ކޮވެކްސް ފެސިލިޓީ މެދުވެރިކޮށް، ޔުނައިޓެޑް ސްޓޭޓްސް އޮފް އެމެރިކާގެ ސަރުކާރުން ދިވެހިރާއްޖެއަށް 128،700 (އެއްލައްކަ އަށާވީސް ހާސް ހަތް ސަތޭކަ) ޑޯޒްގެ ފައިޒާ ކޯވިޑް-19 ވެކްސިން ދިވެހިރާއްޖެއަށް ހަދިޔާކޮށްފިއެވެ.
ގަތަރް އެއާވޭސްގެ ފްލައިޓެއްގައި މި ވެކްސިން މިއަދު ރާއްޖެއަށް ގެނެސްފައިވާއިރު، މި ވެކްސިން ދެނީ ވަކި ހާއްސަ ބަޔަކަށެވެ. އޭގެ ތެރޭގައި 12 އަހަރާއި 17 އަހަރާއި ދެމެެދުގެ ކުދިން ހިމެނެއެވެ.
މިރަސްމިއްޔާތުގައި ވާހަކަފުޅު ދައްކަވަމުން ހެލްތު މިނިސްޓަރ އަހުމަދު ނަސީމްވަނީ ކޯވިޑް-19 އާއި ދެކޮޅަށް އެމެރިކާއިން ކުރަމުންދާ މަސައްކަތަށް ތައުރީފް ކުރައްވާފައެވެ. މިނިސްޓަރ ވިދާޅުވީ އެމްރިކާއިން ވެކްސިން ފޯރުކޯށްދޭ ޤައުމުތަކުގެ ލިސްޓުގެ ކުރިން ރާއްޖެއަށް ޖާގަ ލިބުނީތީ އުފާކުރައްވާކަމަށެވެ. އަދި މިއީ އެމެރިކާއާއި ރާއްޖެއާއި އޮންނަ އެކުވެރި ގުޅުން ރަމްޒުކޮށްދޭ ކަމެއްކަމަށް މިނިސްޓަރ ވިދާޅުވިއެވެ.
އެމެރިކާއިން ހަދިޔާކުރި ވެކްސިން ދިވެހި ސަރުކާރާ ހަވާލުކުރުމަށް މިއަދު ބޭއްވި ރަސްމިއްޔާތުގައި، އދ އިން ދިވެހިރާއްޖެއަށް ކަނޑައަޅާފައި ހުންނަވާ ރެޒިޑެންޓް ކޯޑިނޭޓަރ ކެތެރިން ހެސްވެލް، ޔުނިސެފް ކަންޓްރީ ރެޕްރެޒެންޓޭޓިވް މަރްޖާން މޮންތަޒޭމީ، ޑަބްލިޔު.އެޗް.އޯ ރެޕްރެޒެންޓޭޓިވް ޑރ ނަޒްނީން އަންވަރު، މިނިސްޓްރީ އޮފް ފޮރިން އެފެއަރޒްއާއި މިނިސްޓްރީ އޮފް ހެލްތާއި، މިނިސްޓްރީ އޮފް ޑިފެންސްގެ އިސް ބޭފުޅުންނާއި، ކޮޅުނބުގައި ހުންނަ އެމެރިކާ އެމްބަސީގެ އިސް އޮފިޝަލުން ބައިވެރިވެވަޑައިގަތެވެ.
ކޯވިޑް19އިން އަރައިގަތުމަށް ރާއްޖެއިން ކުރަމުންދާ މަސައްކަތްތަކަށް އެހީތެރިވުމުގެ ގޮތުން އެމެރިކާއިން ވަނީ މިހާތަނަށް 9.1 މިލިޔަން ޑޮލަރުގެ އެހީތެރިކަން ފޯރުކޮށްދީފައެވެ.
