ރައީސް އިބުރާހިމް މުހައްމަދު ސާލިހު ފަހަކަށް އައިސް ނޫސްވެރިންނާ ބައްދަލުކުރައްވާ، ބާއްވަވާ ކޮންމެ ބައްދަލުވުމަކީވެސް ޝައުގުން ފުރިގެންވާ ބައްދަލުވުމަކަށް، އެއްގޮތައްވުރެ ގިނަ ގޮތްގޮތުންވަނީ ވެގެން ގޮސްފައެވެ.

އަދި ވަކީން ޚާއްސަކޮށް، ފާއިތުވެދިޔަ އަހަރެއްހާ ދުވަހުގެ ތެރޭގައި ރައީސް ބާއްވަވަމުން ގެންދަވާ ނޫސްވެރިންގެ ބައްދަލުވުންތަކަށް، ނޫސްވެރިން ކުރާ އުއްމީދުތަކާއި، އަދި އެކަމަށް ނޫސްވެރިން ބޭނުވެފައި ތިބޭލެއް ބޮޑުކަންވެސް، ނޫސް ކޮންފަރެންސް ކުރިޔަށްދާ ގޮތާމެދު ވިސްނާލުމުން ވަރަށް ބޮޑަށް ފާހަގަ ކޮށްލެވެއެވެ.

އަދި ހަމަ އެއާއެކު، މި ބައްދަލުވުންތަކަށް، ރާއްޖޭގައި ހިންގާ ގިނަ އަދަދެއްގެ ނޫސްތަކުން ނޫސްވެރިން ހާޒިރުވާއިރު، ޕްރެސްތަކަށްފަހު ތަފާތު އެކި ސުރުޙީތަކުން ރައީސްގެ ވާހަކަފުޅުތައް ކަވަރު ކޮށްފައި ހުންނަ ގޮތުންނާއި އަދި މިންވަރުންވެސް މިކަން ވަރަށް ބޮޑަށް ފާހަގަވެގެން ދެއެވެ. އަދި ހަމަ އެފަދައިން، ނޫސްވެރިން ކުރަން ބޭނުން ވެފައި ތިބޭ ސުވާލުތަކުގެ އަދަދު ގިނަކަންވެސް، އާންމޮކޮށް ގަޑިއެއް ހާއިރަށް ނުވަތަ ދޮޅު ގަޑިއެއް ހާއިރަށް ދިގު ދެމިގެންދާ މި ޕްރެސް ކޮންފަރެންސްތަކުން ވަރަށްވެސް ރަގަޅަށް ދޭހަވެގެން ދެއެވެ.

މިގޮތުން ރައީސް އިބުރާހިމް މުހައްމަދު ސޯލިހު ދެއްވާ ޕްރެސް ކޮންފަރެންސް ތަކުގައި، އެދުވަސްވަރެއްގައި ޚާއްސަކޮށް ރާއްޖޭގެ ސިޔާސީ މަސްރަހުގައި އެންމެ ހޫނުކޮށް ދެކެވޭ ވާހަކަތަކާއި އަދި ހިގާ ކަންކަމާއި ގުޅުވައިގެން ސުވާލުކުރުމުގެ ފުރުސަތު ނޫސްވެރިންނަށް ހިފެއްހެއްޓުމެއްނެތި ހުޅުވާލެވިފައި ވާއިރު، މީގެތެރެއިންވެސް، މެދު ކެނޑުމެއްނެތި ބައެއް ނޫސްވެރިންގެ ސަމާލުކަން ހުއްޓިފައިވާ، އަދި ކޮންމެ ޕްރެސް ކޮންފަރެންސެއްގައިވެސް ތަކުރާރު ވަމުންދާ ބައެއް ސުވާތައްވެސް، ފަހަކަށް އައިސް ބާއްވަމުން ގެންދަވާ ރައީސްގެ ހުރިހާ ޕްރެސްތަކުންވެސް ދަނީ ފާހަގަ ވަމުންނެވެ.

