ތުހުމަތު ކުރެވުނު މައްސަލަތައް ސާބިތުނުވާ ކަމަށް ކުރިން ނިންމާފައިވަނިކޮށް، އަލަށް ފާސްކުރެވުނު ފުލުހުންގެ ޤާނޫނުގެ ދަށުން، ކުރިން ސާބިތު ނުވި މައްސަލަތަކާއި ގުޅުވައިގެން ފުލުހުންގެ އޮފިސަރުން ވަޒީފާއިން ވަކިކުރެވިގެން ނުވާނެ ކަމަށް ކްރިމިނަކް ކޯޓުގެ ކުރީގެ އިސް ޤާޒީ އަޙްމަދު ހައިލަމް ވިދާޅުވެއްޖެއެވެ.
ރައްޔިތުންގެ މަޖިލީހުން މިދިޔަ އަހަރު ފާސް ކުރި ފުލުހުންގެ ހިދުމަތުގެ ގާނޫނުގައިވާ ގޮތުން ކޮމިޝަންޑް އޮފިސަރުންގެ ތެރެއިން ކޮމިޝާނާ އޮފް ޕޮލިސް ފިޔަވައި، ސުޕްރިންޓެންޑެންޓް އޮފް ޕޮލިސްއިން ފެށިގެން މަތީ ރޭންކުގެ ކޮމިޝަންޑް އޮފިސަރުން، ފުލުހަކަށް ވީތީ އެމީހަކަށް ލިބިފައިވާ ގާނޫނީ ބާރާއި އިހްތިޔާރު ނަހަމަ ގޮތުގައި ބޭނުންކޮށް، ލާއިންސާނީ އަނިޔާވެރި އަމަލެއް ނުވަތަ ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތުކުރެވޭތޯ ބޯޑުން ބަލަން ޖެހެއެވެ.
އަދި އެފަދަ މައްސަލައެއް ދައުލަތުގެ އިދާރާއަކަށް ނުވަތަ ކޮމިޝަނަކަށް ރިޕޯޓުކުރެވިފައިވާ އޮފިސަރުންނަކީ މަގާމަށް އެކަށޭނަ ތައުލީމާއި ހުނަރާއި މަސައްކަތުގެ ތަޖުރިބާ އާއި ނަޒާހަތްތެރިކަން ހުރި އޮފިސަރުން ކަމާމެދު ގޮތެއް ޕޮލިސް ބޯޑުން ކަނޑައެޅަން ޖެހޭނެއެވެ.
އެކަމާ ގުޅިގެން ޕޮލިސް ބޯޑުން ރޭ ނެރުނު ބަޔާނެއްގައި ވަނީ ގާނޫނުން ޕޮލިސް ބޯޑާ ހަވާލުކޮށްފައިވާ އެއް މަސްއޫލިއްޔަތަކީ ކޮމިޝަންޑް އޮފިސަރުންގެ ތެރެއިން ކޮމިޝަނާ އޮފް ޕޮލިސް ފިޔަވައި، ސުޕްރިންޓެންޑެންޓް އޮފް ޕޮލިސްއިން ފެށިގެން މަތީ ރޭންކުގެ ކޮމިޝަންޑް އޮފިސަރުންނަކީ މަގާމަށް އެކަށޭނަ ތައުލީމާއި ހުނަރާއި މަސައްކަތުގެ ތަޖުރިބާ އާއި ނަޒާހަތްތެރިކަން ހުރި އޮފިސަރުން ކަމާމެދު ގޮތެއް ކަނޑައެޅުން ކަމަށެވެ.
އެގޮތުން އޮފިސަރުންގެ ގާބިލުކަން ވަޒަން ކުރުމަށް ކުރި މަސައްކަތަށް ކަނޑައެޅިފައިވާ ތާރީހަށް މަސައްކަތް ނިންމުމަށްފަހު، ގާނޫނުގައިވާ ގޮތުގެ މަތީން އެކަން ތަންފީޒު ކުރުމަށް ސީޕީ ހަމީދަށް ހުށަހަޅާފައިވާ ކަމަށް ބަޔާނުގައިވެއެވެ.
މަގާމުން ވަކިކުރުމަށް ފުލުހުންގެ ބޯޑުން ނިންމާފައި ވަނީ:
– އެސިސްޓެންޓް ކޮމިޝަނަރ ފަރުހާދު ފިކުރީ
– އެސިސްޓެންޓް ކޮމިޝަނަރ މުހައްމަދު ޖަމްޝީދު
– އެސިސްޓެންޓް ކޮމިޝަނަރ އަހުމަދު މުހައްމަދު
– ޗީފް ސުޕްރިންޓެންޑެންޓް އަބްދުﷲ ޝަރީފް
– ޗީފް ސުޕްރިންޓެންޑެންޓް އަހުމަދު ޝުހާދު
– ސުޕްރިންޓެންޑެންޓް މުހައްމަދު ދާއޫދު
– ސުޕްރިންޓެންޑެންޓް އިސްމާއީލް ޝަމީމް
މިކަމާގުޅިގެން ހައިލަމް ވިދާޅުވީ ކުރިން ތުހުމަތު ކުރެވުނު މައްސަލައެއް ސާބިތުނުވާކަމަށް ނިންމާފައި ވަނިކޮށް ހަމަ އެމައްސަލައާއި ގުޅުވައިގެން ވަޒީފާއިން ވަކިކުރުމަކީ ކުރެވިވެގެން ވާނެ ކަމެއް ނޫންކަމަށެވެ. އަދި ފުލުހުންނަށް ވަޒީފާގެ ބިރުދެއްކުން ހުއްޓާލުމަށްވެސް ހައިލަމް ވަނީ ގޮވާލައްވާފައެވެ.
މިމައްސަލާގައި ގިނަ ބަޔަކު ދަނީ ކަންބޮޑުވުން ފާޅު ކުރަމުންނެވެ. ފުލުހުންގެ މުއައްސަސާގެ ގިނަ ދުވަސްވީ ތަޖުރިބާހުރި ބޭފުޅުން ވަޒީފާއިން ވަކު ކުރުމަށް ކުއްލިއަކަށް ނިންމި ނިނުމަކީ ބަލައިގެނެވޭނެ ނިންމުމެއް ނޫންކަމަށް ގިނަ ބަޔަކު ދަނީ ބުނަމުންނެވެ.
ފުލުހުންގެ އިސް ގިނަ އޮފިޝަލުންތަކެއް ފުލުހުންގެ ޚިދުމަތުން ވަކިކުރުމަށް ޕޮލިސް ބޯޑުން ނިންމެވުމާއި ގުޅިގެން އެކަން ދިރާސާކުރައްވަމުން ގެންދަވާކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވަނީ ވިދާޅުވެފައެވެ.
