ކުރިއަށް އޮތް 2023ގެ ރިޔާސީ އިންތިޚާބުގައި، އެމްޑީޕީގެ ރިޔާސީ ޓިކެޓް މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ނުދެވޭނެކަމަށް އެމްޑީޕީގެ ޤައުމީ މަޖިލިސް މެމްބަރު ވިލިފުށީ ދާއިރާގެ މެމްބަރު ހަސަން އަފީފް ވިދާޅުވެއްޖެއެވެ.

ކުރިއަށް 2023ގެ ރިޔާސީ އިންތިޚާބުގައި ވާދަކުރެއްވުމާއިމެދު ރައީސް ޞާލިހު އަދި ވަކި ގޮތެއް ނިންމާފައި ނުވެއެވެ. އިއްޔެ ބޭއްވި ނޫސްވެރިންގެ ބައްދަލުވުމުގައިވެސް ރައީސް ވިދާޅުވީ ރައީސްކަން 5 އަހަރުގެ 2 ދައުރު ކުރުމުގެ ފުރުސަތު ކޮންމެ މީހަކަށްވެސް ލިބިފައިވާކަމަށެވެ. އެފުރުސަތު އެމަނިކުފާނަށްވެސް އޮތްކަމަށާއި، ނަމަވެސް އިސްކަން ދެއްވަނީ ވެފައިވަ ވައުދުތައް ފުއްދުމަށް ކަމަށެވެ. ފާއިތުވެދިޔަ ދޮޅު އަހަރެއްހާ ދުވަސް ފާއިތުވެދިޔައީ ކޯވިޑާއި ގުޅިގެން އެއްވެސް ކަމެއް ނުވެކަމަށާއި، ވެރިކަމަށް ވެ ވަޑައިގެންނެވި ވައުދުތަކުގެ ތެރެއިން ނުފުއްދި ގިނަ ވައުދުތަކެއް މިހާރުވެސް އެބަހުރިކަމަށް ރައީސް ވިދާޅުވިއެވެ.

އެމްޑީޕީގެ 2023 ގެ ރިޔާސީ ޓިކެޓާއި ގުޅޭގޮތުން ސަންގު ޓީވީގައި ވާހަކަ ދައްކަވަމުން އަފީފް ވިދާޅުވީ އެމްޑީޕީގެ އަސާސީ ގަވާއިދުގައި ޕާޓީގެ ރިޔާސީ ޓިކެޓް ދޭނެ އުސޫލުތަކެއް އޮންނަކަށެވެ. ރިޔާސީ ޓިކެޓަކީ އެމްޑީޕީގެ އެތެރޭގައި ބާއްވާ ޕްރައިމަރީއަކުން ދޭން ޕާޓީގެ އަސާސީ ގަވާއިދު ބުނާ އެއްޗެއްކަަށްވާއިރު ރައީސް ޞާލިހަށް ތަބަކަކަށް ލާފައި ޓިކެޓް ދޭންޖެހޭ އެއްވެސް ސަބަބެއް ނެތްކަމަށެވެ.

އަފީފް މިފަދަ ގޮތަކަށް ވިދާޅުވެފައިވާއިރު، އަފީފް ގެންދަވަނީ ރައީސް ޞާލިހަށް ނިސްބަތްކޮށް އެކި ތުހުތަތު ކުރައްވަމުންނެވެ. އަދި އަފީފް މަސައްކަތް ކުރައްވަމުންދަނީ އެމްޑީޕީގެ ރިޔާސީ ޓިކޓް ރައީސް ނަޝީދަށް ހޯއްދެވުމަށްކަމަށް އެމްޑީޕީގެ އިސް ބައެއް ބޭފުޅުން ވަނީ ވިދާޅުވެފައެވެ. އަފީފްވަނީ ދާދިފަހުން ރައީސް ޞާލިހަކީ އަދާލަތު ޕަޓީގެ މެމްބަރެއްކަމަށްވެސް ވިދާޅުވެފައެވެ. މިމައްސަލަ ބެލުމަށް ރައީސް ވަނީ އެމްޑީޕީގެ އިސްބޭފުޅުންނަށާއި، ކަމާއިބެހޭ ކޮމެޓީތަކަށްވެސް އަންގާފައެވެ.

އެމްޑީޕީގެ ރިޔާސީ ޓިކެޓަށް ރައީސް ނަޝީދާއި، ރައީސް ޞާލިހުގެ ވާދަވެރިކަން އޮތްއިރު، މިހާރު އެޕާޓީގެ ޤައުމީ މަޖިލީހާއި، ރައްޔިތުންގެ މަޖިލީހުގެ ކޮންޓްރޯލްވެސް އޮތީ ރައީް ޞާލިހުގެ އަތުގައެވެ.