ޤައުމީ ޔުނިވާސިޓީން މުވައްޒަފުންނާއި ދަރިވަރުންގެ ވިސްނުން އަޅުވެތިކުރުމަކީ ޣައިރުޤާނޫނީ ކަމެއް ކަމުގައި ކުރީގެ ނާއިބް ރައީސް ޑރ.މުހައްމަދު ޖަމީލް އަހުމަދު ވިދާޅުވެއްޖެއެވެ.
ސިޔާސީ މަޤާމުތަކުގައި ތިބޭ މީހުންނާމެދު ރުޅިވެރިކަން އުފެދޭ ގޮތަށް މީސްމީޑިޔާ ބޭނުންކުރުން ޤައުމީ ޔުނިވާސިޓީގެ މުވައްޒަފުންނަށް މަނާކޮށް އެކުލަވާލާފައިވާ އުސޫލަށް ފަޑުވިދާޅުވެ ޑރ.ޖަމީލް ވިދާޅުވީ ޤައުމީ ޔުނިވަރސިޓީގައި މިހާރު ފަތުރަން އުޅެނީ ޤާނޫނުއަސާސީއާ ޚިލާފް ވިސްނުންތަކެއް ކަމުގައެވެ. ޔުނިވާސިޓީއަކީ އިލްމީ ވިސްނުމާއި، އިޖުތިމާއީ ވިސްނުން ތަން މިނަށް ހުޅުވާލެވެންޖެހޭ ތަނަކަށްވާއިރު، ވިސްނުން އަޅުވެރިވާ ގޮތަށް އަމަލު ކުރުމަކީ ޤާނޫނީ ރޫހާއި ޚިލާފް ކަމެއްކަމަށް ޑރ.ޖަމީލް ވިދާޅުވިއެވެ.
ޤައުމީ ޔުނިވަރސިޓީގައި މިހާރު ފަތުރަން އުޅެނީ ޤާނޫނުއަސާސީއާ ޚިލާފް ވިސްނުންތައް. ޔުނިވަރސިޓީތަކަކީ ޢިލްމީ، ޤާނޫނީ އަދި ޢިޖްތިމާޢީ ވިސްނުން ފުޅާކުރަން ދަސްކޮށްދޭންޖެހޭ ތަންތަން. ޔުނިވަރސިޓީއިން މުވައްޒަފުންނާއި ދަރިވަރުންގެ ވިސްނުން އަޅުވެތިކުރުމަކީ ޣައިރުޤާނޫނީ ކަމެއް.
– ޑރ.ޖަމީލް ވިދާޅުވިއެވެ.
ސަރުކާރާއި ދެކޮޅު ކޮމެންޓުތަކާއި، ސިޔާސީ މީހުންނަށް ކޮމެޓް ކުރުން އެމްއެންޔޫއިން މަނާކޮށްފި
ސޯޝަލް މީޑިއާގައި ޔުނިވާސިޓީ މުވައްޒަފުން ހާމަކުރުން އެކަށީގެންނުވާ ޚިޔާލުތައް ނުވަތަ ކޮންޓެންޓުގެ ތެރޭގައި ޤައުމުގެ ހަމަޖެހުމާއި އަމަން ގެއްލިދާނެ ނުވަތަ ޖަގަޑާ ނުވަތަ ގަޑުބަޑުކަމަށް މަގުދައްކައިފާނެ ކޮންޓެންޓު ހިމަނާފައިވެއެވެ. އަދި އިސްލާމްދީނަށް ތައުހީނުކުރާ ކޮންޓެންޓުވެސް ވަނީ މި ބާވަތުގެ ކޮންޓެންޓުގެ ތެރޭގައި ހިމަނާފައެވެ.
މީގެ އިތުރުން ރައްޔިތުން ހޮވާފައިވާ ސިޔާސީ މަޤާމެއްގައި ހުރި މީހަކަށް ނުވަތަ ރައީސުލްޖުމްހޫރިއްޔާ ޢައްޔަނުކުރާ މަޤާމެއްގައި ހުރި މީހަކާ މެދު ރުޅިވެރިކަން އުފައްދައިފާނެ ކޮންޓެންޓު ތަކާއި، ޔުނިވަރސިޓީ މަސްލަޙަތަށް ނޭދެވޭ އަސަރެއް ކޮށްފާނެ ކޮންޓެންޓުތަކުގެ އިތުރުން ކަމާބެހޭ ފަރާތްތަކުގެ ހުއްދަނެތި ހާމަ ކުރެވޭ ދަރިވަރުންގެ ނުވަތަ މުވައްޒަފުންގެ ނުވަތަ އެހެންވެސް ސިއްރު މަޢުލޫމާތު ހާމަ ނުކުރެވޭނެކަމަށް ވަނީ ބުނެފައެވެ.
މީގެ އިތުރުންވެސް މުވައްޒަފުންގެ މެދުގައި އޮންނަ އެއްގާނިކަން ގެއްލޭ ނުވަތަ ސުޕަރވައިޒަރުން މުވައްޒަފުންގެ ސުލޫކު ހިފެހެއްޓުމަށް ހުރަސް އެޅިދާނެ ކޮންޓެންޓުތަކާއި، ސްޕަރވައިޒަރަށް ވަފާތެރިކަމާއި އިތުބާރު ބޭނުންވާ މަސައްކަތު މާހައުލުގެ ގުޅުންތަކަށް ނޭދެވޭ އަސަރުކުރާ ކޮންޓެންޓުތަކާއި، މުވައްޒަފުންގެ ރަސްމީ މަސައްކަތް ކުރުމަށް ހުރަސް އެޅޭ ކޮންޓެންޓުގެ އިތުރުން ޔުނިވަރސިޓީގެ ޢާއްމު ޚިދުމަތްތަކާއި އޮޕަރޭޝަން އަށް ދަތިތަކެއް ކުރިމަތިވެދާނެ ކޮންޓެންޓު ނުކުރެވޭނެކަމަށް ވަނީ ކަނޑައަޅާފައެވެ.
މި ޤަވާޢިދުގައި ބުނެފައިވާ ގޮތުން އެއިން ކޮންޓެންޓެއް ހިއްސާކުރުމާ ގުޅިގެން އިސްލާހީ ފިޔަވަޅު އެޅުމުގައި ބަލާނީ އެ ކޮންޓެންޓުގެ ސަބަބުން ޔުނިވާސިޓީގެ މަސައްކަތް އޮމާންކޮށް ހަރުދަނާކޮށް ފޯރުކޮށްދިނުމަށް އެ ކޮންޓެންޓުން ކުރާ އަސަރަށެވެ. ގައުމީ ޔުނިވާސިޓީގެ ވަޒީފާއިން ދީނީ އިލްމުވެރިޔާ އަދި އެ ޔުނިވާސިޓީގެ އެސިސްޓަންޓް ޕްރޮފެސަރުގެ މަގާމުގައި ހުންނެވި ޑރ. މުހައްމަދު އިޔާޒް ވަކި ކުރި މައްސަލަ ވަޒީފާއާ ބެހޭ ޓްރައިބިއުނަލްއަށް ވަނީ ހުށަހަޅާފައެވެ.
