މިއަދު ކުރިއަށްގެންދިޔަ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ ބައި-އިލެކްޝަންގައި ޕީޕީއެމުން ވާދަކުރި 3 ގޮނޑި އެޕާޓިން ކާމިޔާބުކޮށްފިއެވެ.
ބައި އިލެކްޝަން މިއަދު ކުރިއަށް ގެންދިޔަ ރަށްތަކަކީ، ނ. ކެނދިކުޅުދޫއާއި، ނ. މަގޫދޫއާއި، ހދ. ނޮޅިވަރަމާއި، ކ. ދިއްފުށި އަދި އއ. ފެރިދޫއެވެ. މީގެ ތެރެއިން މަގޫދޫގައި ކުރިއަށްގެންދިޔައީ އިންތިޚާބުގެ 3ވަނަ ބުރެކެވެ. އެއީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިިޚާބުގެ ބައި އިލެކްޝަންގައި ވާދަކުރި ދެ ކެނޑިޑޭޓެއްގެ ވޯޓު އެއްވަރުވުމާއި ގުޅިގެންނެވެ.
މީގެތެރެއިން ޕީޕީއެމުން ކެނޑިޑޭޓުން ވާދަކުރީ ހދ. ނޮޅިވަރަމާއި، ނ. މަގޫދޫގެ އިތުރުން ކ. ދިއްފުށީ އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށެވެ. މި ތިންގޮނޑި އިދިކޮޅު ޕީޕީއެމްގެ ކެނޑިޑޭޓުން ކާމިޔާބު ކޮށްފައި ވާއިރު ނ. ކެނދިކުޅުދޫ ކޮމިޓީއަށް އިންތިޚާބު ކުރަންޖެހޭ 2 ގޮނޑިއަށް އިންތިޚާބުވެފައި ވަނީ އެމްޑީޕީގެ ދެ ކެނޑިޑޭޓުންނެވެ.
މީގެ އިތުރުން އއ. ފެރިދޫ އަންހެނުންގެ ކޮމިޓީއަށް 4 މެމްބަރުން އިންތިޚާބު ކުރަންޖެހޭއިރު އެރަށުގެ ބައި-އިލެކްޝަންގައި ވާދަކޮށްފައި ވަނީ ހަމައެކަނި އަމިއްލަގޮތުން ވާދަކުރި މެމްބަރުންނެވެ.
އަންހެނުންގެ ތަރައްޤީއަށް މަސައްކަތްކުތްކުރާ ކޮމިޓީތަކުގެ އިންތިޚާބާއި ކައުންސިލް އިންތިޚާބު ފުރަތަމަ ބާއްވާފައިވަނީ އޭޕްރީލް 10ގައެވެ.
