މަޖިލީހުގެ ރައީސް މުޙައްމަދު ނަޝީދު އަވަހާރަކޮށްލުމަށް ދިން ހަމަލާއާއި ގުޅިގެން މަޖިލީހުން އެކުލަވާލި އިންކުއަރީ ރިޕޯޓްގައި ހިމަނާފައިވާ ރެކޮމަންޑެޝަންތަކުގެ ތެރެއިން ބައެއް ރެކޮމަންޑޭޝަންތައް ތަންފީޒު ކުރެވިގެންދާނީ ރިޔާސީ ދައުރު ނިމޭތަނުގައި ކަމަށް ނޭޝަނަލް ސެކިއުރިޓީ އެޑްވައިޒަރުގެ އޮފީހުން ވިދާޅުވެފައިވާކަމަށް އެމްޑީޕީގެ "މެއި ހައެއް" ކޮމިޓީގެ ގައްރިރު ރައްޔިތުންގެ މަޖިލީހުގެ ވިލުފުށީ ދާއިރާގެ މެމްބަރު ހަސަން އަފީފް ވިދާޅުވެއްޖެއެވެ.
މަޖިލީހުގެ ރައީސް މުޙައްމަދު ނަޝީދު އަވަހާރަކޮށްލުމަށް ދިން ހަމަލާއާއި ގުޅިގެން މަޖިލީހުން އެކުލަވާލި އިންކުއަރީ ރިޕޯޓްގައި ހިމަނާފައިވާ ކަންތައްތަކުގެ ތެރެއިން 38 ކަމަކީ މިހާރުވެސް އަމަލު ކުރެވި ކުރިއަށްދާ ކަންތައްތަކެއްކަމަށް ސަރުކާރުން ވަނީ ހާމަކޮށްފައެވެ. ނަޝީދަށް ދިން ހަމަލާއާއި ގުޅިގެން މަޖިލީހުން އެކުލަވާލި 242 ސޮފްހާގެ މައްޗަށް އެކުލަވާލާފައި ވާ ރިޕޯޓުގައި ފާހަގަކުރެވުނު 205 ކަމެއް ވަނީ ހިމަނާފައެވެ. މިއީ ގައުމީ ސަލާމަތާ ގުޅުންހުރި މައުލޫމާތު ހިމެނޭ ރިޕޯޓަކަށް ވާތީ މި ރިޕޯޓްގެ ބައެއް މައުލޫމާތުތަކީ ސިއްރުކޮށްފައިވާ މައުލޫމާތުތަކެވެ. ކޮމިޓީ ރިޕޯޓް ޖުމްލަ 45 ރިކޮމެންޑާޝަނެއް ހިމެނެއެވެ. މީގެތެރޭގައި ސިފައިން ހަތިޔާރާއެކު ރައީސް ނަޝީދުގެ ގެކޮޅު މޮނިޓަރ ކުރުން ހިމެނެއެވެެ.
މެއި 6 ކޮމެޓީން ކުރަމުންދާ މަސައްކަތްތަކާއި ގުޅިގެން އަފީފް ވިދާޅުއީ އިއްޔެ ނޭޝަނަލް ސެކިއުރިޓީ އެޑްވައިޒަރީ ކޮމިޓީއާއި ބައްދަލު ވެފައިވާކަމަށެވެ. އެބައްދަލުވުމުގައި އެބޭފުޅުން ވިދާޅުވެފައިވަނީ ހަމަލާއި ގުޅިގެން ތިން މަރުހަލާއެއްގައި ކަންކަން ތަންފީޒު ކުރަމުންދާކަމަށެވެ. އެގޮތުން ކުރު ރާސްތާ، މެދު ރާސްތާ، އަދި ދުރު ރާސްތާ ގޮތެއްގައި ތަންފީޒު ކުރުމަށް ހަމަޖެހިފައިވާކަމަށެވެ.
މީގެ ތެރެއިން ބައެއްކަންކަން ދައުރު ރިޔާސީ ދައުރު ނިމޭއިރު ތަންފީޒު ކުރެވެން ފަށާނެކަމަށް ވިދާޅުވެފައިވާކަމަށެވެ. ރައްޔިތުންގެ މަޖިލީހުގެ ރައީސް ރައީސް މުޙައްމަދު ނަޝީދަށް ދިން ނުރައްކާތެރި ޓެރަރިސްޓު ހަމަލާގެ ޖިނާޢީ ތަހުޤީގު ކުރިއަށްދާގޮތް ބެއްލެވުމަށް އެމަނިކުފާނުގެ ފަރާތްޕުޅުން އިނގިރޭސިވިލާތުގެ ވަކީލަކު ވަނީ ހަމަޖައްސާފައެވެ.
މިދިޔަ މެއި މަހުގެ 6ވަނަ ދުވަހު ރައީސް ނަޝީދު އަވަހާރަކޮއްލަންދިން ހަމަލާއާ ގުޅިގެން ރައްޔިތުންގެ މަޖިލީހުން ތައްޔާރުކުރި އިންކުއަރީ ރިޕޯޓުގައިވާ ކަންކަމަށް ބަލައި އަވަސް ފިޔަވަޅު ނާޅައިފިނަމަ ދިވެހި ރައްޔިތުންނަށް ބޮޑު ގެއްލުމަކާ ކުރިމަތިލާން ޖެހިދާނެކަމަށް ރައީސް ނަޝީދުވަނީ ވިދާޅުވެފައެވެ. އެގޮތުން އިންކުއަރީ ރިޕޯޓުގައި ސަލާމަތީ ޚިދުމަތްތަކުގެ ތެރޭގައި ކަންބޮޑުވާންޖެހޭ ބައެއްކަންކަން ހިނގަމުންދާކަން ފާހަގަކުރެވޭކަމަށާއި އެކަންކަން އަވަހަށް ރަނގަޅުކުރެއްވުމަށާއި، ރިޕޯޓުގައި އިސްލާޙުކުރަން ހިމަނާފައިވާ ކަންކަމާއި ހުށައެޅުންތަކާއި އިރުޝާދުތައް ބަލައިގަނެ އެގޮތަށް ރައީސުލްޖުމްހޫރިއްޔާ ބަލައިގަތުމަކީ ރައްޔިތުންނަށް މިވަގުތު އެންމެ ބޭނުންތެރިކަމެއްކަމަށްވެސް ރައީސް ނަޝީދު ވިދާޅުވިއެވެ.
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށްދިން ބޮމުގެ ހަަމަލާގެ ތަހުޤީޤުގައި ދެން އަމާޒުކުރާނީ މިކަމަށް ފައިސާ ހަރަދުކޮށްފައިވާ ގޮތް ބެލުމަށްކަމަށް، ޙަމަލާގެ ތަޙުޤީޤު ކުރިއަށްދާގޮތް ބެއްލެވުމަށް ރައީސުލްޖުމްހޫރިއްޔާ އައްޔަންކުރެއްވި ޚާއްސަ މަންދޫބު، އައްބާސް ފާއިޒްވަނީ ވިދާޅުވެފައެވެ.
