މިހިގާ އޮގްސްޓުމަހުގެ 9 ވަނަ ދުވަހުން ފެށިގެން، ކޯވިޑް19ގެ ވެކްސިން ފުރިހަމަ ކޮށްފައިވާ، ގައުމުން ބޭރުގެ މީހުންނަށްވެސް އުމްރާއަށް ދިއުމުގެ ހުއްދަ ދޭން ފަށާނެކަމަށް، ސައުދީ ސަރުކާރުން ހާމަ ކޮށްފިއެވެ.
މިހުއްދަ ދޫކުރަންފަށާނެކަން އާދީއްތަ ދުވަހު ސައުދީ ސަރުކާރުން ހާމަކޮށްފައި މިވަނީ، މުޅި ދުނިޔޭގައި ފެތުރެންފެށި ކޯވިޑް19ގެ އާލަމީ ވަބާއާއި ގުޅިގެން، 18 މަސްދުވަސް ވަންދެން އެގައުމުގެ ބޯޑަރުތައް ބަންދު ކޮށްފައި ބޭއްވުމަށް ފަހުއެވެ.
ސައުދީ ޕްރެސް އޭޖެންސީ ހާމަކޮށްފައިވާ ގޮތުގައި، ގައުމުން ބޭރުން އުމްރާގެ އަޅުކަން އަދާކުރުމަށް ދާފަރާތްތަކުގެ ކަންކަން ހަމަޖެއްވުމަށް ޚާއްސަކުރެވިފައިވާ އިދާރާތަކުން، ހޯމަ ދުވަހުން ފެށިގެން، "ދުނިޔޭގެ އެކި ގައުމުތަމުން، އުމްރާކުރުމަށް ބޭނުންވާ ފަރާތްތަކުގެ ރިކުއެސްޓްތައް ބަލައިގަންނަ ފަށާނެ،" ކަމަށެވެ.
އެހެންނަމަަވެސް، ހުއްދަ ދޫކުރުމަށް އަލުން ފަށާއިރު، ކޮންމެ މަހަކުވެސް މިގޮތުން ދޫކުރަމުން ދާނީ 60،000 ހުއްދަކަމުގައި ވެސް ސައުދީން ބުނެފައި ވެއެވެ. މި އަދަދު އިތުރު ކުރަމުން ކުރަމުން ގޮސް، އެންމެ ފަހުން މަހަކު 2 މިލިއަން މީހުންނަށް އުމްރާ ކުރުމުގެ ހުދަ ދޫކުރާނެކަމަށްވެސް، ސައުދީ ޕްރެސް އޭޖެންސީން ރިޕޯޓު ކޮށްފައި ވެއެވެ.
ސައުދީ ސަރުކާރުން ހަމަ ޖައްސާފައިވާ ގޮތުގައި އުމްރާ ކުރުމަށް އެދޭއިރު، ކޯވިޑް19 ވެކްސިނޭޝަން ސެޓިފިކޭޓެއް އެޕްލިކޭޝަނާއެކު ކޮންމެ މީހަކުވެސް ހުށަހަޅަން ޖެހެއެވެ.
މީގެއިތުން، ކޯވިޑް19ގެ ހާލަތާއި ގުޅޭގޮތުން، ސައުދީއަށް މީހުން އެތެރެވުން މަނާ ކޮށްފައިވާ ގައުމުތަކުން އުމްރާކުރުމަށް ދާ، ވެކްސިންގެ ޑޯޒުތައް ފުރިހަމަ ކޮށްފައިވާ ފަރާތްތަކުން، ސައުދީގެ ކަމާގުޅުންހުރި މުވައްސަސާތަކުން ހަމަޖައްސާ ތަނެއްގައި ކަރަންޓީންވާން ޖެހޭ ގޮތަށްވެސް ވަނީ ހަމަޖައްސާފައެވެ.
މުޅި ދުނިޔޭގައި ފެތުރެންފެށި ކޯވިޑްގެ ނުރައްކާތެރި ވަބާގެ ސަބަބުން، ހައްޖާއި އުމްރާގެ އަޅުކަމަށް ސައުދީއަށް މީހުންނަށް ދަތުރު ކުރެވޭގޮތް ނުވެ، ސައުދީއަށް އާދަނީ ވަންނަ އެންމެ މުހިންމު މިވަސީލަތުން އެގައުމަށް ލިބެމުން އައި އާމްދަނީ އެއްކޮށް ކަހަލަ ގޮތަކަށް ވަނީ ހުއްޓުމަކަށް އައިސްފައެވެ. މި ދެ އަޅުކަމުގެ ވަސީލަތުން ސައުދީއަށް އަހަރަކު 12 ބިލިއަން ޑޮލަރުގެ އާމްދަނީއެއް ލިބެއެވެ.
ސައުދީ އަރަބިއާގައި މިހާތަނަށް 532,000 މީހުން ކޯވިޑް19އަށް ޕޮޒިޓިވް ވެފައިވާއިރު، 8,300 މީހުން މިބަލީގައިވަނީ އެގައުމުގައި މަރުވެފައެވެ.
