ރާއްޖޭގައި މިހާރު އޮތް މައްސަލައަކީ ނިޒާމީ މައްސަލައެއް ނޫންކަމަށާއި، އޮތީ ސިޔާސީ ވެރިންގެ އަމިއްލަ މަސްލަހަތު އެކުލެވޭ މައްސަލަ ތަކެއް ކަމުގައި މޯލްޑިވްސް ޓްރޭޑް ޔޫނިއަންގެ ނާއިބު ރައީސް ސައުދުﷲ އަހުމަދު ވިދާޅުވެއްޖެއެވެ.
ބަރުލަމާނީ ނިޒާމަކީ ރައްޔިތުންނަށް އެންމެ ފައިދާ ހުރި ނިޒާމު ކަމަށާއި، އެއީ ދައުލަތް ނޮޅާލާ ނިޒާމު ނޫންކަމަށް ރައްޔިތުންގެ މަޖިލީހުގެ ތިމަރަފުށީ ދާއިރާގެ ކުރީގެ މެމްބަރު މުހައްމަދު މުސްތަފާ ވިދާޅުވެ ކުރެއްވި ޓްވީޓަށް ރައްދު ދެއްވަމުން ސައުދު ވިދާޅުވީ ބަރުލަމާނީ ނިޒާމަކީ ކޮބައިކަން އެންމެ ކައިރީގައި އޮތް ޤައުމަށް ބަލައި ލުމުން ހާމަވާކަމަށެވެ.
ބަރުލަމާނީ ނިޒާމުގެ ސަބަބުން ކޮރަޕްޝަނާއި، ވައްކަން އިންތިހާއަށް އާންމުވެ، ސިޔާސީ ވެރިންގެ އަމިއްލަ މަސްލަހަތުގައި ކަންކަން ކުރެވޭތަން ފެނިގެންދާ ކަމަށާއި، އެޤައުމުގައި ރައްޔިތުންގެ ތިބި ހާލު ކައިރިން ބަލައިލުމުން ބަރުލަމާނީ ނިޒާމުގެ ހާލަތު އެނގޭކަމަށް ސައުދު ވިދާޅުވިއެވެ. އޭނާ ވިދާޅުވީ ރާއްޖޭގައި އުޅެނީ ނިޒާމުގެ މައްސަލައެއް ނޫންކަމަށެވެ. ރާއްޖޭގައި އޮތީ ސިޔާސީ ލީޑަރުންގެ އަމިއްލަ މަސްލަހަތުކަމަށް ސައުދު ވިދާޅުވިއެވެ.
މުސްތަފާ ބަލަ އެންމެ ކައިރީގައި އޮތް ބޮޑު ޤައުމުގެ އެއޮތީ ރިޔާސީ ނިޒާމެއްތޯ؟ އެހާ ހާލުގައި ރައްޔިތުން އެ އުޅެނީ. ވައްކަމާއި، ކޮރަޕްޝަން އިންތިހާއަށް. މި އުޅެނީ ނިޒާމުގެ މައްސަލައެއްނޫން. ސިޔާސީ ޕާޓީތަކުގެ ނިޒާމަކީ ކޮރަޕްޝަންގެ ނިޒާމް. 5 އަހަރަށް ތަނަވަސްކަން ހޯދާ ނިޒާމު.
– ސައުދު ވިދާޅުވިއެވެ.
@Thimarafushi bala Enme kairee oih enme bodu Qaumuge othee riyaasee nizaamehtho ehaa haaluga rahyithun e ulhenee.vahkamaai ,corruption inthihaa ah.Mi ulhenee nizaam ge mahsala eh noon.siyaasee party thakuge nizaamakee corruption ge nizaam.5 aharah thanvas kan hoadhaa nizaam https://t.co/ixJnszXA2p
— Saudulla Ahmed (@saudullaahmed1) August 27, 2021
ބަރުލަމާނީ ނިޒާމް ގެންނަން، ގާނޫނު އަސާސީ އިސްލާހު ކުރުމުގެ ކަންކަން އަވަސްކުރުމަށް ގޮވާލައި ރައީސުލްޖުމްހޫރިއްޔާއަށް ހުށައަޅާ ޕެޓިޝަނެއްގައި ސޮއިކުރުމުގެ މަސައްކަތް އެމްޑީޕީގެ އާންމު މެންބަރުންތަކެއް ފަށާފައިވަނީ އިއްޔެއެވެ.
ރާއްޖޭގައި މިހާރު މިއޮތް ވެރިކަމުގެ ނިޒާމު ބަދަލުކުރެވޭނީ އާންމު ރައްޔިތުންގެ ވޯޓަކުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ ވިދާޅުވެފައެވެ. 2008 ވަނަ އަހަރު ދިވެހިން ބަލައިގަތް ފެހި ޤާނޫނު އަސާސީއަށް އަމަލުކުރަން ފެށުމުގެ ކުރިން ރާއްޖޭގައި އޮންނަން ބޭނުންވާ ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 95،619 މީހުން ވޯޓުދީފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށެވެ.
ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ. މި ވޯޓުގައި 199،841 މީހުން ވޯޓުލުމަށް ރަޖިސްޓްރީކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.