2023ގައި ރައީސްކަމަށް ކުރިމަތި ލައްވާނަންތޯ؟

ކޯވިޑް19ގެ ނުރައްކާތެރިކަމުގެ ސަބަބުން، ނޫސްވެރިންނާ އެއްތަނަކުން ބައްދަލުކުރައްވާ ރައީސް ސާލިހުއަށް ފަހަކަށް އައިސް ބޭއްވިފައިވަނީ މަދު ޕްރެސްތަކެއްކަން ފާހަގަ ކޮށްލެވެއެވެ. އެހެންނަމަވެސް، އޮންލައިންކޮށް، ކޯވިޑަށް ޚާއްސަކޮށްގެން ގިނަ ޕްރެސްތަކެއް ރައީސް ބައިވެރިވެ ވަޑައިގެން ބާއްވާފައިވި ނަމަވެސް، އެ ޕްރެސްތަކާ ޚިލާފަށް ނޫސްވެރިންގެ ހާޒިރުގައި ޖަވާބު ދެއްވާ އުސޫލުން ރައީސް އޮފީހުގައި ބާއްވަމުން ގެންދަވާ ޕްރެސްތަކަކީ، އާންމުކޮށް ހުޅުވާލެވިގެން ނޫސްވެރިންނަށް ސުވާލުކުރުމުގެ ފުރުސަތު ލިބިދެވޭ ގޮތަށް ބާއްވަމުން ގެންދަވާ ޕްރެސްތަކެކެވެ.

މިގޮތުން، މިއުސޫލުން ފަހަކަށް އައިސް ރައީސް ސާލިހު ބޭއްވެވި ހުރިހާ ޕްރެސް ކޮންފަރެންސް ތަކުގައިވެސް ބައެއް ނޫސްވެރިންވަނީ ތަކުރާރުކޮށް ހަމަ އެއްސުވާލެއް އެމަނިކްފާނަށް އަމާޒުކުރައްވާފައެވެ. އެއީ 2023ގެ ރިޔާސީ އިންތިޚާބުގައި ވާދަ ކުރެއްވުމާމެދު އެމަނިކްފާނު ގެންގުޅުއްވާ ވިސްނުންފުޅާ ގުޅޭގޮތުންނެވެ.

ރައީސް ސާލިހުގެ ވެރިކަމުގައި، ނޫސްވެރިންނާ ބައްދަލު ކުރައްވާ ބާއްވަމުން ގެންދަވާ ޕްރެސްތަކުގައި، އެމަނިކްފާނު ފާހަގަ ވެގެން ގޮސްފައިވަނީ، ނޫސްވެރިންގެ ގިނަ ސުވާލުތަކަށް ސީދާ ޖަވާބު ދެއްވުމުގެ ބަދަލުގައި ޑިޕްލޮމެޓިކް ޖަވާބުން (ގިނަ މަސްލަހަތުތަކަށް ވަރަށް ބޮޑަށް ބެއްލެވުމަށްފަހު) ޖަވާބު ދެއްވަމުން ގެންދަވާ ބޭފުޅެއްގެ ގޮތުގައެވެ.

މިގޮތުން ހަމަ މިސުވާލު ފާއިތުވެދިޔަ ތަނުގައި ރައީސް ސާލިހާ ކުރިމަތިވެގެން ދިއުމުން މިހާތަނަށް ދެއްވާފައިވާ ޖަވާބަކަށް ވެގެން ދިޔައީ، ވެރިކަަމށް ވަޑައިގެންނެވީ، އިންތިޚާބުގެ ތެރޭގައި ވެވަޑައިގެންނެވި ވައްދުތައް ފުއްދެވުމަށްކަމަށާއި، 2023ގެ ރިޔާސީ އިންތިޚާބުގެ ކުރިން އެންމެ ބޮޑު ސަމާލުކަމެއް ދެއްވާނީވެސް ވެވަޑައިގެންނެވި ވައުދުތައް ފުއްދެވުމަށް ކަމަށެވެ.

