ވެރިކަން ކުރަމުންދާ މައި ޕާޓީ އެމްޑީޕީގެ އެތެރޭގެ އިންތިޚާބުގައި ވާދަކުރެއްވުމަށް ހުށަހެޅުއްވި، ޔޫތު މިނިސްޓަރ އަހުމަދު މަހުލޫފަށް ވާދަކުރުމުގެ ފުރުސަތު ދިނުމާއިމެދު ގޮތެއް ނުނިންމުން ލަސްވާތީ އެމައްސަލަ އިލެކްޝަން ކޮމިޝަނަށް ހުށަހަޅައިފިއެވެ.
މަހުލޫފް ކުރެއްވި ޓްވީޓުގައި ބުނެފައިވަނީ އެމްޑީޕީގެ އިންތިޚާބާ ބެހޭ ކޮމިޓީ އަދި އިސްތިއުނާފު ފަޑިޔާރުންގެ މަޖިލީހަށް ހުށައެޅި ޝަކުވާއަށް އެއްވެސް ޖަވާބެއް ނުލިބި އިންތިޚާބަށް އެންމެ 30 ދުވަހަށް ވެފައިވާތީ ސިޔާސީ ޕާޓީ ތަކުގެ ބެލެނިވެރިފަރާތް ކަމުގައިވާ އިލެކްޝަންސް ކޮމިޝަނަށް މިއަދު މަައްސަލަ ހުށަހަޅާފައިވާކަމަށެވެ.
MDP ގެ އިންތިޚާބާ ބެހޭ ކޮމިޓީ އަދި އިސްތިއުނާފު ފަޑިޔާރުންގެ މަޖިލީހަށް ހުށައެޅި ޝަކުވާއަށް އެއްވެސް ޖަވާބެއް ނުލިބި އިންތިޚާބަށް އެންމެ 30 ދުވަހަށް ވެފައިވާތީ ސިޔާސީ ޕާޓީ ތަކުގެ ބެލެނިވެރިފަރާތް ކަމުގައިވާ @ElectionsMv އަށް މިއަދު މައްސަލަ ހުށައަޅައިފިން.
— Ahmed Mahloof (@AhmedMahloof) August 24, 2021
މަހުލޫފް ވަނީ އޭނާއަށް މައްސަލަ ލަސްވެގެންދާތީ ކަންބޮޑުވުން ފާޅު ކުރައްވައި މަހުލޫފް ކުރެއްވި ޓުވީޓެއްގައި ވިދާޅުވީ މައްސަލަ ހުށަހެޅިތާ 6 ދުވަސް ވެގެންދާއިރުވެސް އެއްވެސް ގޮތެއް ނިންމާފައި ނުވާކަމަށެވެ. ނަމަވެސް ގަވާއިދު ބުނާގޮތުން 2 ދުވަސް ތެރޭގައި ޖަވާބެއް ދެއްވަން ޖެހޭކަމަށެވެ. ނަމަވެސް މިހާތަނަށްވެސް އެމްޑީޕީން މިކަމުގައި އެއްވެސް އެއްޗެއް ބުނެފައި ނުވެއެވެ.
އެމްޑީޕީންވަނީ އެޕާޓީގެ އެތެރޭގެ އިންތިޚާބުގައި އެސެޓް ރިކަވަރީ ކޮމިޝަނާއި، މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަ ބަލާ ކޮމިޝަނުން ބަލާ މައްސަލައެއްގައި ތުހުމަތު ކުރެވޭ އެއްވެސް ބޭފުޅަކަށް ވާދަ ނުކުރެވޭނެކަމަށް ބުނެފައެވެ. މީގެ އިތުރުން އެމްއެމްޕީއާރްސީގެ ޚިޔާނާތާއި ގުޅިގެން އޭސީސީން ތައްޔާރުކޮށްފައިވާ ރިޕޯޓެއްގައި ފިޔަވަޅު އަޅައިދިނުމަށް އެދި އެކިއެކި މުއައްސަސާތަކަށް ނަން ފޮނުވާފައިވާ ފަރާތްތަކަށްވެސް ވާދަ ނުކުރެވޭނެ ކަމަށް ވަނީ ބުނެފައެވެ.
އެމްޑީޕީގެ ދާއިރާތަކުގެ އިންތިޚާބު އަންނަ މަހުގެ 25 ވަނަ ދުވަހު ބޭއްވުމަށް އެޕާޓީން ވަނީ ނިންމާފައެވެ.
