2023 ވަނަ އަހަރު ރިޔާސީ އިންތިޚާބުގައި ޕްރޮފެސަރ ހަސަން އުގައިލް ވާދަކުރެއްވުމުގެ ކުރިން ރާއްޖެއަށް އެކަށޭނަ ޚިދުމަތެއް ކޮށްދެއްވަން ޖެހޭކަމުގައި ކުރީގެ ބަންޑާރަ ނައިބް ދިޔާނާ ސައީދު ވިދާޅުވެއްޖެއެވެ.

މިދިޔަ ރިޔާސީ އިންތިޚާބުގައިވެސް ވާދަކުރައްވަން އުޅުއްވާކަމުގެ އަޑުތައް ފެތުރުނު އުގައިލް ވިދާޅުވެފައިވަނީ ސިޔާސީ ދާއިރާއަށް ނުކުމެވަޑައިގަތުމުގެ ޝައުގުވެރިކަން ގެންގުޅުއްވާ ކަމަށެވެ. ހާއްސަކޮށް، ސިޔާސީ މަސްރަހުގައި ބަދަލުތަކެއް ފެންނަން ޖެހޭ ކަމަށް ގަބޫލު ކުރައްވާއިރު، އެ ބަދަލުތައް ވަރަށް މުހިންމު ކަމަށް އޭނާ ވަނީ ވިދާޅުވެފައެވެ.

އުގައިލްގެ ވާހަކަތަކާއި ގުޅިގެން ދިޔާނާ ވިދާޅުވީ އިންތިޚާބެއްގައި ވާދަކުރައްވަންޖެހޭނީ ޤައުމަށް ޚިދުމަތް ކޮށްދެއްވުމަށްފަހުގައި ކަމަށެވެ. ރާއްޖެއިން ބޭރުގައި ދިރިއުޅުވަމުން ދޭތެރެ ދޭތެރެއިން ރާއްޖެއަށް ވަޑައިގެން ލައިބްރަރީތަކަށް ފޮތް ހަދިޔާކުރުމާއި، އެނޫންވެސް ކުދި ކުދި ކަންކަން ކުރުމަށްވުރެ ބޮޑު ޚިދުމަތެއް ކޮށްދެއްވަން ޖެހޭކަމަށް ދިޔާނާ ވިދާޅުވިއެވެ.

ފުރަތަމަ ރާއްޖެއަށް އެކަށޭނަ ޚިދުމަތެއް ކޮށްދެއްވާ. ދޭތެރެއަކުން ރާއްޖެއަށް ވަޑައިގެން ލައިބްރަރީއަކަށް ފޮތް ހަދިޔާ ކޮށްލައްޗާ ދެތިން ކަމެއް ކޮށްލެއްވުމަށްވުރެއް ބޮޑު ޚިދުމަތެއް ފެންނަންޖެހޭ.

– ދިޔާނާ ސައީދު

އުގައިލް ވިދާޅުވީ ރާއްޖޭގައި މިވަގުތު ހުރި ބޮޑެތި މައްސަލަތަކަށް ހައްލެއް ހޯދޭނީ ސިޔާސީ މަގުން ކަމަށާއި ސިޔާސީ ދާއިރާއަށް އިލްމީ ގާބިލް މީހުން ނުކުންނަން ޖެހޭކަމަށް ގަބޫލުކުރައްވާ ކަމަށްވެސް އުގައިލު ވިދާޅުވިއެވެ. އެހެން ނަމަވެސް ސިޔާސީ ޕާޓީއެއް އުފެއްދެވުމުގެ ވިސްނުން އަދި ނުގެންގުޅުއްވާ ކަމަށްވެސް އުގައިލު ވިދާޅުވިއެވެ.

ރާއްޖޭގެ ރައްޔިތުން ބޭނުންވާނަމަ، އަންނަ ރިޔާސީ އިންތިޚާބުގައި ވާދަކުރައްވާން ތައްޔާރަށް ހުންނެވިކަމަށާއި ސިޔާސީ މަސައްކަތް ކުރުމަށް ހުސްވުމަށް ރާއްޖެ ބަދަލުވުމުގެ ވިސްނުން ގެންގުޅުއްވާ ކަމަށްވެސް އުގައިލު ވިދާޅުވިއެވެ. އިނގިރޭސި ވިލާތުގެ ބްރެޑްފޯޑް ޔުނިވާސިޓީގެ އިސް މަގާމުތަކެއް ފުރުއްވަމުން ގެންދަވާ ޕްރޮފެސަރު އުގައިލް ދިރިއުޅުއްވަނީ އެގައުމުގައެވެ. ނަމަވެސް ރާއްޖޭގެ ސިޔާސީ މަސްރަހާއި އެހެނިހެން ދާއިރާތަކުން ހިނގާ ގިނަކަންކަމުގައި އޭނާ ގެންދަވަނީ ސޯޝަލްމީޑިއާގައި ވަރަށް ފާޅުކަންބޮޑުކޮށް ހިޔާލު ފާޅުކުރައްވަމުންނެވެ.