ވެރިކަން ކުރާ މައި ޕާޓީ އެމްޑީޕީގެ އެތެރޭގެ އިންތިޚާބުގައި ވޯޓު ފޮށިތަކާއި ހަވާލުވާން ބޭނުންވާ ބޭފުޅުން އެމްޑީޕީގެ އިންތިޚާބުގައި އިސްކޮށް ހަރަކާތްތެރިވާ ނާޒިމް ސައްތާރަށް މެސެޖް ކުރުމަށް އޭނާ އެދިއްޖެއެވެ.
އެމްޑީޕީގެ ޤައުމީ މަޖިލިސް އިންތިޚާބު އަންނަ މަހުގެ 25 ވަނަ ދުވަހު ބޭއްވުމަށް ހަމަ ޖެހިފައިވާއިރު، މި އިންތިޚާބަކީ އެމްޑީޕީގެ ތެރޭގައި މިހާރު އޮތް ވާދަވެރިކަމުގެ ތެރެއިން ޕާޓީގެ ބާރުތައް ނެގުމަށް ރައީސް ޞާލިހުއާއި، ރައީސް ނަޝީދު ކުރައްވަމުންދާ މަސައްކަތުގެ އެންމެ މުހިންމު އިންތިޚާބެވެ. މި އިންތިޚާބުގައި ދެ ބޭފުޅުންނަށްވެސް ތާއީދު ކުރައްވާ ބޭފުޅުން ވަނީ ވާދަކޮށްފައެވެ.
އެމްޑީޕީގެ އެތެރޭގައި ބޭއްވޭ އެންމެ ބޮޑު އިންތިޚާބަށްވާއިރު، އިންތިޚާބުގައި 300 ވޯޓު ފޮށި އެކި ދައިރާތަކުގައި ބެހެއްޓިގެންދާނެއެވެ. މިއިންތިޚާބުގައި 900 އެއްހާ އޮފިޝަލުން ހަރަކާތްތެރިވާނެކަމަށާއި، އޮފިޝަލުން ހޯދުމުގެ މަސައްކަތްވެސް ވަރަށް އަވަހަށް ކުރެވޭނެކަމަށް އެޕާޓީން ވަނީ ބުނެފައެވެ. އެމްޑީޕީގެ އިންތިޚާބުގައި ވޯޓް ފޮށިތަކާއި ހަވާލުވާން ބޭނުންވާ ކޮންމެ ބޭފުޅަކަށްވެސް އެފުރުސަތު އޮތްކަމަށާއި، އެއީ ވަކި އެމްޑީޕީ މެމްބަރަކަށް ވާންޖެހޭ ކަމެއް ނޫންކަމަށް ނާޒިމް ވަނީ ވިދާޅުވެފައެވެ. އަދި ޝައުގުވެރިކަން ހުރި ބޭފުޅުން އޭނާއަށް މެސެޖް ކުރުމަށް ވަނީ ދަންނަވާފައެވެ.
– އެމްޑީޕީ ދާއިރާ އިންތިޚާބުގެ ވޯޓު ފޮއްޓާއި، ހަވާލުވާން ބޭނުންތޯ؟ އެމްޑީޕީ މެމްބަރަކަށް ވާކަށް ނުޖެހޭނެ. އަޅުގަނޑަށް މެސެޖްކޮށް ދެއްވާ.
– ނާޒިމް ވިދާޅުވިއެވެ.
Mdp daira intikhab ge vote fottaka havaal vaan beynun tho? Mdp member akah vaakah nuheheyne. Please DM me
— Nazim Sattar (@nazimsat) August 28, 2021
އަންނަ މަހުގެ 25ވަނަ ދުވަހު ބޭއްވުމަށް ހަމަޖެހިފައިވާ މިއިންތިޚާބުގައި 730 ކެނޑިޑޭޓުން ވާދަކުރެއެވެ. އެޕާޓީގެ އެތެރޭގެ އިންތިޚާބުގައި ވާދަކުރާ ކެންޑިޑޭޓުންގެ ފައިނަލް ލިސްޓަށް ޝަކުވާ ހުށަހެޅުމުގެ އެންމެ ފަހު ތާރީހަކީ މިމަހުގެ 30ވަނަ ދުވަހުގެ ހަވީރު 4.00އެވެ. އެމްޑީޕީން ބުނެފައިވަނީ ޝަކުވާ ބަލައިގަތުމަށް ހަމަޖެހިފައިވަނީ، ސިޓީގެ އަސްލު، އާދިއްތަ އަދި ހޯމަ ދުވަހުގެ ހެނދުނު 9.00އިން ހަވީރު 4.00 އަށް އެމްޑީޕީ އޮފީހުގެ 2ވަނަ ފަންގިފިލާއިން ކަމުގައެވެ. އަދި އޮންލައިންކޮށް ހުށަހަޅާ ފަރާތްތަކަށް މިއަދުން ފެށިގެން ސުންގަޑި ހަމަވަންދެން [email protected] އީމެއިލް މެދުވެރިކޮށް ޝަކުވާ ހުށަހެޅޭނެ ފުރުސަތު ހުޅުވާލާފައިވާކަމަށް އެމްޑީޕީން ބުނެއެވެ.
އެމްޑީޕީގެ މިއިންތިޚާބުގައި ވޯޓުލުމުގެ ފުރުސަތު ދޭނީ އެހެން އިންތިޚާބުތަކުގައިވެސް އަމަލުކުރާ އުސޫލުން ޕާޓީގެ ދަފްތަރުގައި ހިމެނޭ މީހުންނަށްކަމަށް އެޕާޓީން ބޭއްވި ޕްރެސް ކޮންފަރެންގައި ޗެއާޕާސަން ހަސަން ލަތީފް ވަނީ ވިދާޅުވެފައެވެ. އެމްޑީޕީއަކީ ރާއްޖޭގައި އެންމެ ބޮޑު ސިޔާސީ ޕާޓީއެވެ. އެޕާޓީގެ ދަފްތަރުގައި 93،354 މެމްބަރުން އެބަތިއްބެވެ. މި އިންތިޚާބަކީ އެމްޑީޕީގެ އެތެރޭގައި ބޭއްވޭ އެންމެ ބޮޑު އިންތިޚާބެވެ
