އަފްއާނިސްތާނުގައި އަލަށް އުފެދިގެންދާ ސަރުކާރު އެގައުމުން ބަލައިގަންނާނެ ހަމައެކަނި ގޮތަކީ، އަފްއާނިސްތާނުގައި އަލަށް އުފެދޭ ސަރުކާރުން އަންހެނުންގެ ހައްގުތައް ރައްކާތެރިކޮށް، އަލްގައިދާފަދަ ހައްދުފަހަނަ އަޅާފައިވާ ޖަމާއަތްތަކަށް ތާޢީދު ނުކުރުން ކަމުގައި، އެމެރިކާއިން ބުނެފިއެވެ.
"އަހަރެމެން އަފްއާނިސްތާނު ސަރުކާރު ބަލައިގަތުމާއި ނުގަތުން ބިނާވެގެންދާނީ އެގައުމުގައި އުފެދޭ ސަރުކާރުން އަމަލުކުރާ ގޮތެއްގެ މައްޗަށް. އެކަން ބިނާވެގެންދާނި ތާލިބާނުންގެ އަމަލުތަކުގެ މައްޗަށް،" އެމެރިކާގެ ސަރުކާރުން އަގްއާނިސްތާނުގެ އާ ސަރުކާރު ބަލައިގަތުމާއި ގުޅޭގޮތުން ރިޕޯޓަރުން ކުރި ސުވާލުތަކަށް ޖަވާބު ދެއްވަމުން ސްޓޭޓް ޑިޕާޓްމަންޓްގެ ތަރުޖަމާން ނެޑް ޕްރައިސް ވިދާޅުވެފައި ވެއެވެ.
"އެ ސަރުކާރު ވާންޖެހޭނީ، އިންސާނީ ހައްގުތައް ރައްކާތެރި ކޮށްދޭ ސަރުކާރަކަށް، އަދި، އެގައުމުގެ އަބާދީގެ ދެބައިކޮށްފަ އެއްބައި ކަމުގައިވާ އަންހެނުންނާއި އަންހެން ކުދިންގެ ހައްގުތައް ރައްކަތެރި ކޮށްދޭ، ޓެރަރިސްޓުންނަށް ހިމާޔަތް ނުދޭ ސަރުކާރަކަށް."
އޭނާ ވިދާޅުވީ، އެމެރިކާ ސަރުކާރުން އަފްއާނިސްތާނަށް ކަޑައަޅާފައި ހުރި މަންދޫބު ޒަލްމީ ޚަލީލްޒާދު އަދިވެސް ހުންނެވީ، ތާލިބާނުންގެ ސިޔާސީ މަރުކަޒު ކަމުގައިވާ ގަތަރުގައި ކަމުގައެވެ. އަދި ވިދާޅުވީ އޭނާ އަދިވެސް ގެންދަނީ ޤަތަރުގައި ހުންނަވައިގެން ތާލިބާނުންނާ މަޝްވަރާ ކުރައްވަމުން ކަމުގައެވެ.
އެމެރިކާއިން 20 އަހަރުވަންދެން ފޯރުކޮށްދެމުން އައި އަސްކަރީ އެހީތެރިކަން ހުއްޓުމަކަށް އައުމާއެކު، ތާލިބާނުންވަނީ، އެމެރިކާއިން ތާޢީދުކޮށްގެން އަފްއާނިސްތާނުގައި ވެރިކަން ކުރަމުން އައި ސަރުކާރު، މިހަފްތާގެ އާދީއްތަދުވަހު ވައްޓާލާފައެވެ.
ތާލިބާނުންނަކީ 1996 ވަނަ އަހަރުންފެށިގެން 2001ވަނަ އަހަރުގެ ނިޔަލަށް އަފްއާނިސްތާނުގައި ވެރިކަން ކުރި ޖަމާއަތެކެވެ. އެ ޖަމާއަތުގެ ވެރިކަމުގައި އޭރު އަފްއާނިސްތާނުގައި ވަނީ، އިސްލާމީ ޝަރީޢަތުގެ ނަމުގައި، އަންހެން ކުދިން ސްކޫލްތަކަށް ދިއުން މަނާކުރުންފަދަ ހަށުކަށި އެތަކެއް އުސޫލުތަކެއް އާންމުކޮށް ތަންފީޒު ކޮށްފައެވެ.
