ކާބުލްގެ އެއަރޕޯޓުގައި އެމެރިކާ ސިފައިން ހިންގަމުންދާ އޮޕަރޭޝަންތަކަށް އަމާޒުކޮށް ހަމަލާ ދޭނަކަމުގެ އިންޒާރު އައިސިސް ޖަމާއަތުން ދީފައިވަނިކޮށް، ކާބުލްގެ އެއަރޕޯޓަށް އަމާޒުކޮށް ބޮމުގެ ހަމަލާތަކެއް ދީފިއެވެ.

ބައެއް މީޑިއާރިޕޯޓުތައް ބުނާ ގޮތުގައި، އަފްއާނިސްތާން ދޫކޮށް ދިއުމަށް އެއްޕާޓުގެ ބޭރުން އެކިސާބުތަކަށް ޖަމާވެފައިވާ މީހުންގެ ތެރޭގައި ދީފައިވަނީ ޖާނުން ފިދާވުމުގެ ހަމަލާއެކެވެ. އަދި މި ޖާނުން ފިދާވުމުގެ ހަމަލާގައި، 10 މީހަކު މަރުވެފައިވާއިރު، މަރުވެފައިވާ މީހުންގެ އަދަދު 13 އަށް އަރާކަމަށްވެސް ބައެއް މީޑިއާތަކުން ވަނީ ރިޕޯޓު ކޮށްފައެވެ.

މައުލޫމާތު ލިބިފައިވަނީ، ބިން ގޮއްވާލާފައިވަނީ، އެއަރޕޯޓުގައި އެމެރިކާ އަދި އިނގިރޭސި ސިފައިން ހަރަކާތްތެރިވަމުންދާ ސަރަހައްދާ އެންމެ ކައިރީގައި ހުންނަ އައްބޭ ދޮރާށި ކައިރީގައެވެ.

ކާބުލް އިންޓަރނޭޝަނަލް އެއަރޕޯޓަށް އަމާޒުކޮށް މި ހަމަލާ ދީފައިމިވަނީ، 31 އޮގަސްޓުގެ ކުރިން، ގައުމުތަކުން، އަފްއާނިސްތާނުގެ ރެފިއުޖީން އެގައުމަށް ބޭރަށް ގެންދިއުމަށް ކުރަމުންދާ މަސައްކަތްތަކަށް އަމާޒުކޮށް، ހަގުރާމަވެރިންގެ ހަމަލާތައް އަމާޒުވެދާނެ ކަމުގެ އިންޒާރު އެމެރިކާއިން ދީފައިވަނިކޮށެވެ.

އިނގިރޭސި އާރމްޑް ފޯސެސް މިނިސްޓަރ ޖޭމްސް އެއައްޕޭ ކުރިން ބީބީސީއަށް މައުލޫމާތުދެމުން ވަނީ، އެއަރޕޯޓަށް ޓެރަރިސްޓް ހަމަލާ އަމާޒުވެގެން ދިއުމަކީ ހަމަ ކޮންމެ ވަގުތެއްގައިވެސް ހިގާފާނެކަމެއް ކަމުގައި ވިދާޅުވެފައެވެ. އެހެންނަމަވެސް، އައިސިސް ޖަމާއަތުން އަތުވެދާނެކަމަށް ޖާސޫސީ އިދާރާތަކުން ބުނަމުންއައި މި ހަމަލާތަކުގެ އެއްވެސް ތަފްސީލެއް އެއްވެސް ފަރާތަކުން މީގެ ކުރިން ދީފައެއް ނުވެއެވެ.

މީގެ ހަފްތާއެއް ކުރިން، ތާލިބާން ޖަމާއަތުގެ ބާރުގެދަށް މުޅި އަފްއާނިސްތާނު ދިއުމާގުޅިގެން، އެގައުމު ދޫކޮށް ދިއުމަށް ބޭނުންވާ އެތައްބަޔަކުވަނީ، ޕާކިސްތާން އަފްއާނިސްތާން ބޯޑަރު ކައިރިއަށްވެސް ޖަމާވެފައެވެ.

މިގޮތުން އަފްއާނިސްތާނުގެ ކުރީގެ ވެރިކަމުގައި، އެގައުމުގައި ތިބި ގައުމުން ބޭރުގެ ސިފައިންނަށާއި އަދި ހުޅަގުގެ ގައުމުތަކަށް އެކި ގޮތްގޮތުން އެހީތެރިކަން ފޯރުކޮށްދީފައިވާ ފަރާތްތަކުންދަނީ، ތާލިބާންގެ ވެރިކަމެއްގައި އެގައުމުގައި ނުތިބުމަށް މަސައްކަތް ކުރަމުންނެވެ.

އަދި އެމެރިކާއާއި އިގިރޭސިވިލާތުންދަނީ، އެގައުމުތަކަށް އެކި ގޮތްގޮތުން އެހީތެރިކަން ފޯރުކޮށްދިން އަފްއާނިސްތާނުގެ ރައްޔިތުން އެގައުމުން ބޭރަށް ގެންދިއުމަށްޓަކާ، މީހުން އެއްތަނުން އަނެއްތަނަށް ބަދަލުކުރުމަށް ދުނިޔޭގައި މިހާތަނަށް ހިންގޭ އެންމެ ބޮޑު އޮޕަރޭޝަން ކުރިޔަށް ގެންދަމުންނެވެ.