އެމްޑީޕީގެ ރައީސް މުހައްމަދު ނަޝީދަށް ދިން ނުރައްކާތެރި ޓެރެރިސްޓް ހަމަލާއާއި ގުޅިގެން ކުރެވެމުންދާ ތަހުގީގާއިމެދު ސުވާލު އުފައްދަމުންދަނީ ވެރިކަމުގެ ތަހުތު ނުލިބިގެން ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
ރައީސް ނަޝީދަށް ދިން ނުރައްކާތެރި ޓެރެރިސްޓް ހަމަލާއާއި ގުޅިގެން ފުލުހުންގެ ތެރޭގައި މިހާތަނަށް ހިންގުނު އެންމެ ބޮޑު އެއްތަހުގީގް ވަނީ ހިންގާފައެވެ. ފުލުހުންގެ ތަހުގީގަށް ގިނަ ބައެއް ތައުރީފް ލިބިފައިވާއިރު، މިހަމަލާ އަމާޒުވި ރައީސް ނަޝީދަށް ތާއީދު ކުރައްވާ މަޖިލިސް މެމްބަރުންނާއި، ބައެއް ސަޕޯޓަރުން ބުނެފައިވަނީ ހަަމަލާގެ ތަހުގީގާއިމެދު ސުވާލު އުފެދޭ ކަންތައްތަކެއް ހުރިކަމަށެވެ. ޚާއްސަކޮށް ހަމަލާއަށް ފަންޑު ކުރި މީހަކު ސާފުނުވާކަމަށެވެ.
މިބޭފުޅުންގެ ވާހަތަކާއި ގުޅިގެން އަދާލަތު ޕާޓީގެ އިލްމުވެރިންގެ މަޖިލީހުގެ މެމްބަރު ޝައިޚު އަލީ ޒައިދު ވިދާޅުވީ ހަމަލާގެ ތަހުގީގް ވަރަށް ފުރިހަމައަށް ކަމާއިބެހޭ އިދާރާތަކުން ކުރައްވަމުންދާކަމަށެވެ. މިމައްސަލާގައި އިންސާފު ނުލިބޭކަމަށް ވިދާޅުވެ ވާހަކަ ދައްކަވަމުންދަނީ ވެރިކަމުގެ ދަހިވެތިކަމުގައި ކަމަށް އަލީ ޒައިދު ވިދާޅުވިއެވެ. މިފަދަ ކަންކަމުގައި އަމިއްލަ ނަފްސުގެ ދަހިވެތިކަން އެއްފަރާތް ކުރަންޖެހޭ ކަމުގައި ޒައިދު ވިދާޅުވިއެވެ.
އަޅުގަނޑު ގަބޫލުކުރާ ގޮތުގައި މޭ 6 ހަމަލާގެ ވަރަށް ފުރިހަމަ ތަހުގީގެއް ކަމާއިބެހޭ ހުރިހާ މުއައްސަސާތަކުން އެބަ ކުރައްވާ! އިންސާފު ނުލިބެނިއްޔޭ ވިދާޅުވެ އުޅުއްވާ ބައެއް ބޭފުޅުން އަސްލު އެއުޅުއްވަނީ ވެރިކަމުގެ ތަހުތު ހޯދުމަށް! އަމިއްލަ ނަފްސުގެ ދަހިވެތި ކަމުން މިންޖުވާންޖެހޭ.
– އަލީ ޒައިދު ވިދާޅުވިއެވެ.
ބޮމެއް ގޮއްވާލައިގެން ރައްޔިތުން މަޖިލީހުގެ ރައީސް މުޙައްމަދު ނަޝީދަށް އަވަހާރަކޮށްލަން މޭ މަހުގެ 6 ވަނަ ދުވަހުގެރޭ ދިން ހަމަލާގެ ތަހުގީގަކީ ފުލުހުން މިހާތަނަށް ހިންގި އެންމެ ކާމިޔާބު އެއް ތަހުގީގު ކަމަށް ހޯމް މިނިސްޓަރު އިމްރާން އަބްދުﷲ ވަނީ ވިދާޅުވެފައެވެ.
އިމްރާން ވިދާޅުވީ މޭ 6ގެ ތަހުގީގަކީ މިހާތަނަށް ފުލުހުން ހިންގި އެންމެ ބޮޑު، އެންމެ ބުރަ އަދި އެންމެ ކާމިޔާބު އެއް ތަހުގީގު ކަމަށެވެ. މީގެ އިތުރުން ގިނަ ގޮންޖެހުންތަކާ އެކު ފުލުހުންގެ ހުރިހާ ބަހާތަކެއްގެ އެތައް ސަތޭކަ ފުލުހުންގެ ބައިވެރިވުމާ އެކު ތަހުގީގު ކާމިޔާބު ކުރުމަށް ކުރެވުނު މަސައްކަތް ބަލައިގަންނަ ކަމަށެވެ. މޭ 6ގެ ހަމަލާ އަކީ ރާއްޖޭގެ ތާރީހުގައި ވެސް ހިންގާފައިވާ ޓެރަރިޒަމްގެ އެންމެ ނުރައްކާތެރި ހަމަލާ ކަމަށްވެސް އިމްރާން ވަނީ ވިދާޅުވެފައެވެ.
