ރާއްޖޭގެ ފުލުނުންގެ މުއައްސަސާގެ ހުރިހާ އޮފިސަރުންނާއި، ހުރިހާ ފަނޑިޔާރުން މަޤާމުތަކުން ވަކި ކުރިޔަސް ދެން އެމްޑީޕީއަކަށް ވެރިކަމެއް ނުލިބޭނެ ކަމުގައި ޕީއެންސީގެ ނާއިބް ރައީސް އިބްރާހިމް ޝުޖާ ވިދާޅުވެއްޖެއެވެ.
ފުލުހުންގެ އިދާރާ އިސްލާހުކުރަން އިސް އޮފިސަރުންތަކެއް މަގާމުން ވަކިކުރުމަށް ފުލުހުންގެ ބޯޑުން ނިންމި ނިންމުމާއި ގުޅިގެން ކުރެއްވި ޓްވީޓެއްގައި ޝުޖާ ވިދާޅުވީ ޕީޕީއެމްއިން ވެރިކަމާއި ހަވާލުވުމަށްފަހު ފުލުހުންގެ ޤާނޫނަށް ގެނެސްފައިވާ އިސްލާހު ބަދަލު ކުރާނެކަމަށެވެ. ބަދަލު ހިފުމުގެ ރޫހުގައި ފުލުހުންގެ މުއައްސަސާގެ އިސްކޮށް ތިބެވި އޮފިސަރުން މަޤާމުތަކުން ވަކިކުރުމަކީ މުޅި މުއައްސަސާއަށް ދެވޭ ގެއްލުމެއްކަމަށް ޝުޖާ ވިދާޅުވިއެވެ.
ފުލުހުންގެ ޤާނޫނަށް ގެނެވުނު އިސްލު ބަދަލު ކުރާނަން.ދިވެހި ފުލުހުންގެ ޚިދުމަތުގައި އިސްކޮށް ތިއްބެވި އިސް އޮފިސަރުން ވަކިކުރަނީ އެމް.ޑީ.ޕީ އިން ބަދަލު ހިފުމުގެ ރޫހުގައި. ސީޕީ ހަމީދު އެމަޤާމަށް އައި ގޮތްވެސް ފޯމިއުލާރ އަކަށް ފުދޭ.
– ޝުޖާ ވިދާޅުވިއެވެ.
ޝުޖާ ވިދާލުވީ ފުލުހުންގެ އޮފިސަރުންނާއި، ފަނޑިޔާރުން މަޤާމުތަކުން ވަކި ކުރި ކަމުގައިވީނަމަވެސް ދިވެހިން ތިބީ 2023 ގައި އެމްޑީޕީއަށް ބޮޑުތަނުން ނޫނެކޭ ބުނުމަށް ތައްޔާރަށް ކަމަށެވެ. އަޅުވެތިކަމުން ޤައުމު ސަލާމަތްކޮށް އަމާން އައްސޭރިއަކަށް ޕީޕީއެމްއާއިއެކު ކުރިއަށް ދިއުމަށް ދިވެހި ރައްޔިތުން ތިބި ކެތްމަދު ވެފައިކަމަށް ޝުޖާ ވިދާޅުވިއެވެ.
ހުރިހާ ފުލުސް އޮފިސަރުންނާއި، ހުރިހާ ފަނޑިޔާރުން މަޤާމުތަކުން ވަކިކުރިޔަސް ދިވެހިންތިބީ އެމް.ޑީ.ޕީ އަށް ވެެރިކަން ދޭގޮތަކަށް ނޫން. އަޅުވެތިކަމާ ދެކޮޅަށް މުޅި ޤަޢުމު ނުކުނާނެ. އިސްކޮށް އޮންނާނީ ޕީ.ޕީ.އެމް.
– ޝުޖާ ވިދާޅުވިއެވެ.
ފުލުހުންގެ އިސް އޮފިސަރުންތަކެއް މަގާމުން ވަކިކުރަން ޕޮލިސް ބޯޑުން ނިންމާފައި ވަނީ ރައްޔިތުންގެ މަޖިލީހުން މިދިޔަ އަހަރު ފާސް ކުރި ފުލުހުންގެ ހިދުމަތުގެ ގާނޫނުގެ ދަށުންނެވެ. އެގޮތުން ވަޒީފާއިން ވަކި ކުރަން ހަމަޖެހިފައި ވަނީ:
– ސުޕްރިންޓެންޑެންޓް މުހައްމަދު ދާއޫދު
– އެސިސްޓެންޓް ކޮމިޝަނަރު ފަރުހާދު ފިކުރީ
– ޗީފް ސުޕްރިންޓެންޑެންޓް އަހުމަދު ޝުހާދު
– އެސިސްޓެންޓް ޕޮލިސް ކޮމިޝަނަރު މުހައްމަދު ޖަމްޝީދު
– އެސިސްޓެންޓް ކޮމިޝަނަރު އަހުމަދު މުހައްމަދު
– ސުޕްރިންޓެންޑެންޓް އިސްމާއީލް ޝަމީމް
– ޗީފް ސުޕްރިންޓެންޑެންޓް އަބްދުﷲ ޝަރީފް
އެކަމާ ގުޅިގެން ޕޮލިސް ބޯޑުން ރޭ ނެރުނު ބަޔާނެއްގައި ވަނީ ގާނޫނުން ޕޮލިސް ބޯޑާ ހަވާލުކޮށްފައިވާ އެއް މަސްއޫލިއްޔަތަކީ ކޮމިޝަންޑް އޮފިސަރުންގެ ތެރެއިން ކޮމިޝަނާ އޮފް ޕޮލިސް ފިޔަވައި، ސުޕްރިންޓެންޑެންޓް އޮފް ޕޮލިސްއިން ފެށިގެން މަތީ ރޭންކުގެ ކޮމިޝަންޑް އޮފިސަރުންނަކީ މަގާމަށް އެކަށޭނަ ތައުލީމާއި ހުނަރާއި މަސައްކަތުގެ ތަޖުރިބާ އާއި ނަޒާހަތްތެރިކަން ހުރި އޮފިސަރުން ކަމާމެދު ގޮތެއް ކަނޑައެޅުން ކަމަށެވެ.
އެގޮތުން އޮފިސަރުންގެ ގާބިލުކަން ވަޒަން ކުރުމަށް ކުރި މަސައްކަތަށް ކަނޑައެޅިފައިވާ ތާރީހަށް މަސައްކަތް ނިންމުމަށްފަހު، ގާނޫނުގައިވާ ގޮތުގެ މަތީން އެކަން ތަންފީޒު ކުރުމަށް ސީޕީ ހަމީދަށް ހުށަހަޅާފައިވާ ކަމަށް ބަޔާނުގައިވެއެވެ.
