ފުޓުބޯޅައަކީ ދުނިޔޭގެ އެންމެ މަޝްހޫރި ކުޅިވަރެވެ. އަދި އެއީ ދުނިޔޭގެ އެންމެ ގިނަ މީހުން ތާއީދު ކުރާ އަދި ބަލާ ކުޅިވަރުވެސްމެއެވެ.

މިގޮތުން ފުޅުބޯޅަށް ތާއީދުކުރާ 5 ބިލިއަން މީހުން ދުނިޔޭގައި ތިބިއިރު، މި އިންޑަސްޓްރީގެ ތަރިންނަކީ މިއަދު ދުނިޔޭގައި އަދަޔާޚިލާފު ބޮޑު މުސާރައެއްވެސް ލިބެމުންދާ ކުޅުންތެރިކްނަވެސް ފާހަގަ ކޮށްލަން ޖެހެއެވެ.

ތިރީގައި މި ގެނެސްދެނީ، މިހާރު ދުނިޔޭގައި ތިބި، އެންމެ މުއްސަދި 5 ފުޓު ބޯޅަ ކުޅުންތެރިންނެވެ.

• 5. ޕައުލް ޕޮގްބާ: މިލްކިއްޔާތުގައި 200 މިލިއަން ޑޮލަރު

ޕްރިމިއަރ ލީގުގެ ކުލަބް މެންޗެސްޓަރ ޔުނައިޓެޑަށް ކުޅެމުންދާ، ފްރާންސްގެ މަސްހޫރު ފުޅުބޯޅަ ކުޅުންތެރިޔާގެ ޕައުލް ޕޮގްބާގެ އަމިއްލަ މިލްކިއްޔާތުގައި 200 މިލިއަން ޑޮލަރު ހުރިކަމުގައި ސްޕޯޓްސް ނިއުން މީޑީއާ ގޯލްއިން ހާމަ ކޮށްފައި ވެއެވެ.

ފްރާންސްގެ ގައުމީ ޓީމަށްވެސް ކުޅެމުންދާ، އުމުރުން 28 އަހަރުގެ މި ކުޅުންތެރިޔާ ކުރިން ކުޅެފައިވަނީ ޖުވެންޓަސް އެފްސީއަށެވެ.

ކޮންމެ ހަފްތާއަކު މުސާރައިގެ ގޮތުގައި 25 މިލިއަން ޑޮލަރުގެ އިތުރުން ތަފާތު ޕްރޮޑަކްތަކުގެ އެމްބެސެޑަރެއްގެ ހައިސިއްޔަތުން 4.5 މިލިއަންޑޮލަރު ލިބޭ، ޕޮގްބާއަކީ އިނގިރޭސިވިލާތުގައި ހުރި އެންމެ މުއްސަދި ފުޓުބޯޅަ ކުޅުންތެރިޔާއެވެ.

4. ގެރިތް ބޭލް: މިލްކިއްޔާތުގައި 250 މިލިއަން ޑޮލަރު

ސްޕޯޓްސް ނިއުސް މީޑީއާ ގޯލްއިން ހާމަ ކޮށްފައިވާ ގޮތުގައި، ރިއާލް މެޑްރިޑަށް ކުޅެމުންދާ ގެރިތު ބޭލްގެ މިލްކިއްޔާތުގައި 250 މިލިއަން ޑޮލަރު އެބަހުއްޓެވެ.

މީގެކުރިން އިނގިރޭސިވިލާތުގެ ޓޮޓެންހަމް ހޮޓްސްޕަރ އަށް ކުޅެފައިވާ، އުމުރުން 32 އަހަރުގެ، ވޭލްސްއަަށް ނިސްބަތްވާ މި އެތުލީޓުގެ އާމްދަނީގެ ބޮޑުބައެއް ނިސްބަތްވަނީ އޭނާ ކޮށްފައިވާ އިންވެސްޓްމަންޓްތަކުންނާއި އަދި ތަފާތު ޕްރޮޑަކްތައް ތަމްސީލު ކޮށްދީގެން ލިބޭ އާމްދަނީންނެވެ.

މިގޮތުން އޭނާގެ ސްޕޮންސަރޝިޕް ޑީލްތަކުގެ އަދަދު އެކަނިވެސް 6 މިލިއަން ޑޮލަރަށް އަރައެވެ.

3. ނޭމާރ ޖޭއާރު: މިލްކިއްޔާތުގައި 188 މިލިއަން ޑޮލަރު

ނޭމާރ ޖޭއާރު ކުޅެމުން އަންނަނީ ފްރާންސްގެ ފުޓުބޯޅަ ކުލަބެއް ކަމުގައިވާ ޕެރިސް ސައިންޓް ޖާމެއިން (PSG) އަށެވެ.

