ވެރިކަން ކުރާ މައިޕާޓީ އެމްޑީޕީގެ ފަނޑިޔާރުން މަޖިލީހުގެ މެމްބަރު ކަމަށް ކުރިމަތިލުމުގެ ފުރުޞަތު ހުޅުވާލައިފިއެވެ.
އެމްޑީޕީން މިއަދު ކޮށްފައިވާ އިއުލާނުގައި ފަނޑިޔަރުންގެ މަޖިލީހުގެ 9 މަޤާމަކަށް ކުރިމަތިލުމަށް މިމަހުގެ 24 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.
އިސްތިއުނާފްގެ ފަނޑިޔާރު މަޖިލީހުގެ މެންބަރުންގެ ޝަރުޠަކީ، ޕާޓީގެ މެންބަރެއް ކަމުގައިވުން އަދި ޤައުމީ މަޖިލީހުގެ މެންބަރަކު ކަމުގައި ނުވުމެވެ. އިސްތިއުނާފްގެ ފަނޑިޔާރުން މަޖިލީހުގެ ރައީސްގެ ޝަރުޠަކީ، އެމްޑީޕީގެ މެންބަރެއްކަމުގައި ވުމުގެ އިތުރުން މަދުވެގެން 2 އަހަރު ދުވަހުގެ ތަޖުރިބާހުރި ޤާނޫނީ ވަކީލެއްކަމުގައިވުމާއެކު އުމުރުން 35 އަހަރު ވެފައިވާ މީހަކު ކަމުގައި ވުމެވެ.
މިމަޤާމަށް ޗައުޤުވެރިވާ މެމްބަރުން ހުށަހަޅާ ސިޓީއާއެކު އެމީހެއްގެ ދިވެހިރައްޔިތެއްކަން އަންގައިދޭ ކާޑުގެ ކޮޕީއާއި، އެމީހެއްގެ ވަނަވަރު އެނގޭނޭ ލިޔުމަކާއި، ޤައުމީ މަޖިލީހުގެ 2 މެންބަރެއްގެ ތާއީދު އޮތްކަން އެނގޭނޭ ލިޔުން ހުށަހަޅާންވާނެކަމަށް ވަނީ ބުނެފައެވެ.
މިމަޤާމަށް ޝައުގުވެރިވާ މެމްބަރުން އެމްޑީޕީގެ ސެކްރެޓޭރިއެޓް މައި އޮފީހަށް ލިޔެކިޔުން ހުށަހަޅައިގެން ނުވަތަ ޕާޓީގެ އީމެއިލް [email protected] އަށް ލިޔެކިޔުން އީމެއިލް ކުރެވޭނެކަމަށް އެމްޑީޕީން ބުނެފައިވެއެވެ.
