ކާބުލްގެ އެއަރޕޯޓަށް ދިން ޖާނުން ފިދާވުމުގެ ހަމަލާއެއްގައި އެމެރިކާ ސިފައިންގެ 13 މީހެއްގެ އިތުރުން، 175 މީހަކު މަރުވިތާ އެއް ދުވަސްފަހުން، އަފްއާނިސްތާންގެ އިރުމަތީ ސަރަހައްދުގައި ދިން ޑްރޯން ހަމަލާއެއްގައި، އެ ސަރަހައްދުގައި ހަރަކާތްތެރި ވަމުންދާ އައިސިސް-ކޭގެ ހަމަލާތައް ރާވާ ހިންގުމުގައި ހަރަކާތްތެރިވާ އެންމެ އިސްފަރާތް މަރާލާފައިވާކަން އެމެރިކާއިން ހާމަކޮށްފިއެވެ.

"އަފްއާނިސްތާނުގެ ނަންގަހާރު ޕްރޮވިންސްގައި ވަނީ ޑްރޯން ހަމަލާއެއް ދީފައި، މިހާރު އެއްކުރެވިފައިވާ މައުލޫމާތުތައް ބުނާ ގޮތުގައި ހަމަލާ އަމާޒުކުރި ފަރާތްް ވަނި މަރާލެވިފައި،" ޔޫއެއް ސެންޓްރަލް ކޮމާންޑްއިން ކެޕްޓަން ބިލް އާބަން ނެރުއްވު ބަޔާނެއްގައި ބުނެފައި ވެއެވެ.

"މިހާތަނަށް އެގިފައިވާ ގޮތުގައި މިހަމަލާގައި އާންމުންގެ އެއްވެސް މީހަކަށް އަނިޔާއެއް ބިލިފައެއް ނުވޭ،" ކާބުލްއަށް ދިން ޖާނުންފިދާވުމުގެ ހަމަލާއަށްފަހު، އެމެރިކާއިން އަފްއާނިސްތާނުގައި ދިން ފުރަތަމަ ހަމަލާއާއި ގުޅިގެން ނެރުނު މި ބަޔާނުގައި ބުނެފައި ވެއެވެ.

ރޮއިންޓާސްއިން ރިޕޯޓު ކޮށްފައިވާ ގޮތުގައި، މެދުއިރުމަތީ ކޮން ގައުމެއްކަން ނޭގޭ ގައުމަކުން އުދުއްސާލާފައިވާ މި ޑްރޯންއިން ހަމަލާ އަމާޒު ކޮށްފައިވަނީ، ހަމަލާ އަމާޒުކުރި ފަރާތް އެހެން މީހަކާއެކީ ކާރެއްގައި ދަތުރު ކުރަމުން ދަނިކޮށެވެ.

އަދި އޮފިޝަލަކާ ހަވާލާދީ ރޮއިޓާސްއިން ރިޕޯޓު ކޮށްފައިވާ ގޮތުގައި މިހަލާގައި ކާރުގައި ތިބި ދެމީހުންވެސް މަރުވެފައިވާކަމަށް ވަނީ ބެލެވިފައެވެ.

ފާއިތުވެދިޔަ ހަފްތާގެ ބުރާސްފަތި ދުވަހު، ކާބުލްގެ އެއަރޕޯޓަށް ދިން ޓެރަރިސްޓުހަމަލާގެ ޒިންމާ އައިސިސް-ކޭއިން ވަނީ އުފުލާފައެވެ.

އައިސް-ކޭ އަކީ އަފްއާނިސްތާނުގެ ޚޮރަސަން ޕްރޮވިންސްގައި ހަރަކާތްތެރިވަމުންދާ އައިސިސް ޖަމާއަތުގެ ގޮތްޕެކެވެ.

ކާބުލް އިންޓަރނޭޝަނަލް އެއަރޕޯޓަށް އަމާޒުކޮށް މި ހަމަލާ ދީފައިމިވަނީ، 31 އޮގަސްޓުގެ ކުރިން، ގައުމުތަކުން، އަފްއާނިސްތާނުގެ ރެފިއުޖީން އެގައުމަށް ބޭރަށް ގެންދިއުމަށް ކުރަމުންދާ މަސައްކަތްތަކަށް އަމާޒުކޮށް، ހަގުރާމަވެރިންގެ ހަމަލާތައް އަމާޒުވެދާނެ ކަމުގެ އިންޒާރު އެމެރިކާއިން ދީފައިވަނިކޮށެވެ.

ކާބުލް އެއަރޕޯޓުގައި އެމެރިކާ ސިފައިން ހަރަކާތްތެރިވަމުން ސަރަހައްދަށް އަމާޒުކޮށް ޖާނުންފިދާވެގެން ދިން މިހަމަލާ ތާލިބާނުންވަނީ ކުށްވެރި ކޮށްފައެވެ. އަދި ބުނެފައިވަނީ އަފްއާނިސްތާނުގެ ރައްޔިތުންގެ ސަލާމަތާ ރައްކާތެރިކަން ކަށަވަރުކުރުމަށް އެޖަމާއަތުން ޚާއްސަ ސަމާލުކަމެއް ދެމުން ދާމަކަމަށާއި، އަދި މި ހަމަލާތައް ދެމުންދާ ފަރާތްތައް ހުއްޓުވުމަކަށް ގެންނާނެ ކަމަށެވެ.

ހަމަލާއަށްފަހު، އެމެރިކާގެ ރައްޔިތުންނާ މުޚާތަބްކޮށް ވާހަކަ ދައްކަވަމުން އެމެިރކާގެ ރައީސް ޖޯ ބައިޑްން ވިދާޅުވެފައިވަނީ، މިހަމަލާދިން މީހުން ހޯދާ އެމީހުން އިންސާފުގެ ކުރިމައްޗަށް ގެންނާނެ ކަމުގައެވެ.