ސްޕޯޓްސް ވިސްރާއިން ހާމަ ކޮށްފައިވާ ގޮތުގައި، 2021 ވަނަ އަހަރާހަމައަށް، ބްރެޒިލްއަށް އުފަން، އުމުރުން 29 އަހަރުގެ މި ކުޅުންތެރިޔާގެ މިލްކިއްޔާތުގައި 188 މިލިއަން ޑޮލަރު އެބަހުއްޓެވެ.

އަދި ނޭމާރ އަކީ، ސޯޝަލްމީޑިއާގައި އެންމެ ގިނަމީހުން ފޮލޯ ކުރަމުންދާ އެއް ކުޅުންތެރިޔާވެސް މެއެވެ.

2. ލިއޮނެލް މެސީ: މިލްކިއްޔާތުގައި 400 މިލިއަން ޑޮލަރު

އާޖެންޓީނާއަށް އުފަން، މަޝްހޫރު ފުޓްބޯޅަ ކުޅުންތެރިޔާ ލިއޮނެލް މެސީގެ ބައިތުލްމާޅުގައި 400 މިލިއަން ޑޮލަރު އެބަހުއްޓެވެ.

އުމުރުން 33 އަހަރުގެ މެސީއަކީ، މިހަފްތާގެ އާދީއްތަ ދުވަހު އެކުލަބް ދޫކޮށްލުމުގެ ކުރިން އެފްސީ ބާސެލޯނާރއަށް ދިގުމުއްދަތެއް ވަންދެން ކުޅެމުން އައި ކުޅުންތެރިއެކެވެ.

މެސީއަކީ، މިހާރުގެ ދުނިޔޭގެ ފުޓްބޯޅަ އިންޑަސްޓްރީގައި ހުރި އެންމެ ކާމިޔާބު އެއް ކުޅުންތެރިޔާގެ އިތުރުން، ދުނިޔޭގެ ތާރީޚުގައިވެސް މިހާތަނަށް ދެކެފައިވާ އެންމެ ކުޅަދާނަ އެއް ކުޅުންތެރިޔާވެސް މެއެވެ.

ފޯރބްސް މަޖައްލާއިން ހާމަ ކޮށްފައިވާ ގޮތުގައި، ކްރިޓިއާނޯ ރޮނާލްޑޯގެ އިތުރުން، މެސީއަކީ، ދުނިޔޭގެ ތާރީޚު ދެކެފައިވާ ދެވަނަ ފުޓުބޯޅަ ބިލިއަނަރެވެ.

އަދި މެސީއަކީ ދުނިޔޭގައި މިވަގުތުހުރި އެންމެ މުއްސަދި 3ވަނަ ފުޓުބޯޅަ ކުޅުންތެރިޔާއެވެ. އެނާއަކީ، ކުޅިވަރުގެ މަޝްހޫރު ބްރޭންޑްތައް އިސްތިހާރު ކޮށްދީގެން އެންމެ ބޮޑު އާންމްދަނީއެއް ލިބެމުންދާ އެއްފަރާތްވެސް މެއެވެ.

1. ކުރިސްޓިއާނޯ ރޮނާލްޑޯ: މިލްކިއްޔާތުގައި 500 މިލިއަން ޑޮލަރު

ސްޕޯޓްސް ވިސްރާއިން ހާމަކޮށްފައިވާ ގޮތުގައި، މިހާރު ދުނިޔޭގައި ހުރި އެންމެ މަޝްހޫރު އެއް އެތުލީޓް ކަމުގައިވާ ކްރިސްޓިއާނޯ ރޮނާލްޑޯގެ ބައިތުލްމާލުގައި 500 މިލިއަން ޑޮލަރު އެބަހުއްޓެވެ.

ޕޯޗިގީޒަށް އުފަން ކުރިޓިއާނޯއަކީ އިޓަލީގެ ކުލަބެއް ކަމުގައިވާ ޖުވެންޓާސް ފުޓުބޯޅަ ކުލަބަށް ކުޅެމުންދާ ކުޅުންތެރިއެކެވެ.

2021 ވަނަ އަހަރަށް 36 އަހަރު ފުރޭ ކުރިސްޓިއާނޯ ރޮނާލްޑޯއަކީ، މިހާރު ދުނިޔޭގައި ހުރި އެންމެ މުއްސަދި ފުޓުބޯޅަ ކުޅުންތެރިޔާއެވެ. އަދި ފޯބްސް މަޖައްލާއިން ހާމަ ކޮށްފައިވާ ގޮތުގައި އޭނާއަކީ، ދުނިޔޭގެ ތާރީޚުގައިވެސް ބިލިއަނަރެއްގެ މަގާމް ހޯދި އެންމެ ފުރަތަމަ ފުޓްބޯޅަ ކުޅުންތެރިޔާއެވެ،