މިސްރުގެ ގަދީމީ ޒަމާނުގެ ރަސްކަލެއް ކަމުގައިވާ، ފިރުޢައުނު ޚުފޫއަށް ނިސްބަތްވާ، މިސްރުން މިހާތަނަށް ފެނިފައިވާ ލަކުޑިން ބަނދެފައިވާ އެންމެ ދުވަސްވީ އަދި އެންމެ ބޮޑު ބޯޓު، އެ ބޯޓު މިހާތަނަށް ބެހެއްޓިފައިވާ ގިޒާ ޕިރަމިޑްތަކުގެ ކައިރިން ނަގާ، މިސްރުގައި އަލަށް ބިނާ ކުރެވިފައިވާ ދާރުލްއާސާރަށް ފަރުވާތެރިކަމާއެކު ބަދަލު ކޮށްފިއެވެ.
އުމުރުން 4,600 ވެފައިވާ، ސޯލާރ ބޯޓުގެ ނަމުން ނަންދެވިފައިވާ މި ބޯޓު ދެން ބެހެއްޓުމަށް ހަމަޖެހިފައިވަނީ، މިއަހަރު ފަހުކޮޅު ހުޅުވުމަށް ހަމަޖެހިފައިވާ ގްރޭންޑް އިޖިޕްޝިއަން މިއުޒިއަމް (GEM)ގެ ކައިރީގައެވެ.
ފިރުއައުން ޚުފޫއަށް ނިސްބަތްވާ، ސޯލާރ ބޯޓުތަކުގެ ނަމުން ނަންދެވިފައިވާ މި ބޯޓުތައް އެތައް ޒަމާނެއްވަންދެން ވަޅުލެފިފައިހުރީ، އެ ޒަމާނުގައި ރަސްރަސްކަލުން ވަޅުލާ، ޝާހީ މަހާނަތަކާ ޖެހިގެން ހަދާފައިވާ ބޮޑެތި ވަޅުގަޑު ތަކުގައެވެ. އޭރުގެ ގަބޫލުކުރުމަކީ، މި ރަސްރަސްކަލުން އަވަހާރަ ވުމަށްފަހު، މި ބޯޓުތަކުގައި ރަސްރަސްކަލުންނަށް އާޚިރަތަށް ދަތުރު ކުރެވޭނެ ކަމަށެވެ.
"މި ބޯޓު އެއްތަނުން އަނެއްތަނަށް ބަދަލު ކުރުމުގެ ޕްރޮޖެކްޓަކީ، އިންސާނީ ތާރީޚުގައި، ލަކުޑިން ހަދާފައިވާ އެންމެ ބޮޑު އަދި އެންމެ ދުވަސްވީ، މި އުޅަނދު އޭގެ އަސްލާ އެއްގޮތަށް އަންނަން އޮތް ޖީލުތަކާހަމައަށް ވާސިލް ކޮށްދިނުން،" މިސްރުގެ ޓުއަރިޒަމް އެންޑް އެންޓިކުއިޓީސް މިނިސްޓްރީން ނެރެފައިވާ ބަޔާނެއްގައި ބުނެފައި ވެއެވެ.
ސިޑަރވުޑް (މީރުވަސް ދުވާ ވަރުގަދަ ލަކުޑިއެއް)އިން ބަނދެފައިވާ، ދިގު މިނުގައި 42 މީޓަރު (138 ފޫޓު) އަދި ބަރު މިނުގައި 20 ޓަނު ހުންނަ މި ބޮޑު ބޯޓު ބެހެއްޓުމަށް ހަމަޖެހިފައިވާ ހިސާބަށް ގެންދިއުމަށް 48 ގަޑިއިރު ހެދަ ވެފައިވެއެވެ.
މިސްރުގެ ޓުއަރިޒަމް އެންޑް އެންޓިކުއިޓީސް މިނިސްޓްރީން ބުނެފައިވާ ގޮތުގައި މި ބޯޓު ބަހައްޓަން ހަމަޖެހިފައިވާ ހިސާބަށް ގެންދެވިފައިވަނީ މި ހަފްތާގެ ހޮނިހިރު ދުވަހުގެ ހެނދުނުގެ ވަގުތެއްގައެވެ.
މިބޯޓު އާ ދާރުލްއާސާރަށް ގެންދެވިފައިވަނީ މެޓަލް ކޮށްޓެއްގައި މިބޯޓު އެކަނި ބަހައްޓައިގެން، މި މަސައްކަތަށް ޚާއްސަ ކޮށްގެން ހަދާ، ބެލްޖިއަމްއިން އެތެރެ ކޮށްފައިވާ، ރިމޯޓް ކޮންޓްރޯލް އުޅަދެއްގެ އެހީގައިކަމަށް، ގްރޭންޑް އިޖިޕްޝިއަން މިއުޒިއަމް (GEM)ގެ ސުޕަރވައިޒަރ ޖެނެރަލް އަތީފް މޮފްތާހު ވިދާޅުވެފައި ވެއެވެ.
މި ބޯޓަކީ، މިސްރުގެ ދެކުނުގައިވާ ގްރޭޓް ޕިރަމިޑް ސަރަހައްދުން 1954ވަނަ އަހަރު ފެނިފައިވާ ބޯޓެކެވެ. އެއަށްފަހު އެތައް އަހަރެއްވަންދެން މި ބޯޓު ބެހެއްޓިފައިވަނީ ގިޒާ ޕްލޭޓް ސަރައްހައްދުގައި، މި ބޯޓުގެ ނަމުން ނަންދެވިފައިވާ ދާރުލްއާސާރެއްގައެވެ.
މިސްރުން ބުނެފައިވަނީ، 17 އަހަރުވަންދެން އިމާރާތް ކުރެވެމުން އައިސްފައިވާ ގްރޭންޑް އިޖިޕްޝިއަން މިއުޒިއަމް (GEM) މިއަހަރު ފަހުކޮޅު ރަސްމީކޮށް ހުޅުވިގެން ދާއިރު، މި ދާރުލްއާސާރުގައި ތާރީޚީ 100،000 ތަކެތި ފެންނަން ހުންނާނެ ކަމުގައެެވެ.
މިސްރުގެ ފިރުއައުނު ޚުފޫއަށް ނިސްބަތްވާ ތާރީޚީ ބޯޓު އާ ދާރުލްއާސާރަށް ބަދަލު ކޮށްފި
ކޮމެންޓު ފޮނުވާ