އަދި އޭރު ވިދާޅުވެފައިވަނީ، އެމަނިކްފާނު ގަބޫލު ކުރައްވާ ގޮތުގައި 2023ގެ ރިޔާސީ އިންތިޚާބުގެ ވާހަކަ ދައްކަވަންވާނީ ވެވަޑައިގެންނެވި ވައުދުތައް ފުއްދެވުމަށްފަހުގައި ކަމަށާއި، އެހެންކަމުން އެންމެ ބޮޑު އިސްކަމެއް ދެއްވާނީ އެ ވައުދުތައް ފުއްދެވުމަށް ކަމަށެވެ.

އެއް ސުވާލަކަށް ތަފާތު ޖަވާބެއް!

ފާއިތުވެދިޔަ ތަނުގައި ރައީސް އޮފީހުގައި ބޭއްވިގެންދިޔަ ޕްރެސްތެކެކޭވެސް އެއްފަދައިން އިއްޔެ ބޭއްވިގެން ދިޔަ ޕްރެސްއަކީވެސް، މިހާރުގެ ސިޔާސީ މަސްރަހުގައި ހިގަމުންދާ ބޮޑެތި ކޯޅުންތަކާ ގުޅުންހުރި ގިނަ ސުވާކުތަކެއް ނޫސްވެރިން ރައީސް ސާލިހުއާ ކުރިމަތި ކުރުވި ޕްރެސް އެކެވެ.

އަދި މީގެތެރެއިންވެސް އެންމެ ބޮޑަށް ފާހަގަވެގެން ދިޔަ އެއް ސުވާލަކީ ކޮންމެ ޕްރެސްއެއްގައިވެސް ބައެއް ނޫސްވެރިން ރައީސް ސާލިހުއާ އަމާޒުކުރާ، 2023ގެ ރިޔާސީ އިންތިޚާބުގައި ވާދަކުރުމުގާ ގުޅޭގޮތުން ކުރިމަތި ކުރުވި ސުވާލެވެ. އަދި މިފަހަރުގެ ޕްރެސް ކޮންފަރެންސްގައި އެއް ނޫސްވެރިޔަކަށްވުރެ ގިނަ ނޫސްވެރިން މިސުވާލު ތަކުރާރުކޮށް ރައީސްއާއި ކުރިމަތި ކުރުވިކަންވެސް ފާހަގަ ކޮށްލެވެއެވެ.

މިގޮތުން އިއްޔެގެ ޕްރެސް ކޮންފަރެންސްގައި ނޫސްވެރިން ތަކުރާރުކޮށް ކުރި، މި ސުވާލަށް ތަފާތު ޖަވާބެއް ނޫސްވެރިންނަކަށް ރައީސްގެ ކިބައިން ހޯދައެއް ނުގަނެވެވުނެވެ. 2023ގެ ރިޔާސީ އިންތިޚާބުގައި ވާދަކުރައްވާނެ ކަމަށްވެސް، ނުވަތަ ނުކުރައްވާނެ ކަމަށްވެސް ސީދާކޮށް ވިދާޅުވެ ނުދެއްވިއެވެ. އޭގެ ބަދަލުގައި ވިދާޅުވީ، 2023ގެ ކުރިން، ހުރިހާ ފޯކަސްއެއްވެސް ގެންގުޅުއްވާނީ ވެވަޑައިގެންނެވި ވައުދުތައް ފުއްދެވުމަށް ކަމަށެވެ.

އެހެންނަމަވެސް، ކޮންމެ ޕްރެސްއެއްގައިވެސް، ނޫސްވެރިންނަށް މުހިންމުވެފައިވާ މިސުވާލަށް މިފަހަރުގެ ޕްރެސް ކޮންފަރެންސްގައި ދެއްވާފައިވަނީ، ކުރީފަހަރަށްވުރެ ތަފްސީލީ ޖަވާބެއްކަން ފާހަގަ ކޮށްލެވެއެވެ.

