި ފުއްދުމަކީ ކުރެވޭނެ ކަމެއް ނޫންކަމަށް ގަބޫލު ކުރައްވާކަމަށެވެ. ނަމަވެސް ވެފައިވާ ގިނަ ވައުދުތައް ދައުރުގެ ބާކީ އޮތް ދުވަސްތަކުގައި ފުއްދުމަށް ސަރުކާރުން މިހާރު މަސައްކަތް ކުރަމުންދާ ސްޕީޑަށް ބަލާއިރު ކުރެވޭނެ ކަމުގެ ވަރަށް ބޮޑު އުންމީދު އެބައޮތްކަމަށް އާޒިމް ވިދާޅުވިއެވެ.

އަޅުގަނޑު ދެކޭ ގޮތުގައި ކުރިއަށް އޮތް ދެއަހަރު ރައްޔިތުން ބޭނުންވާ ސްޕީޑުގައި ކަންކަން ނުވިޔަސް، ވަރަށް ގިނަ ކަންތައް ކުރާނެކަމުގެ އުންމީދު އެބައޮތް މިސަރުކާރާއި ދޭތެރޭގައި. އެހެންވީމަ ރައްޔިތުންނަށް ވީ ވަޢުދު އަޅުގަނޑުމެން ބޮލާލާ ނުޖަހާނަން. އެކަންކަން ފުއްދޭތޯ ހަމަ ޔަގީނުންވެސް މަސައްކަތް ކުރާނެ. ފަހަރުގައި ހުރިހާ ވައުދަކީ ފަސްއަހަރުގެ ތެރޭގައި ފުއްދޭނެ ކަންކަމެއްނޫން. އެހެން ނަމަވެސް އޭގެ ބޮޑުބައެއް ކުރާނެކަމަށް އަޅުގަނޑުމެން އުންމީދު މިކުރަނީ. އެޔަގީންކަން އަޅުގަނޑު އަރުވަން.

– އާޒިމް ވިދާޅުވިއެވެ

އާޒިމް ވިދާޅުވީ ކޯވިޑްގައި ސަރުކާރުން ކަންކަން މެނޭޖް ކުރުމުގައި އަމަލުކޮށްފައިވަނީ ތައުރީފް ހައްގު ގޮތަކަށް ކަމަށެވެ. އެއްވެސް މުވައްޒިފަކު ވަޒީފާއިން ވަކިނުކޮށް، މުސާރަ ކުޑަނުކޮށް، ތަރައްޤީގެ ބައެއް މަޝްރޫޢުތައްވެސް ކުރިއަށް ގެންދެވިކަމީ އުފާ ކުރަންޖެހޭ ކަމެއްކަމަށެވެ. ކޯވިޑާއި ގުޅިގެން 2 އަހަރު ސަރުކާރަށް ގެއްލިގެން ދިޔައިރުވެސް ހިތްވަރާއިއެކު ރައްޔިތުންގެ ކަންކަން ކޮށްދެއްވުމަށް ސަރުކާރުން ކުރެއްވި މަސައްކަތަށް އާޒިމް ވަނީ ތަޢުރީފް ކުރައްވާފައެވެ.