މަކަރާއި ހީލަތުން ފައިސާ ހޯދުމުގެ މައްސަލައެއްގެ ތަހުގީގަށް މީހަކު ހޯދުމަށް ފުލުހުން އިއުލާންކޮށްފިއެވެ.
ފުލުހުން ބުނީ މަކަރާއި ހީލަތުން ފައިސާ ހޯދުމުގެ މައްސަލައަކާ ގުޅިގެން ތަހުގީގަށް ހޯދަމުންގެންދަނީ ސ. މަރަދޫ، މީނާޒް، އުމުރުން 43 އަހަރުގެ މައުމޫން ނާޞިރު ކަމަށެވެ.
އޭނާ ހާޒިރު ކުރަނީ ފުލުހުންގެ ޚިދުމަތުގެ އިކޮނޮމިކް ކްރައިމް ޑިޕާޓްމަންޓުން ތަހުގީގު ކުރަމުން ގެންދާ މަކަރާއި ހީލަތުން ފައިސާ ހޯދުމުގެ މައްސަލައަކާ ގުޅިގެން ކަމަށް ފުލުހުން ބުނެއެވެ.
ވީމާ މަޢުމޫން ނާޞިރުއާ ގުޅޭ އެއްވެސް މައުލޫމާތެއް ލިބިފައިވާނަމަ އިކޮނޮމިކް ކްރައިމް ޑިޕާޓްމަންޓުގެ ނަމްބަރު 9790048 އަށް އެމައުލޫމާތެއް ހިއްސާކުރުމަށް ފުލުހުން ވަނީ އެދިފައެވެ.
މި މައްސަލައިގެ ތަހުގީގަށް މައުމޫން ނާޞިރު ހާޒިރުކުރުމަށް ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާތީ، ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެމަތިން ތަހުގީގަށް ހާޒިރުވުމަށް އަންގައި މިމަހުގެ 3 ވަނަ ދުވަހު ފުލުހުން އާންމުކޮށް އިއުލާންކޮށްފައި ވެއެވެ. އަދި މިމަހުގެ 10 ވަނަ ދުވަހު ފުލުހުންގެ މައި އިދާރާއަށް ހާޒިރުވުމަށް އަންގާފައި ވެއެވެ.
އެހެންނަމަވެސް އެ އެންގުމާއި އެއްގޮތަށް ހާޒިރުވެފައި ނުވުމުން އޭނާ ހޯދުމުގައި އާންމުންގެ އެހޯތެރިކަމަށް ފުލުހުން ވަނީ އެދިފައެވެ.
