އެމްޑީޕީގެ އެތެރޭގެ އިންތިޚާބުގައި ޔޫތު މިނިސްޓަރ އަހުމަދު މަހުލޫފަށް ކުރިމަތިލުމަށް ފުރުސަތު ނުދެއްވި ސަބަބު ސާފުކޮށްދެއްވުމަށް އިލެކްޝަންސް ކޮމިޝަނުން އެމްޑީޕީގައި އެދިއްޖެއެވެ.
ސިޔާސީ ޕާޓީތަކުގެ ބަލަދުވެރި ފަރާތުގެ ހައިސިއްޔަތުން ޕާޓީތަކުން ހުށަހަޅާ މައްސަލަތަކާއި، މެމްބަރުންގެ އެކި މައްސަލަތައް ހައްލުކުރުމަށް އިލެކްޝަންސް ކޮމިޝަނުން މަސައްކަތް ކުރާއިރު މަހުލޫފަށް ވާދަކުރަން ފުރުސަތު ނުދިން ސަބަބާއި، އެމްޑީޕީން ނިންމާވައިވާ ނިންމުން ސާފުކޮށް ދިނުމަށް އިލެކްޝަންސް ކޮމިޝަނުން ވަނީ މިއަދު އެމްޑީޕީއަށް ސިޓީއަކުން ދަންނަވާފައެވެ.
ގައުމީ މަޖިލީހުގެ މެދު އުތުރު ޕްރޮވިންސްގެ ރައީސް ކަމަށް ވާދަކުރެއްވުމަށް މަހްލޫފް ކުރިމަތިލެއްވިއިރު، ޚިޔާނާތާއި މަރުގެ މައްސަލަތަކުގެ ތުހުމަތުވާ މީހުނަށް އެ ޕާޓީގެ އެތެރޭގެ އިންތިޚާބުގައި ވާދަނުކުރެވޭނެ ކަމަށް ގައުމީ މަޖިލީހުގެ ހިންގާ ކޮމިޓީން އޮތީ ފާސްކޮށްފައެވެ. މަހްލޫފްގެ ފަރާތުން މި މައްސަލަ އެމްޑީޕީގެ އިންތިޚާބުތަކާ ބެހޭ ކޮމިޓީއާއި އެމްޑީޕީގައި އޮންނަ އިސްތިއުނާފް ފަނޑިޔާރުންގެ މަޖިލީހަށް ވެސް ހުށަހެޅިއެވެ. އެމްޑީޕީގެ އެ ދެ ގުނަވަނުން ނިންމާފައި ވަނީ މަހްލޫފަށް ވާދަނުކުރެވޭނެ ކަމަށެވެ.
އެމްޑީޕީން ވަނީ އެޕާޓީގެ އެތެރޭގެ އިންތިޚާބުގައި އެސެޓް ރިކަވަރީ ކޮމިޝަނާއި، މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަ ބަލާ ކޮމިޝަނުން ބަލާ މައްސަލައެއްގައި ތުހުމަތު ކުރެވޭ އެއްވެސް ބޭފުޅަކަށް ވާދަ ނުކުރެވޭނެކަމަށް ނިންމާފައެވެ. މީގެ އިތުރުން އެމްއެމްޕީއާރްސީގެ ޚިޔާނާތާއި ގުޅިގެން އޭސީސީން ތައްޔާރުކޮށްފައިވާ ރިޕޯޓެއްގައި ފިޔަވަޅު އަޅައިދިނުމަށް އެދި އެކިއެކި މުއައްސަސާތަކަށް ނަން ފޮނުވާފައިވާ ފަރާތްތަކަށްވެސް ވާދަ ނުކުރެވޭނެ ކަމަށް ވަނީ ނިންމާފައެވެ.
އެމްޑީޕީގެ ދާއިރާތަކުގެ އިންތިޚާބު އަންނަ މަހުގެ 25 ވަނަ ދުވަހު ބޭއްވުމަށް އެޕާޓީން ވަނީ ނިންމާފައެވެ.
