ޖަލުތަކުގެ ޙާލަތު ރަނގަޅުކޮށް ކުށްވެރިން ރިހެބިލިޓޭޓްކޮށް ކުށްވެރިންނަކީ އިސްލާޙްކުރެވިފައިވާ ހެޔޮ ބައެއްގެ ގޮތުގައި މުޖުތަމަޢަށް ނެރުމަށް ކުރަމުންދަނީ ނަމޫނާ މަސައްކަތެއް ކަމުގައި ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
މޯލްޑިވްސް ކަރެކްޝަނަލް ސަރވިސްގެ 50 ވަނަ އަހަރީ ދުވަހުގެ މުނާސަބަތުގައި ދެއްވި ޚާއްސަ ވީޑިއޯ މެސެޖެއްގައި މިނިސްޓަރ އިމްރާން ވިދާޅުވީ ޖަލުތަކުގެ ޙާލަތު ރަނގަޅުކޮށް ކުށްވެރިން ރިހެބިލިޓޭޓްކޮށް ކުށްވެރިންނަކީ އިސްލާޙްކުރެވިފައިވާ ހެޔޮ ބައެއްގެ ގޮތުގައި މުޖުތަމަޢަށް ނެރުމަށް ސަރުކާރުން ކުރައްވާ މަސައްކަތުގައި ކަރެކްޝަނަލް ސަރވިސްގެ މުޅި ލިޑަރޝިޕާއި ހުރިހާ އޮފިސަރުން ގުޅިގެން ކުރައްވާ މަސައްކަތަށް ނަމޫނާ މަސައްކަތެއް ކަމަށެވެ. އަދި ކަރެކްޝަނަލް ސަރވިސްގެ މަސައްކަތުން އަމާން ސުލްޙަވެރި މުޖުތަމަޢެއް ރާއްޖޭގައި ޤާއިމުކުރެވިގެން ދިއުމަކީ އެމަނިކުފާނުގެ ވަރަށް ބޮޑު އުއްމީދެއްކަމަށާއި، އެކަމުގައި އެންމެން އެކުވެ މަސައްކަތް ކުރުމަށް މިނިސްޓަރ ވަނީ އެދިވަޑައިގެންފައެވެ.
މޯލްޑިވްސް ކަރެކްޝަނަލް ސަރވިސްގެ 50 ވަނަ އަހަރީ ދުވަހުގެ ތަހުނިޔާ ދަންނަވަން.
ކުށްވެރިންނަކީ އިސްލާހުކުރެވިފައިވާ ހެޔޮބައެއްގެ ގޮތުގައި ނެރުމަށް ކުރަމުންގެންދާ މަސައްކަތުގައި @CorrectionsMv ލީޑަރޝިޕާއި، އޮފިސަރުން ކުރައްވާ މަސައްކަތަށް ޝުކުރިއްޔާ @ShimranAb pic.twitter.com/6nbkkinUjN— Home Ministry, MV (@HomeMinistrymv) August 14, 2021
މިނިސްޓަރ އިމްރާން ވިދާޅުވީ، މޯލްޑިވްސް ކަރެކްޝަނަލް ސަރވިސްއަކީ ވަކި ޚިދުމަތެއްގައި ގޮތުގައި ދޭން ފެށުމާއެކު ރާއްޖޭގައި ޒަމާނުންސުރެއް ކުށްވެރިން ބެލެހެއްޓުމުގެ ކަންކަން ކުރަމުންދިޔަ ނިޒާމަށް ހެޔޮ ބަދަލުތަކެއް އައިސް ކުރިއެރުންތަކެއް ލިބިފައިވާކަމަށެވެ. އަދި މުޖުތަމަޢެއް ކުށުގެ ވެށިންނާއި ނުރައްކަލުން ސަލާމަތްވެ ތިބުމަށްޓަކާ، ކުށް ކުރާ ފަރާތްތައް ބެލެހެއްޓުމަކީ މުހިއްމު ޒިންމާއެއްކަމަށްވެސް މިނިސްޓަރ ވިދާޅުވިއެވެ.
ދިވެހިރާއްޖޭގައި ޒަމާނުއްސުރެއް ކުށްވެރިން ބެލެހެއްޓުމުގެ ކަންކަން ބަދަލުވެ ތަރައްޤީވަމުން އައިސް މިއަދު ކަރެކްޝަނަލް ސަރވިސް ޚިދުމަތަކަށް ބަދަލުވެ ކުށްވެރިން ބެލެހެއްޓުމުގައި ރަނގަޅު ނިޒާމުތަކެއް ޤާއިމުކުރެވި ކަރެކްޝަނަލް ސަރވިސްގެ ފަރާތުން ކުށްވެރިން ރިހެބިލިޓޭޓްކުރެވި، ފަރުވާ ދެވި، އަދި ގިނަ ފަހަރަށް ހުނަރުތަކެއް ލައިދެވި މުޖުތަމަޢުއަށް ކުށްވެރިން ނެރުމުގެ ބޮޑެތި ޒިންމާތައް އަދާކުރުމުގެ މަސައްކަތް ސިސްޓަމެޓިކް ގޮތަކަށް ކުރެވެމުން ދިއުމަކީ އަޅުގަނޑު ހިތުން ވަރަށް މުހިއްމުކަމެއް.
– ހޯމް މިނިސްޓަރ އިމްރާން ވިދާޅުވިއެވެ.
ހޯމް މިނިސްޓަރގެ ތަޙުނިޔާގެ މެސެޖުގައި މޯލްޑިވްސް ކަރެކްޝަނަލް ސަރވިސްއަށް 50 އަހަރު ފުރޭ މުނާސަބަތުގައި އެ ސަރވިސްގެ އިސްވެރިންނަށާއި ހުރިހާ މުވައްޒަފުންނަށާއި މުވައްޒަފުންގެ އާއިލާތަކަށް ވަނީ ޝުކުރާއި ތަޙްނިޔާ އަރިސްކުރައްވާފައެވެ. އަދި ކަރެކްޝަނަލް ސަރވިސްއިން ރައްޔިތުންނަށް ފޯރުކޮށްދެމުން އަންނަ ޚިދުމަތަކީ އެ ޚިދުމަތުގެ ސަބަބުން ރައްޔިތުންގެ ސަލާމަތާއި ރައްކާތެރިކަމަށް މުހިއްމު ޚިދުމަތެއްކަން މިނިސްޓަރ ފާހަގަކުރެއްވިއެވެ.