2023ގައި ކުރިމަތި ލެއްވުމާއި ގުޅޭ ސުވާލަށް ޖަވާބު ދެއްވަން ފައްޓަވަމުންވެސް މިފަހަރު އެންމެ ފުރަތަމަ ވިދާޅުވެފައިވަނީ، މިހާރުގެ ގާނޫނު އަސާސީގައި ވާގޮތުން، ހުންނަވާ ރައީސަކަށް ދެދައުރު ފުރިހަމަ ކުރުމުގެ އިޚްތިޔާރު ލިބި ދީފައި އެބައޮތް ކަމަށާއި، އެހެންކަމުން އެމަނިކްފާނަށްވެސް އެފުރުސަތު އޮތްކަމުގައެވެ. އެއަށްފަހު ވިދާޅުވެފައިވަނީ، 2023ގެ ރިޔާސީ އިންތިޚާބުގެ ކުރިން އެންމެ ބޮޑު އިސްކަމެއް ދެއްވަމުން ގެންދަވަނީ ވެވަޑައިގެންނެވި ގިނަ ވައުދުތަކެއް ފުއްދެވުމަށް ކަމުގައެވެ.

ކޮންމެއަކަސް، ނޫސްވެރިންގެ ހިތުގައި އުފެދިފައިވާ މި ބޮޑު ސުވާލަށް ރައީސް ސާލިހު ސީދާ ގޮތެއްގައި ސާދާކޮށް ޖަވާބު ނުދެއްވި ކަމުގައިވި ނަމަވެސް، 2023ގެ ރިޔާސީ އިންތިޚާބުގައި ވާދަކުރެއްވުމުގެ ފުރުސަތު އެމަނިކްފާނަށްވެސް އޮތްކަމަށް އިއްޔެ ވިދާޅުވި ވިދާޅުވުން އެތައް ބަޔަކު އެތައް ގޮތަކަށް މޭރުން ކުރާނެކަން ޔަގީނެވެ.

އެތައް ގޮތަކަށް މޭރުން ކުރެވިދާނެ ޖަވާބެއް!

އިއްޔެ ރައީސް ސާލިހު ބޭއްވެވި ޕްރެސް ކޮންފަރެންސަކީ، މުހިންމު ވަގުތެއްގައި، އަދި ގިނަ ސުވާލުތަކަކަށް ނޫސްވެރިން ސީދާ އެމަނިކްފާނުގެ ޖަވާބަކަށް ބޭނުންވެ، އެކަމުގެ އިންތިޒާރީގައި ވަނިކޮށް ރައީސް އޮފީހުން އިންތިޒާމްކުރި ޕްރެސް ކޮންފަރެންސްއެކެވެ.

އަދި ޕްރެސް ކޮންފަރެންސްގައި ތަކުރާރުކޮށް އެއްސުވާލެއްގެ ގޮތުގައި ކުރެވިގެންދިޔަ، 2023ގެ ރިޔާސީ އިންތިޚާބުގައި ވާދަކުރުމާ ގުޅޭގޮތުން ނޫސްވެރިން ކުރި ސުވާލަށް ރައީސް ސާލިހު ސީދާ ޖަވާބެއް ނުދެއްވި ނަމަވެސް، މި ސުވާލު މިފަހަރު އެމަނިކްފަނާ އަމާޒުވެގެން ގޮސްފައި މިވަނީ، ޕާޓީގެ ތެރޭގައި ކޯޅުން ބޮޑުވެ، ރައީސް ނަޝީދު ސަރުކާރަށް ކުރާ ތާޢީދު އަބުރާ ގެންދަވާފައި ވަނިކޮށް، އަދި 2023ގެ ރިޔާސީ އިންތިޚާބުގައި ވާދަ ކުރައްވާނެކަންވެސް ނަޝީދު ފާޅުގައި އާންމުކޮށް އިއުލާން ކުރައްވާފައި ވަނިކޮށެވެ.

