ދުނިޔޭގެ ދެވަނަ ބޮޑު ހަގުރާމާގައި، އެމެރިކާ ސިފައިން، ޖަޕާނުގެ ފަރުބަދަ ރަށެއްކަމުގައިވާ އިވޯ ޖިމާއަށް އަރާ، އެރަށް އެމިހުންގެ ބާރުގެ ދަށަށް ގެނެސް، އަރަށުގެ ފަރުބަދަ މަތީގައި އެެމެރިކާގެ ސިފައިންގެ ދިދަ ނެގުމުގައި ނަގާފައިވާ މަޝްހޫރު ފޮޓޯއަށް، އެމެރިކާ ސިފައިންގެ އާރމީ ގިޔަރުގައި ތިބެ، ތާލިބާން ހަގުރާމަވެރިން ހަޖޫ ޖަހައިފިއެވެ.
1945ވަނަ އަހަރުގެ ދެވަ ބޮޑު ހަގުރާމައިގެ މި ފޮޓޯގައި ފެންނަނީ، އެމެރިކާގެ މެރިންސް ސިފައިންގެ 6 މީހަކު، ޖަޕާންގެ އިވޯ ޖިމާ ރަށުގެ، ސުރިބަޗީ ފަރުބަދަ މަތީގައި އެމެރިކާގެ ދިދަ ނަގާ މަންޒަރެވެ.
އެމެރިކާ ސިފައިންގެ މި މަޝްހޫރު ފޮޓޯއަށް ހަޖޫ ޖެހުމުގެ ގޮތުން، ތާލިބާން ސިފައިންވަނީ، ހަމަ އެގޮތަށް އެ ޖަމާއަތުގެ ދިދަ ފަރުބަދަ މަތީ ސަރަހައްދެއްގައި ނަގަނިކޮށް ނަގާފައިވާ ޕްރޮޕަގެންޑާ ފޮޓޯއެއް އާންމު ކޮށްފައެވެ. މި ފޮޓޯގައި ތާލިބާންގެ ބަދުރީ 313 ބެޓޭލިއަންގެ ހަގުރާމަވެރިން ތިބެނީ، އެމެރިކާގެ އަސްކަރިއްޔާގެ ކެމަފްލާޖް އަސްކަރީ ހެދުމުގައި، އެމެރިކާގެ އަސްކަރިއްޔާގެ ހަތިޔާރުތައްވެސް ހިފައިގެންނެވެ.
މިފޮޓޯއަކީ، ފާއިތުވެދިޔަ ހަފްތާގައި ތާލިބާން ޖަމާއަތުން އާންމު ކޮށްފައިވާ ޕްރޮޕަގެންޑާ އެތައް ފޮޓޯއެއްގެ ތެރޭގައި ހިމެނޭ ފޮޓޯއެކެވެ.
ތާލިބާން ޖަމާއަތުގެ ބަދުރި 313 ބެޓޭލިއަންއަކީ، އެމެރިކާގެ އަސްކަރިއްޔާގެ ސިފައިން ހެދުން އަޅާގޮތަށް، ކެމޮފްލާޖް ހެދުމުގައި، ހަގުރާމަތީ ބޫޓުތަކުގައި އަދި ބޮޑީ އާމަރުތަކުގައި ހަގުރާމަވެރިން ތިބޭ ޚާއްސަ ޔުނިޓެކެވެ. އަދި މި ޔުނިޓްގެ ހަގުރާމަވެރިން ބޭނުން ކުރަމުންދަނީވެސް، އެމެރިކާގެ އަސްކަރިއްޔާގެ ހަތިޔާރު ހަރުކުރި އެއްގަމު އުޅަދުތަކާއި، M4 carbine މަރުކާގެ އެމެރިކާގެ އަސްކަރިއްޔާގެ ހަތިޔާރެވެ.
ތާލިބާންގެ ބަދުރި 313 ބެޓޭލިއަން ނިސްބަތްވަނީ، މުސްލިމުންގެ މަޝްހޫރު ބަދުރު ހަގުރާމައަށެވެ. އަދި މި ޔުނިޓަށް މިނަން ދެވިފައިވަނީ، އެންމެ 313 އަސްޙާބު ބޭކަލުންނާއެކު، މުޝްރިކުންގެ ލަޝްކަރުގެ މައްޗަށް، މީގެ 1400 އަހަރުކުރިން ކީރިތި ރަސޫލާ ހޯއްދެވި މަތިވެރި ނަސްރަށް ނިސްބަތްކޮށެވެ.
މަސްރަހު ދިރާސާކުރާ ފަރާތަކުން މިހާރު ދެކޭ ގޮތުގައި، ތާލިބާންގެ އަސްކަރިއްޔާގެ މި ޔުނިޓް ކުރިޔަށް އޮތްތަނުގައި ވަރަށް ބޮޑަށް ތަރައްގީ ވެގެންދާނެއެވެ.
މި ޔުނިޓްއިން މީގެކުރިން އާންމު ކޮށްފައިވާ ވީޑިއޯތަކުން ފެންނަ ގޮތުގައި، މި ޔުނިޓްގައި ތިބޭ ހަގުރާމަވެރިންނަކީ، ހަގުރާމައިގެ ފުރިހަމަ ތަމްރީން ލިބިފައިވާ، އަދި އެންމެ ފަހުގެ އަސްކަރީ ހަތިޔާރާއެކު ހަރަކާތްތެރިވާ ހަގުރާމަވެރިންނެވެ.
ތާލިބާންގެ ބަދުރި 313 ޔުނިޓްގެ ހަގުރާމަވެރިން، އެމެރިކާ ސިފައިންގެ ހަތިޔާރުތައް އަތުލައިގެންފައިވަނީ، ކޮންގޮތަކަށް ކަން ސާފުނުވި ނަމަވެސް، ބެލޭވެގޮތުގައި، މިހަތިޔާރުތައް މި ޔުނިޓަށް ލިބިގެން ދިޔައީ، ހުޅަނގުގެ ބާރުތަކުން އަފްއާނިސްތާން ދޫކޮށް ދިޔަފަހުން އަފާއްނިސްތާނުގައި އޭރު އޮތް އަސްކަރިއްޔާއިންނެވެ.
Meet the new Taliban teams, American car, American weapons, American costume. pic.twitter.com/34rpGbMuQo
— Asaad Hanna (@AsaadHannaa) August 21, 2021
އެެމެރިކާގެ އޮފިޝަލުން ބުނާ ގޮތުގައި، އެމެރިކާއިން އަފްއާނިސްތާގެ އަސްކަރިއްޔާއަށް، 2002 ވަނަ އަހަރުން ފެށިގެން 2027ވަނަ އަހަރާ ހަމައަށް ފޯރުކޮށްދީފައިވާ 28 ބިލިއަން އެމެރިކާ ޑޮލަރުގެ ހަތިޔާރު މިހާރުވަނީ ތާލިބާން ޖަމާއަތުގެ ބާރުގެ ދަށުގައެވެ.
