ރާއްޖޭގެ ބާޒާރުގައި ވިއްކާ ކަނޑުމަހުގެ ބައެއް ބާވަތްތައް ކާބަން މޮނޮކްސައިޑް ޓްރީޓް ކޮށްގެން ލޭބަލްގައި އެ މަޢުލޫމާތު ނުހިމަނާ ވިއްކަމުން ދާކަން ފާހަގަވެފައި ވާތީ ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީން އަންގައިފިއެވެ.
ރާއްޖޭގެ ބާޒާރުގައި ވިއްކާ ކަނޑުމަހުގެ ބައެއް ބާވަތްތައް އޭގެ ރަތް ކުލަ ހިފެހެއްޓުމަށްޓަކައި ކާބަން މޮނޮކްސައިޑް ޓްރީޓް ކޮށްގެން ލޭބަލްގައި އެ މަޢުލޫމާތު ނުހިމަނާ ވިއްކަމުން ދާކަން އެ އޮތޯރިޓީން ނެގި ސާންޕަލުން ކަށަވަރު ކުރެވިފައި ވާކަމަށް އެމްއެފްޑީއޭ އިން ބުނެއެވެ.
ކާބަން މޮނޮކްސައިޑް ޓްރީޓްމަންޓް ދިނުމުން ކަނޑުމަހުގެ ބާވަތްތަކަށް ގެނެސްދޭ ތާޒާ ރަތްކުލައަކީ ރޯ މަހުގެ ތާޒާކަން ގެއްލުނަސް އެކުލަ ބަދަލުނުވާ ކުލައެކެވެ. އަދި ރޯމަހުގެ ކުލައަކީ އޭގެ ތާޒާކަން ބެލުމަށް ބަލާ އެއްމިންގަނޑު ކަމުން، ކާބަން މޮނޮކްސައިޑުން ޓްރީޓް ކުރުމަކީ މަހުގެ އަސްލު ކުލަ ފޮރުވި ގަންނަފަރާތަށް އޭގެ ތާޒާކަން އޮޅޭނެ ފުރުޞަތު އޮތްކަމެކެއްކަން ފުޑް އެންޑް ޑްރަގް އޮތޯރިޓީން ފާހަގަކުރެއެވެ.
ވީމާ މަހުގެ ވިޔަފާރިކުރާ ފަރާތްތަކާއި މަސް ގަނެ ބޭނުންކުރާ ފަރާތްތަކުން މިކަމަށް ސަމާލުވުމަށް އެމްއެފްޑީއޭ އިން އިލްތިމާސްކުރެވެ. އަދި މިފަދަ އުފެއްދުން ވިއްކަން ހުރިނަމަ ނުވަތަ ޝައްކުވާނަމަ އެ އޮތޯރިޓީގެ ވައިބަރ ނަންބަރު 7603204 އަށް ފޮޓޯއާއެކު މަޢުލޫމާތު ހިއްސާ ކޮށްދިނުމަށްވެސް އެ އޮތޯރިޓީން އެދެއެވެ.