އެހެންނަމަވެސް ފާހަގަ ކޮށްލަންޖެހޭ ނުކުތާއަކީ، އެމްޑީޕީގެ އެތެރޭގައި ބޮޑެތި ގަޑުބަޑުތަކެއް އުފެދިގެން ގޮސްފައިވާ ދަނޑިވަޅެއްގައި، އަދި އެޕާޓީގެ އެންމެ އިސްފަރާތުގެ ހައިސިއްޔަތުން ހުންނަވާ، 2023ގެ ރިޔާސީ އިންތިޚާބަށް އެމަނިކްފާނު ވާދަ ކުރައްވާނެކަން އާންމުކޮށް، ރައީސް ސާލިހު އިއްޔެ އިއުލާން ކުރެއްވިނަމަ، ރިޔާސީ އިންތިޚާބަށް އަދި 2 އަހަރެއްހާ ދުވަސް ބާކީވަނިކޮށް، 2023ގެ ރިޔާސީ އިންތިޚާބުގެ ކެމްޕޭން ޕާޓީގެ ތެރޭގައި އިއުލާން ކުރެެއްވި ކުރެއްވުމެއްގެ ގޮތުގައި އެކަން ސިފަކުރެވިގެން ދިއުމަކީވެސް އެކަށީގެންވާ ކަމެއްކަމެވެ.

އަދި ހަމަ އެއާއެކު، ވެރިކަމުގައި ހުންނަވާ، ވެވަޑައިގެންނެވި ވައުދުތައް ފުއްދެވުމުގެ ބަދަލުގައި، ރިޔާސީ އިންތިޚާބަށް ކުރިމަތި ލައްވާނެކަން އާންމުކޮށް އިއުލާން ކުރެއްވުމުން، މުޅި ސަރުކާރުގެ ފޯކަސް ގެއްލި، ވައުދުތައް ފުއްދުމަށްވެސް އޭގެ ހިޔަނި އެޅުމަކީ އެކަށީގެންވާ ކަމެއްގެ ގޮތުގައިވެސް ރައީސް ސާލިހު ވިސްނަވާފަ އޮތުމަކީވެސް އެކަށީގެންވާ ކަމެކެވެ.

އަދި މިގޮތުން އުފެދޭ ވާދަވެރިކަމުގައި، މަސްރަހު އިތުރަށް ހޫނުވެ، ބޭނުމެއް ނެތްގޮތުގައި، ތަޅާފޮޅުމަށް ހަކަތައް އިތުރަށް ދުއްވާނުލާ މަޑުމަޑުން ހުންނަވާ، ކުރިޔަށް އޮތް، އެމްޑީޕީގެ ގައުމީ މަޖިލިސް އިންތިޚާބުތައްފަދަ މުހިންމު އިންތިޚާބުތައް ކާމިޔާބު ކުރައްވާ، ދެން ފަހަތަށް ފިޔަވަޅު އަޅުއްވަން ނުޖެހޭނެކަން ރަގަޅަށް ޔަގީން ކުރެއްވުމަށްފަހު، 2023ގެ ވާހަކަ ދައްކަވަން ރައީސް ސާލިހު ބޭނުންފުޅު ވަނީ ކަމަށް ވުންވެސް އެކަށީގެންވެއެވެ.

ކޮންމެއަކަސް، 2023ގެ ރިޔާސީ އިންތިޚާބުގައި ރައީސް ސާލިޙު ވާދަ ކުރެއްވުމާ ގުޅޭގޮތުން ނޫސްވެރިންގެ ހިތުގައި އުފެދިފައިވާ މިބޮޑު ސުވާލަށް، "ވާދަ ކުރެއްވުމުގެ ފުރުސަތު އެބަ އޮތް" ކަމަށް ވިދާޅުވެ މިފަހަރު ދެއްވި ޖަވާބުން، ސާފުވާން އޮތް އެއްކަމަކީ މި ސުވާލުގެ ޖަވާބު މިފަހަރު އިތުރަށް ތަފްސީލު ކޮށްދެއްވައިފި ކަމެވެ.

މި ތަފްސީލުގެ މައްޗަށް، ސިޔާސީ ވިސްނުމެއް ހުރި މީހެއްނަމަ، މިހާރު ޗާޓު ކުރައްސަވަން ވީއެވެ. ރައީސް ސާލިހު ކުރައްސަވަމުން ގެންދަވާ ޗާޓު އެމަނިކްފާނުގެ ޖަވާބުން ވަރަށްވެސް ސާފެވެ.